މަޔާމީ، ޔުނައިޓެޑް ސްޓޭޓްސް (ޖުލައި 4) - އިތުރު ވަގުތުގެ ދެ ހާފު ކުޅެގެން ވާދަވެރި ކުޅުމަކަށް ފަހު، 3-2 އިން ކޭޕް ވާޑު ބަލިކޮށް ފީފާ ވޯލްޑް ކަަޕްގެ ޗެމްޕިއަން، އާޖެންޓީނާ އިން މި ފަހަރުގެ މުބާރާތުގެ ގަދަ 16 އިން ޖާގަ ހޯދައިފި އެވެ.
ގަދަ 16 ބުރުގައި އާޖެންޓީނާ އިން ކުޅޭނީ މިސްރާ އެވެ. މިއީ، މިސްރުން ނޮކައުޓަށް ދަތުރުކުރި ފުރަތަމަ ވޯލްޑް ކަޕް އެވެ.
މުޅިން އަލަށް ފީފާ ވޯލްޑް ކަޕްގައި ކުޅޭ ކޭޕް ވާޑުން ނޮކައުޓް ބުރަށް ދަތުރުކުރީ ގްރޫޕް ސްޓޭޖުގައި ކުޅުނު ތިން މެޗުން، ސްޕެއިން، އުރުގުއޭ އަދި ސައުދީ އަރަބިއްޔާއާ އެއްވަރުކޮށްފަ އެވެ. އަނެއްކޮޅުން، އެންމެ ފަހުގެ ޗެމްޕިއަން، އާޖެންޓީނާ އަކީ ގަދަ 32 ޓީމު ކުޅޭ ބުރަށް ގްރޫޕް ސްޓޭޖުގެ ތިން މެޗުން މޮޅުވެގެން، ދަތުރުކުރި ތިން ޓީމުގެ ތެރެއިން އެއް ޓީމެވެ.
މަޔާމީ ސްޓޭޑިއަމްގައި މިރޭ ކުޅުނު މެޗުގައި، އާޖެންޓީނާ އިން ވަނީ 29 ވަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ މި ފަހަރުގެ ވޯލްޑް ކަޕްގައި ތަފާތު ފޯމެއްގައި ކުޅެމުން އަންނަ އާޖެންޓިނާގެ ކެޕްޓަން، ލިއޮނަލް މެސީ އެވެ. އާޖެންޓީނާގެ ޑިފެންޑަރު، ލިސަންޑްރޯ މާޓިނޭޒް ދިން ބޯޅައެއް ކޮންޓްރޯލް ކުރުމަށް ފަހު، މެސީ ވަނީ ކޭޕް ވާޑްގެ ކީޕަރު، 40 އަހަރުގެ ވޮޒީނިއާ ކައިރިން ގޯލު ޖަަހައިފަ އެވެ.
މިއީ، މި ފަހަރުގެ ވޯލްޑް ކަޕްގެ ލަނޑު ލިސްޓުގެ ކުރީގައި އުޅޭ މެސީ މި ފަހަރުގެ މުބާރާތުގައި ޖެހި ހަތް ވަނަ ގޯލެވެ.
ދެ ވަނަ ގޯލެއް ޖަހަން ފުރަތަަމަ ހާފުގައި އާޖެންޓީނާ އިން ގިނަ މަސައްކަތްތަކެއް ކުރި ނަމަވެސް، ކޭޕް ވާޑުން ވަނީ ދެ ވަނަ ހާފު ފަށައިގެން 14 މިނިޓް ތެރޭ ލަނޑު ޖަހައި އެއްވަރުކޮށްފަ އެވެ. މިއީ، ކޭޕް ވާޑްގެ ކެޕްޓަން، ރަޔާން މެންޑޭސް ދިން ބޯޅައަކުން ޑެރޯއި ޑުއާޓޭ ހަމަޖެހިލައިފައި ގޯލުގެ ތެރެއަށް ފޮނުވާލައިފަ އެވެ.
އިތުރު ވަގުތުގެ ހަތަރު ވަނަ މިނިޓްގައި، އޭރިއާބޭރުން ލިބުނު ހިލޭ ޖެހުމަކުން މެސީ ޖެހި ބޯޅަ ކީޕަރު ވޮޒީނިއާ ވަނީ މަތަކޮށްފަ އެެވެ. އޭގެ ކުރިން ވެސް މެސީގެ ޝޮޓްތަކެއް ވޮޒީނިއާ ވަނީ މަަތަކޮށްފަ އެެވެ.
މެޗުގެ ފުރިހަަމަ ވަގުތު ހަމަވިއިރު، ދެ ޓީމުން ކުރެން އެއް ޓީމެއް ވެސް މޮޅުނުވުމުން، ނަތީޖާ ނެރެން އިތުރު ވަގުތުގެ ދެ ހާފް ކުޅެން ޖެހުނެވެ. އިތުރު ވަގުތުގެ ފުރަތަމަ ހާފުގެ ކުޅުން ފެށިގެން ދެ މިނިޓް ތެރޭ އާޖެންޓީނާ އިން އަލުން ލީޑުނެގި އެވެ. ކޯނަރަކުން ތަނަވަސްވި ފުރުސަތެއްގައި މި ލަނޑު ޖެހީ ލިސަންދްރޯ މާޓިނޭޒް އެވެ. އޭނާ ވަނީ ލިބުނު ފުރުސަތުގައި ގޯލުގެ މަތީ ދާގަނޑަށް ބޯޅަ ފޮނުވާލައިފަ އެވެ.
އިތުރު ވަގުތުގެ ފުރަތަމަ ހާފު ނިމުމުގެ ކުރިން، ސިޑްނީ ކަބްރާލް ޖެހި ހިތްގައިމު ގޯލުން ކޭޕް ވާޑުން މެޗުގައި ދެ ވަނަ ފަހަރަށް އެއްވަރުކުރި އެވެ. އޭރިއާ އަރިމަތިން ކަބްރާލް ފޮނުވާލި ބޯޅަ އާޖެންޓީނާގެ ކީޕަރު، އެމިލިއާނޯ މާޓިނޭޒް އަތްމަތިން އަމާޒުވީ ގޯލުގެ މަތީ ކަނަށެވެ.
އާޖެންޓީނާ އިން ތިން ވަނަ ފަަހަަރަށް މެޗުގައި ލީޑުނެގީ އިތުުރު ވަގުތުގެ ދެ ވަނަ ހާފުގައި ކްރިސްޓިއަން ރޮމޭރޯ ޖެހި ގޯލުންނެވެ. މިއީ މެސީ ނެގި ކޯނަރަކުން ރޮމޭރޯ ބޮލުންޖެހި ބޯޅައެއް ކޭޕްް ވާޑް ކުޅުންތެރިއަކު ގައިގައި ޖެހިފައި ވަަން ގޯލެކެވެ. އަލުން ކޭޕް ވާޑް އަށް އެއްވަރުކޮށްދޭން ކަބްރާލް، ހިލޭ ޖެހުމަކުން ޖެހި ބޯޅަ ކީޕަރު މާޓީނޭޒް މަތަކުރި އެވެ.
