ބާސެލޯނާ (މެއި 20) - އަނިޔާގެ ސަަބަބުން ބާސެލޯނާ އަށް ކުޅޭ ސްޕެއިނުގެ ތަަރި، ފާމިން ލޮޕޭޒަށް އަންނަ މަހު އެމެރިކާ، މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތުގެ ފުރުސަތު ގެއްލިއްޖެ އެވެ.
ސްޕެއިނުގެ ކޯޗު، ލުއިސް ޑެ ލަ ފުއެންޓޭ ވަނީ އަންނަ ހޯމަ ދުވަހު، ފީފާ ވޯލްޑް ކަޕްގައި ވާދަކުރާ ސްޕެއިން ޓީމުގެ 26 ކުޅުންތެރިންގެ ސްކޮޑު އިއުލާނުކުރަން ނިންމައިފަ އެވެ. އެކަމަކު، އެ ސްކޮޑުގައި ޔަގީނުން ވެސް އެންމެ ފަހުން ޓީމުން ޖާގަ ހޯދި އެއް ކުޅުންތެރިއެއް ކަމަށްވާ ފާމިން ލޮޕޭޒް ނުހިމެނޭނެކަން ވަނީ ކަށަވަރުވެފަ އެވެ.
ބާސެލޯނާ އިން ހޯމަ ދުވަަހު ނެރުނު ބަޔާނެއްގައި ބުނެފައިވަނީ، ފާމިން ލޮޕޭޒްގެ ފަައިތިލަ އަށް ލިބިފައިވާ އަނިޔާއާ ހެދި އޮޕަރޭޝަނެއް ކުރަން ޖެހޭނެ ކަމަށެވެ. އަދި، އެ އޮޕަރޭޝަނަށް ފަހު ކުޅުމަށް އެނބުރި އަންނަން ނަގާ މުއްދަތް އަށް ހަފްތާ އަށް ދިގުދެމިގެންދާނެ ކަމަށެވެ. ބާސެލޯނާގެ އެ ބަޔާނަށް ފަަހު، ފާމިން ލޮޕޭޒް، އަމިއްލަ އަަކަށް ސްޕެޝަލިސްޓަކަށް ދައްކައިގެން، އަނިޔާގެ އިތުރު ތަފްސީލް ދެނެގަތްއިރު، ކުރިން ލިބުނު ރިޕޯޓެކޭ އެއްގޮތަށް ސާޖަރީއެއް ކުރަން ޖެހޭނެކަން ވަނީ ޔަގީންވެފަ އެވެ.
މި ސީޒަނުގެ ސްޕެނިޝް ލީގުގެ ޗެމްޕިއަންކަން ބާސެލޯނާ އިން ހޯދި ޓީމުގައި ކުޅެން ލިބުނު ފުރުސަތުތަކުގައި ފާމިން ލޮޕޭޒް ވަނީ ރަނގަޅު ކުޅުމެއް ދައްކައިފަ އެވެ. އެ ގޮތުން، މި ސީޒަނުގައި އޭނާ ކުޅުނު 30 މެޗުގެ ތެރެއިން 19 މެޗުގައި ފުރަތަމަ އެގާރައިގައި ހިމެނިގެން ކުޅެފައިވެ އެވެ. ހަ ގޯލު ޖެހިއިރު، ނުވަ ލަނޑު ޖަހަން ފުރުސަތު ތަނަވަސްކޮށްދީފައިވެ އެވެ.
ފާމިން ލޮޕޭޒަކީ، 2024 ވަނަ އަހަރުގެ ޔޫރޯ ފުޓްބޯޅަ މުބާރާތާއި އެ އަހަރު ބޭއްވި އޮލިމްޕިކްސްގެ ފުޓްބޯޅަ އިވެންޓުން ރަން މެޑަލް ހޯދި ސްޕެއިން ޓީމުގެ ކުޅުންތެރިއެކެވެ. އެކަމަކު، ފީފާ ވޯލްޑް ކަޕެއްގައި ކުޅުމަށް ފާމިން ލޮޕޭޒް ދެކެމުން އައި ހުވަފެން އެންމެ އަވަހަށް ވެސް ހަގީގަތަކަށްވާނީ 2030 ވަނަ އަހަރު އެވެ. އެ އަަހަރު ވޯލްޑް ކަޕް އޮތީ، ސްޕެއިނާއި މޮރޮކޯ އަދ ޕޯޗުގަލް ގުޅިގެންނެވެ.
