ގަލްފު ހޮޓެލްސް ގްރޫޕު (ޖީއެޗްޖީ) އިން ރާއްޖޭގައި ރިސޯޓެއް ހަދަން އަމިއްލަ ކުންފުންޏަކާއެކު އެއްބަސްވުމެއްގައި ސޮއިކޮށްފި އެވެ.
ގަލްފު އިންސައިޑާ ނޫހުން ބުނެފައި ވަނީ ޖީއެޗްޖީގެ ރިސޯޓު ތަރައްގީ ކުރަނީ ކ. އަތޮޅުގައި ކަމަށެވެ. ނަމަވެސް ރިސޯޓު ތަރައްގީ ކުރާ ރަށެއް އެ ނޫހަކުން ނުބުނެ އެވެ.
ރާއްޖޭގައި ރިސޯޓު ހަދަން ޖީއެޗްޖީ އިން އެއްބަސްވުމެއްގައި ސޮއި ކުރީ ކެއިރެޓްސޫ ޕްރައިވެޓް ލިމިޓެޑާއެކު އެވެ. ސޮއި ކުރީ ފަހުމުނާމާ އެއްބަސްވުމެއްގައި ކަމަށް ވެ އެވ.
ކެއިރެޓްސޫގެ ވެބްސައިޓުގައި ބުނެފައިވާ ގޮތުން އެއީ ރިސޯޓު ކޮންސްޓްރަކްޝަންގެ މަސައްކަތް ކުރާ ކުންފުންޏެވެ. ވެބްސައިޓުގައި ބުނެފައިވާ ގޮތުން މިވަގުތު ކުރިއަށްދާ ހަތަރު ޕްރޮޖެކްޓާއެކު ޖުމްލަ 28 ޕްރޮޖެކްޓެއް އެ ކުންފުނިން ވަނީ ނިންމައިފަ އެވެ.
ޖީއެޗްޖީ އިން ތަރައްގީ ކުރަނީ ފަސް ތަރީގެ ލަގްޒަރީ ރިސޯޓެވެ. އެ ރިސޯޓުގައި ބީޗް ފްރަންޓް ވިލާސް އާއި އޯވާ ވޯޓާ ވިލާސް އަދި ވެލްނެސް ސެންޓަރުތަކެއް ވެސް ގާއިމް ކުރާނެ ކަމަށް ނޫސްތަކުން ބުނެ އެވެ.
މިއީ މި ސަރަހައްދުގައި ޖީއެޗްޖީ އިން ހުޅުވާ ފުރަތަމަ ރިސޯޓެކެވެ. ޖީއެޗްޖީއަކީ ބަހުރެއިނުގެ މަޝްހޫރު ކުންފުންޏެވެ. އެ ކުންފުނީގެ ރިސޯޓާއި ހޮޓާތައް ދުނިޔޭގެ މަގުބޫލު އެކި މަންޒިލްތަކުގައި ހިންގަ އެވެ.
ޖީއެޗްޖީގެ އެންމެ މަޝްހޫރު ހޮޓަލީ ބަހުރެއިނުގައި ހިންގާ ގަލްފު ހޮޓެލް ބަހުރެއިން އެވެ. އެއީ 361 ކޮޓަރީގެ ފަސް ތަރީގެ ހޮޓަލެކެވެ.
