މަޝްހޫރު ލަވަކިޔުންތެރިޔާ ދުއާ ލީޕާ އާއި އެކްޓަރު ކެލަމް ޓާނާ ކައިވެނިކޮށްފި އެވެ.
ދެ އަހަރަށް ވުރެ ގިނަ ދުވަހު ރައްޓެހިވެގެން އުޅުމަށްފަހު، ދެ ތަރިން ކައިވެނިކުރީ މިދިޔަ އާދީއްތަ ދުވަހު ލަންޑަންގެ އޯލްޑް މެރިލެބޯން ޓައުން ހޯލްގަ އެވެ.
ކައިވެނީގެ ފޮޓޯތަކުން ފެންނަ ގޮތުގައި ދުއާ ލީޕާ ހުރީ ހުދުކުލައިގެ ސޫޓެއްގަ އެވެ. ކެލަމް ޓާނާ ލައިގެން ހުރީ ގަދަ ނޫކުލައިގެ ސޫޓެކެވެ.
މި ކައިވެނީގެ ރަސްމިއްޔާތަކީ ވަރަށް މަދު ބަޔަކު ބައިވެރިވި، އާއިލީ ރަސްމިއްޔާތެކެވެ.
މިދިޔަ އަހަރު ބްރިޓިޝް ވޯގް މެގަޒިންއަށް ދިން އިންޓަވިއުއެއްގައި ދުއާ ލީޕާ ވަނީ އޭނާ އާއި ޓާނާ އެންގޭޖްވިކަން އިއުލާންކޮށްފަ އެވެ.
ކައިވެނީގެ އުފާފާޅުކުރުމަށް އަންނަ ހަފުތާގެ ބަންދުގައި އިޓަލީގެ ސިސިލީގައި ތިން ދުވަހުގެ ބޮޑު ހަފުލާއެއް ބޭއްވުމަށް ރާވާފައިވާ ކަމަށް މީޑިއާ ރިޕޯޓްތައް ބުނެ އެވެ.
އުމުރުން 30 އަހަރުގެ ދުއާ ލީޕާ އަކީ ދުނިޔޭގެ އެންމެ މަގުބޫލު އެއް ލަވަކިޔުންތެރިޔާ އެވެ. އޭނާ ވަނީ 2024 ވަނަ އަހަރުގެ ގްލާސްޓަންބަރީ ފެސްޓިވަލްގެ މައި ޝޯވެސް ހުށަހަޅައިދީފަ އެވެ.
އުމުރުން 36 އަހަރުގެ ކެލަމް ޓާނާ އަކީ "ފެންޓާސްޓިކް ބީސްޓްސް" ފިލްމުތަކުން ބައިނަލްއަގުވާމީ މަގުބޫލުކަން ހޯދާފައިވާ އެކްޓަރެކެވެ. އަދި އޭނާއަކީ ދެން އެންމެ އަވަހަށް ޖޭމްސް ބޮންޑުގެ ރޯލުން ފެނިދާނެ ކަމަށް ބެލެވޭ އެކްޓަރެވެ.
ލަންޑަންގެ އޯލްޑް މެރިލެބޯން ޓައުން ހޯލަކީ މީގެ ކުރިންވެސް ގިނަ މަޝްހޫރު ފަރާތްތަކެއް ކައިވެނިކޮށްފައިވާ ތަނެކެވެ. އެގޮތުން 1969 ވަނަ އަހަރު ސާ ޕޯލް މެކާޓްނީ އާއި ލިންޑާ އީސްޓްމަން ކައިވެނިކުރީ އެތަނުގަ އެވެ. އޭގެ ފަހުން 2011 ވަނަ އަހަރު ނޭންސީ ޝެވެލްއާ ޕޯލް މެކާޓްނީ ކައިވެނިކުރީ ވެސް ހަމަ އެ ތަނުގަ އެވެ.
މީގެ އިތުރުން، ބީޓްލްސްގެ މެންބަރު ރިންގޯ ސްޓާ 1981 ވަނަ އަހަރު އޭނާގެ އަނބިމީހާ ބާބަރާއާ ކައިވެނިކުރީ ވެސް އެ ޓައުން ހޯލުގަ އެވެ. އަދި 1996 ވަނަ އަހަރު މެލަނީ ގްރިފިތް އާއި އެންޓޯނިއޯ ބަންޑޭރަސްގެ ކައިވެނި ވެސް ބޭއްވީ އެތަނުގަ އެވެ.
