ކުޑަ ވަގުތުކޮޅެއްގެ ތަފާތުން ދެ މަގާމެއްގައި، އިރާނުގެ ހަނގުރާމައާ ގުޅޭ ގޮތުން ރައީސް ޑޮނަލްޑު ޓްރަމްޕް ދެއްކެވި ވާހަކައިގައި ބޮޑެތި ފުށުއެރުންތަކެއް ހުރިކަން ހާމަވެއްޖެ އެވެ.
ފުރަތަމަ، ހައުސް ރިޕަބްލިކަން މެންބަރުންނާ ބައްދަލުކުރައްވައި ޓްރަމްޕް ވިދާޅުވީ، "އަހަރެމެން މިހާރުވެސް ގިނަ ގޮތްގޮތުން ކާމިޔާބު ހޯދައިފިން، އެކަމަކު އަދި އެވަރުން ފުދޭވަރަކަށް ކާމިޔާބެއް ނުލިބޭ،" ކަމަށެވެ. މީގެ މާނައަކީ ހަނގުރާމައިގައި އިތުރު ކުރިއެރުންތަކެއް ހޯދަން އަދިވެސް މަސައްކަތް ކުރަން ޖެހޭ ކަމެވެ.
ނަމަވެސް، އޭގެ ކުޑައިރުކޮޅެއް ފަހުން ފްލޮރިޑާގެ ޑޯރަލްގައި ބޭއްވި ނޫސްވެރިންގެ ބައްދަލުވުމުގައި ޓްރަމްޕްގެ ރާގު މުޅިން ބަދަލުވި އެވެ.
އެމެރިކާއިން ބޮޑެތި ކުރިއެރުންތަކެއް ހޯދާފައިވާ ކަމަށް ވިދާޅުވަމުން، މިހާރު ކުރިއަށްދާ އަސްކަރީ އޮޕަރޭޝަންތަކަކީ "ގާތްގަނޑަކަށް ފުރިހަމަވެ ނިމިފައިވާ" ކަންކަން ކަމަށް އޭނާ އިޝާރާތް ކުރެއްވި އެވެ.
ނޫސްވެރިންގެ ބައްދަލުވުމުގެ މުހިންމު ނުކުތާތައް
- އިރާނުގެ ލީޑަރޝިޕްގެ ދެ ފަންތިއެއް މިހާރު ނެތިގޮސްފައިވާ ކަމަށާއި، އެހެންކަމުން ހަނގުރާމަ ވަރަށް އަވަހަށް ނިމިދާނެ ކަމަށް އުންމީދު ކުރައްވާ ކަމަށް ޓްރަމްޕް ވިދާޅުވި
- އިރާނުގެ އަންހެން ކުދިންގެ ސްކޫލަކަށް ދިން ހަމަލާއަކީ އިރާނުން އަމިއްލައަށް ނުވަތަ އެހެން ގައުމަކުން ދިން ހަމަލާއަކަށް ވެދާނެ ކަމަށް ޓްރަމްޕް ތުހުމަތު ކުރެއްވި. އޭނާ ވިދާޅުވީ އެ ހަމަލާގައި ބޭނުންކުރި "ޓޮމަހޯކް" މިސައިލަކީ ގިނަ ގައުމުތަކުގައި ހުންނަ އާންމު ހަތިޔާރެއް ކަމަށެވެ. ނަމަވެސް، މާހިރުން ބުނާ ގޮތުގައި ޓޮމަހޯކް މިސައިލަކީ އިރާނުގައި ހުރި ހަތިޔާރެއް ނޫން
- ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، އިރާނާ ދެކޮޅަށް އަޅާފައިވާ ތެލާ ގުޅުންހުރި ބައެއް ދަތިކުރުމުގެ ފިޔަވަޅުތަކަށް ލުއިދެއްވާނެ ކަމަށް ޓްރަމްޕް އިއުލާން ކުރެއްވި.
- ރަޝިއާގެ ރައީސް ޕޫޓިންއާ ފޯނުން ވާހަކަ ދެއްކެވި ކަމަށާއި، މެދުއިރުމަތީގެ މައްސަލައިގައި ޕޫޓިން އެހީތެރިވާން ބޭނުންވާ ކަމަށް ޓްރަމްޕް ހާމަކުރެއްވި އެވެ. ނަމަވެސް ޕޫޓިންއަށް ދެއްވި ޖަވާބަކީ ޔޫކްރެއިން ހަނގުރާމަ ހުއްޓާލުމަށް
ޓްރަމްޕް ވިދާޅުވީ، އިރާނުގެ އާ ސުޕްރީމް ލީޑަރާ މެދު މާޔޫސްވާ ކަމަށާއި، އެމެރިކާގެ އަމާޒަކީ ދުޝްމަނުން މުޅިން ބަލިކޮށްލުން ކަމަށެވެ.
