ކަނޑުދަތުރުފަތުރާއި މޫދު ކުޅިވަރުގެ ސާމާނު ރާއްޖޭގައި ފުޅާދާއިރާއެއްގައި ފޯރުކޮށްދޭ ސީ ގިއާ އިން އުޅަނދުފަހަރު ސާފުކޮށް ބެލެހެއްޓުމަށް ބޭނުންކުރާ ތަކެއްޗަށް ހޭލުންތެރިކުރުވުމުގެ ހާއްސަ ތަމްރީނު ސެޝަނެއް ބާއްވައިފި އެވެ.
ޗަމްޕާ ސެންޓްރަލް ހޮޓެލްގައި ބޭއްވި މި ސެޝަންގައި ރިސޯޓްތަކާއި، ޑައިވް ސެންޓަރުތަކާއި، އުޅަނދުފަހަރު ދުއްވާ ފަރާތްތަކުގެ އިތުރުން ސިލްވާ ސޭންޑްސްގެ އޮޕަރޭޝަނަލް މުވައްޒަފުން ހިމެނޭހެން ޖުމްލަ 20 ފަރާތަކުން ބައިވެރިވި އެވެ. އެ ސެޝަންތައް ނަގައިދިނީ ޔަޓިކޮން ކުންފުނީގެ ތަޖުރިބާކާރެއް ކަމަށްވާ އެންޑްރިއަސް ޓެގްލާ އެވެ.
ސެޝަންގެ ތެރެއިން ޔަޓިކޮން ބްރޭންޑުގެ ތާރީހާއި، މުޅި ދުނިޔޭގައި އެ ކުންފުނިން ހޯދާފައިވާ މަގުބޫލުކަމުގެ މައްޗަށް އަލިއަޅުވާލައި، އުޅަނދުފަހަރު ސާފުކުރުމަށާއި ބެލެހެއްޓުމަށް ބޭނުންކުރާ އެކި ބާވަތުގެ އުފެއްދުންތަކާ ބެހޭ މައުލޫމާތު ބައިވެރިންނަށް ފޯރުކޮށްދިނެވެ.
މިގޮތުން ރާއްޖެ ފަދަ ލޮނާއި، ހޫނު ގަދަ މާހައުލެއްގައި އުޅަނދުފަހަރުގެ ދިގުދެމިގެންދާ މިންވަރު އިތުރުކުރުމަށް އެއާއި އެންމެ އެކަށީގެންވާ އުފެއްދުންތައް ބޭނުންކުރުމުގެ މުހިންމުކަންވެސް ސެޝަންގައި ކިޔައިދެވުނެވެ.
މީގެ އިތުރުން ސެޝަންގައި ސީޖެޓް އެންޓިފައުލިން ބޭނުންކޮށްގެން އުޅަނދުފަހަރުގެ ބުރުގައި ފެއްސާއި ގާފޮރި ޖެހުން ހުއްޓުވައި، އުޅަނދުގެ ދުވެލި ހަލުވިކޮށް ތެޔޮ އިސްރާފުވުން ކުޑަކުރެވޭނެ ގޮތްތަކާ ބެހޭގޮތުން މައުލޫމާތު ދިނެވެ.
މި ތަމްރީނުގެ އެންމެ މުހިންމު ބަޔަކީ އަމަލީ ގޮތުން ތަކެތި ބޭނުންކޮށްގެން ދެއްކި ލައިވް ޑެމޮންސްޓްރޭޝަން ތަކެވެ. އެގޮތުން ފައިބަރު އަދި ޖެލްކޯޓް، ސްޓެއިންލެސް ސްޓީލް އަދި ބޯޓު ފެންޑަރު ފަދަ ތަކެތި ސާފުކޮށް ބަލަހައްޓާނެ ގޮތް ބައިވެރިންނަށް ދަސްކޮށްދިނެވެ.
ސީ ގިއާ އިން ބުނީ ސެޝަންގެ ސަބަބުން ބައިވެރިންނަށް މަސައްކަތުގެ ފެންވަރު ރަނގަޅުކުރުމަށާއި، ހަރަދު ކުޑަކޮށް އުޅަނދުފަހަރު ބެލެހެއްޓުމަށް ބޭނުންވާ މުހިންމު އުކުޅުތަކާއި ގިނަ މައުލޫމާތުތަކެއް ފޯރުކޮށްދެވިފައިވާ ކަމަށެވެ.
ސީގި އާއަކީ ރާއްޖޭގެ މެރިން ސިނާއަތަށް ބޭނުންވާ ފެންވަރު ރަނގަޅު އުފެއްދުންތައް ފޯރުކޮށްދިނުމުގައި ފާހަގަކޮށްލެވޭ ކުންފުންޏެކެވެ.
