އީރާނުގެ ސިޓީތަކަށް އެމެރިކާއިން ޖެހިޖެހިގެން ދެވަނަ ރެޔަކު ބޮން އެޅުމާ ގުޅިގެން، ބަހްރޭނާއި ކުވެއިތު އަދި ގަތަރުގައި ހުރި އެމެރިކާގެ އަސްކަރީ މަރުކަޒުތަކަށާއި މުހިންމު އިސްތިރާޖީ މަރުކަޒުތަކަށް ހަމަލާދީފައިވާނެ ކަމަށް އީރާނުން ބުނެފި އެވެ.
ވޭތުވެދިޔަ ދެ ދުވަހުގެ ތެރޭގައި އެމެރިކާއިން ދިން މި ހަމަލާތަކުގައި 14 މީހުން މަރުވެ 78 މީހުން ޒަހަމްވެފައިވާއިރު، ހޮރްމޫޒް ކަނޑުއޮޅި ކައިރީގައިވާ އީރާނުގެ ސިޓީތައް ކަމަށްވާ ބުޝެހްރު، ޗަބަހާރު، ބަންދަރު އައްބާސް އަދި ސިރިކްއަށް ބޮން އަޅާފައިވާ ކަމުގެ ރިޕޯޓުތައް ވަނީ ލިބިފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، މި ހަމަލާތަކަކީ ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ހަމަލާދޭ ކަމަށް ބުނެ، އެކަމުގެ ބަދަލުހިފުމުގެ ގޮތުން ދިން ހަމަލާތަކެއް ކަމަށެވެ. ނަމަވެސް އެ ތުހުމަތާ ބޯޓުތަކަށް ހަމަލާދިން ކަމަށް ބުނާ ވާހަކައާ މެދު އީރާނުން ވަކި އެއްޗެއް ނުބުނެ އެވެ.
ހަމަލާތައް އަލުން ފަށާފައި މި ވަނީ އީރާނުގެ އަވަހާރަކޮށްލާފައިވާ ރޫހާނީ ލީޑަރު އަލީ ހާމަނާއީގެ ޖަނާޒާގެ ކަންކަން ކުރިއަށް ދަނިކޮށެވެ. އެގޮތުން އިރާގުގެ ނަޖަފް އަދި ކަރުބަލާގައި އެތައް މިލިއަން ބަޔަކު ބައިވެރިވުމަށް ފަހު، ހާމަނާއީ ފަސްދާނުލުން މިއަދު އޭނާގެ އުފަން ރަށް ކަމަށްވާ މަޝްހަދުގައި އޮންނާނެ އެވެ.
އެމެރިކާއިން އީރާނަށް ހަމަލާދެމުންދާ އިރު، އިސްރާއީލުގެ ސިފައިން ގާޒާއަށާއި ލުބުނާނަށް ދެމުންދާ ހަމަލާތައް ވެސް ވަނީ ވަރުގަދަކޮށްފަ އެވެ. ފަލަސްތީނުގެ ބިންތަކުން މަދުވެގެން އަށް މީހުން އަދި ލުބުނާނުގެ ނަބަޠިއްޔާ އަލް-ފައުގާއިން ދެ މީހަކު މަރާލާފައިވާ ކަމަށް ރިޕޯޓުތައް ބުނެ އެވެ.
