ގަތަރުގެ ކުރީގެ އަމީރު ޝައިޚް ހަމަދު ބިން ޚަލީފާ އައްޘާނީއަށް އިހްތިރާމް އަދާކުރެއްވުމަށް ރައީސް މުހައްމަދު މުއިއްޒު މިއަދު އެ ގައުމަށް ފުރާވަޑައިގެންފި އެވެ.
އުމުރުން 74 އަހަރުގައި އަވަހާރަވި ޝައިހް ހަމަދު އަވަހާރަވީ އާދީއްތަ ދުވަހެވެ. އެމަނިކުފާނުގެ ޖަނާޒާގައި އިއްޔެ ބާއްވައި، ދޯހާގެ ލުހައިލް ގަބުރުސްތާނުގައި ވަނީ ފަސްދާނުލައްވައިފަ އެވެ.
ރައީސް މުއިއްޒު އެނބުރި ވަޑައިގަންނަވާނެ ތާރީހެއް ސަރުކާރުން ހާމައެއް ނުކުރައްވަ އެވެ.
ކުރީގެ އަމީރު އަވަހާރަވުމާ ގުޅިގެން، ހޯމަ ދުވަހުން ފެށިގެން ހަތަރު ދުވަހުގެ މުއްދަތަށް ގަތަރުގައި ގައުމީ ހިތާމައިގެ ދުވަސްތައް ވަނީ އިއުލާންކޮށްފަ އެވެ. މި މުއްދަތުގައި ސަރުކާރުގެ އިދާރާތަކާއި ދައުލަތުގެ މުއައްސަސާތައް ބަންދުވާނެ ކަމަށާއި، ގައުމީ ދިދަ ބައިދަނޑިއަށް ތިރިކުރެވޭނެ ކަމަށް ވެސް އެ ގައުމުން ވަނީ ބުނެފަ އެވެ.
މިނިވަން މުއްސަނދި ގައުމެއްގެ ގޮތުގައި ގަތަރު ތަރައްގީކުރުމުގެ މައިގަނޑު ބާނީއަކީ، 1995 އިން 2013 އަށް އެ ގައުމުގައި ވެރިކަން ކުރެއްވި ޝައިޚް ހަމަދެވެ.
އެމަނިކުފާނުގެ ޒައާމަތުގައި ގަތަރަށް ވަނީ އިގްތިސާދީ، އިޖުތިމާއީ އަދި ސަގާފީ ގޮތުން ބޮޑެތި ކުރިއެރުންތަކެއް ލިބި، ބައިނަލްއަގުވާމީ މައިދާނުގައި އެ ގައުމުގެ ގަދަރު އުފުލިގެން ގޮސްފަ އެވެ.
ޝައިޚް ހަމަދުގެ ވެރިކަމުގައި ގަތަރުން ވަނީ އިގްތިސާދީ ބޮޑެތި އިންވެސްޓްމަންޓްތަކެއް ކޮށް، ބައިނަލްއަގުވާމީ ގިނަ ގައުމުތަކަކާއެކު ވަރުގަދަ ގުޅުންތަކެއް ގާއިމުކޮށްފަ އެވެ. އެމަނިކުފާނުގެ ދައުރުގައި ގަތަރު ވެގެންދިޔައީ ދުނިޔޭގައި އެންމެ ގިނައިން ގުދުރަތީ ގޭސް އެކްސްޕޯޓްކުރާ ގައުމަށެވެ.
މިއަދު ގަތަރުގެ ސިޔާސީ ނުފޫޒު އުތުރު އެފްރިކާ އާއި، މެދުއިރުމައްޗާއި އޭޝިއާގެ ގިނަ ސަރަހައްދުތަކަކަށް ވަނީ ފެތުރިފަ އެވެ. މީގެ އިތުރުން، 2022 ވަނަ އަހަރު ދުނިޔޭގެ އެންމެ މަގުބޫލު ކުޅިވަރު މުބާރާތް ކަމަށްވާ ފީފާ ވޯލްޑް ކަޕް ގަތަރުގައި ބޭއްވިއިރު، އެ މުބާރާތުގެ ފެށުމުގެ ރަސްމިއްޔާތުގައި ޝައިޚް ހަމަދަށް ސަޕޯޓަރުންގެ ފަރާތުން ވަނީ ހޫނު މަރުހަބާއެއް ކިޔާފަ އެވެ.
އެމަނިކުފާނުގެ ވެރިކަމުގައި 1996 ވަނަ އަހަރު އަލްޖަޒީރާ ނިއުސް ޗެނަލް އުފެއްދެވިއިރު، މަދު އަހަރުތަކެއްގެ ތެރޭގައި އެ ޗެނަލް ވެގެންދިޔައީ ދުނިޔޭގެ އެންމެ ނުފޫޒުގަދަ މީޑިއާ ނެޓްވޯކްތަކުގެ ތެރެއިން އެއް ނެޓްވޯކަށެވެ.
ޝައިޚް ހަމަދުގެ ޒައާމަތުގައި 2004 ވަނަ އަހަރު ގަތަރުގެ ފުރަތަމަ ދާއިމީ ގާނޫނު އަސާސީ އެކުލަވާލައި، މުނިސިޕަލް އިންތިޚާބުތައް ތައާރަފުކުރެއްވި އެވެ. އެ އިންތިޚާބުތަކުގައި ވޯޓުލުމާއި ކެންޑިޑޭޓުންގެ ގޮތުގައި ކުރިމަތިލުމުގެ ފުރުސަތު އަންހެނުންނަށް ވެސް ފުރަތަމަ ފަހަރަށް ދެއްވި އެވެ.
ގަލްފުގެ ގައުމުތަކުގެ ރަސްކަމުގެ އުސޫލުތަކާ ޚިލާފަށް، 2013 ވަނަ އަހަރު ޝައިޚް ހަމަދު ވަނީ އަމިއްލަފުޅަށް ވެރިކަމުން ދުރުވެވަޑައިގެން، އޭރު އުމުރުން 33 އަހަރުގެ ދަރިކަލުން ޝައިޚް ތަމީމް ބިން ހަމަދު އައްޘާނީއާ ވެރިކަން ހަވާލުކުރައްވާފަ އެވެ.
