ސޯލް، ދެކުނު ކޮރެއާ (އެޕްރީލް 4) - ދެކުނު ކޮރެއާގެ ރައީސްގެ މަގާމުގައި ހުންނެވި ޔޫން ސުކް ޔޮލް އެ ގައުމުގެ ގާނޫނުއަސާސީގެ ބާރު ކަނޑުވައިލާފައިވާތީ އޭނާގެ މައްޗަށް ނެގި އިތުބާރު ނެތް ކަމުގެ ވޯޓު ދަމަހައްޓައި އޭނާ އެ މަގާމުން ވަކިކުރުމަށް ކޮންސްޓިޓިއުޝަނަލް ކޯޓުން ނިންމައިފި އެވެ.
މިދިޔަ އަހަރުގެ ތެރޭގައި ކުއްލި ނުރައްކަލުގެ ހާލަތު އިއުލާނުކޮށް ވާދަވެރިން ހައްޔަރު ކުރުމަށް ޔޫން ނިންމެވުމާ ގުޅިގެން އޭނާގެ އިތުބާރު ނެތް ކަމުގެ މައްސަލައެއް އެ ގައުމުގެ މަޖިލީހުން ވަނީ ފާސްކޮށްފަ އެވެ. އެއީ އޭނާއަށް ގާނޫނުއަސާސީން ލިބިދީފައިވާ ބާރުގެ ބޭރުން ނިންމާފައިވާ ނިންމުމެއް ކަމަށް މަޖިލީހުން އޮތީ ކަނޑައަޅާފަ އެވެ.
ވަގުތީ އުއްތަމަ ފަނޑިޔާރު މޫން ހިޔުންގ-ބޭ ވިދާޅުވީ ޑިސެމްބަރު 3, 2024 ގައި ޔޫން ރައީސްކަމުގެ މަސްއޫލިއްޔަތާ ހިލާފުވެވަޑައިގަނެ ގާނޫނު އަސާސީން އޭނާއަށް ލިބިދީފައިވާ ބާރުތަކުގެ ބޭރުން އަމަލު ކުރެއްވި ކަމަށެވެ. އަދި އޭނާއަކީ ޑިމޮކްރަސީއަށް ކުރިމަތިވެފައިވާ ސީރިއަސް ނުރައްކަލެއްގެ ގޮތުގައި ސިފަކުރެއްވި އެވެ.
"ޑިމޮކްރެޓިކް ޖުމްހޫރިއްޔަތެއްގެ މުސްތަގިއްލު މެންބަރުންގެ ގޮތުގައި ތިއްބެވި ރައްޔިތުންގެ އަމާނާތަށް ޔޫން ވަރަށް ބޮޑު ހިޔާނާތެއްވި،" މޫން ވިދާޅުވި އެވެ.
މަޖިލީހުގައި އޮތް އަގުލަބިއްޔަތު ނަހަމަ ގޮތުގައި ބޭނުންކުރަމުންދާތީ، ކުއްލި ހާލަތު އިއުލާނު ކުރެއްވި ކަމަށް ޔޫން ދެއްކެވި ގިނަ ވާހަކަތައް ކޯޓުން ބޭރުކޮށްލީ ހިޔާލު ތަފާތުވުންތައް ހައްލުކުރުމަށް ގާނޫނީ ގޮތުން އެކަށީގެންވާ ގޮތްތަކެއް އެބަހުރި ކަމަށް ބުނެ އެވެ.
އެ ގައުމުގެ ގާނޫނުއަސާސީ ބުނާ ގޮތުން ކުރިއަށް އޮތް 60 ދުވަހުގެ ތެރޭގައި އަވަސް އިންތިހާބެއް ބާއްވައި ރައީސަކު އިންތިހާބުކުރަން ޖެހެ އެވެ. އާ ރައީސަކު ހުވާ ކުރަން ދެން އެ މަގާމުގެ މަސްއޫލިއްޔަތު އަދާކުރައްވާނީ ބޮޑުވަޒީރު ހަން ޑަކް-ސޫ އެވެ.
