ޓީސީ ސްޕޯޓްސް ކްލަބްގެ ކޯޗުގެ މަގާމާ މީގެ ކުރިން ވެސް އެ ޒިންމާ އަދާކުރި ކޯޗު މުހައްމަދު އާތިފް (އާތީ) ހަވާލުވެއްޖެ އެވެ.
އާތީ ވަނީ މީގެ ކުރިން، 2019 ވަނަ އަަހަރު ޓީސީ އަށް ކޯޗުކޮށްދީފަ އެވެ. އެ ފަހަރުގެ ސީޒަނު ފަަށަން ކުޅުނު ޗެރިޓީ ޝީލްޑް މެޗުގައި ށ. ފޯކައިދޫ ބަލިކޮށް، ޓީސީ އަށް ޝީލްޑް ކާމިޔާބުކޮށްދިން އާތީ ވަނީ ކުރު މުއްދަތެއްގައި ޓީސީ އަށް ކޯޗުކޮށްދިނުމަށް ފަހު، މައްސަލަތަކެއް ދިމާވުމުން، އަމިއްލަ އަށް މަގާމުން ވަކިވެފަ އެވެ.
ގައުމީ ފިިރިހެން ޓީމުގެ އެސިސްޓަންޓް ކޯޗުކަމާއި ގައުމީ އަންހެން ޓީމުގެ ހެޑްކޯޗުކަން ކޮށްފައިވާ އާތީ ވަނީ ފުރަތަމަ ޑިވިޝަނުގައި ގިނަ ޓީމުުތަކަކަށް ކޯޗުކޮށްދީފަ އެެވެ. އޭގެ ތެރޭގައި ޓީސީގެ އިތުރުން، ޔުނައިޓެޑް ވިކްޓަރީ (ޔޫވީ)، ވިކްޓަރީ ސްޕޯޓްސް ކްލަބް، ކްލަބް ވެލެންސިއާ، އޯލްޔޫތުލިންކްއޭޖް (އޭވައިއެލް) އެވެ.
މި ސީޒަނުގައި އެންމެ ފުރަތަމަ ވިކްޓަރީއާ ހަވާލުވި ނަމަވެސް، ސީޒަން ނުފެށި ލަސްވެގެން އާތީ ވަނީ ގައުމީ އަންހެން ޓީމަށް ކޯޗުކޮށްދީފަ އެވެ. ޓީސީއާ ހަވާލުވުމުގެ ކުރިން، އާތީ ވަނީ، ބީއެމްއެލް އެޓޯލް ޗެމްޕިއަންޝިޕްގެ ކ. އަތޮޅު މުބާރާތުގައި ކުޅުނު ހުރާ ޓީމުގެ ކޯޗަކަށް މަސައްކަތްކޮށްފަ އެވެ.
ޓީސީން މި ސީޒަނަށް ނުކުތީ، ހެޑް ކޯޗަކަށް އަހުސަން ރަޝީދު (ޗޭ) ހަމަޖައްސައިގެންނެވެ. މި މަހު ދެ ވަނަ ދުވަހު ދިވެހި ޕްރިމިއާ ލީގުގައި، އީގަލްްސްއާ ކުޅުނު މެޗުގައި ދިމާވި ކަމެއްގެ ސަބަބުން، އެފްއޭއެމް ޑިސިޕްލިނަރީ ކޮމީޓީން ވަނީ ޗޭ ދެ މެޗަށް ސަސްޕެންޑްކޮށްފަ އެވެ.
އޮޑި ސްޕޯޓްސް ކްލަބަށް ދެ ވަނަ ޑިވިޝަނުގައި ކޯޗުކޮށްދިން އާތީ، ޓީސީއާ ހަވާލުވިއިރު، މި ވަގުތު އެ ޓީމު އޮތީ އަށް މެޗުން ފަސް ޕޮއިންޓާ އެކު، އަށް ވަނައިގަ އެވެ. އާތީގެ ކޯޗުކަމުގައި، ޓީސީން ކުޅޭ ފުރަތަމަ މެޗުގައި ދިވެހި ޕްރިމިއާ ލީގުގައި މިއަދު ހަވީރު ބައްދަލުކުރާނީ އޮޑިއާ އެވެ.
