ދެކުނު ކޮރެއާގެ މަރުކަޒީ ބޭންކުން ބިޓްކޮއިން އެ ގައުމުގެ ރިޒާވް އެސެޓެއްގެ ގޮތުގައި ހިމެނުމަށް ނުވިސްނާ ކަމަށް ބުނެފި އެވެ.
ބޭންކް އޮފް ކޮރެއާ (ބީއޯކޭ) އިން ބުނެފައިވަނީ ބިޓްކޮއިންގެ އަގަށް އަންނަ ބޮޑެތި ބަދަލުތަކަކީ ގައުމުގެ އިގްތިސާދީ ސްޓެބިލިޓީއަށް ނުރައްކަލެއް ކަމަށެވެ.
ދެކުނު ކޮރެއާއިން މިގޮތަށް ނިންމާފައި މިވަނީ އެމެރިކާގެ ރައީސް ޑޮނަލްޑް ޓްރަމްޕް ދިގު މުއްދަތަކަށް ބިޓްކޮއިން އަދި އެހެނިހެން ކްރިޕްޓޯ ފައިސާތައް ރިޒާވްގެ ގޮތުގައި ބެހެއްޓުމަށް ނިންމި ތަނާ ދުވަސްކޮޅެއް ފަހުންނެވެ. ބީއޯކޭ އިން ބުނެފައިވާ ގޮތުގައި ކްރިޕްޓޯ އެސެޓެއް ރިޒާވް އެސެޓްގެ ގޮތުގައި ހިމެނުމުގެ ކުރިން ފުންކޮށް ދިރާސާކުރަން ޖެހެއެވެ.
ކޮރެއާ ހެރަލްޑްގެ ރިޕޯޓެއްގައި ބުނެފައިވާ ގޮތުން، މިހާތަނަށް ދެކުނު ކޮރެއާއިން ބިޓްކޮއިން ފޮރިން އެކްސްޗޭންޖް ރިޒާވްގައި ހިމެނުމާ މެދު ވިސްނާފައި ވެސް ނުވެއެވެ. ބިޓްކޮއިނަކީ އެންމެ އަގުބޮޑު ކްރިޕްޓޯ ފައިސާ ކަމަށްވާއިރު، އޭގެ އެންމެ މަތީ އަގު 108،000 ޑޮލަރަށް އަރާފައިވެއެވެ. މިވަގުތު ބައިނަލްއަޤްވާމީ މާރުކޭޓުތަކުގައި ބިޓްކޮއިންގެ އަގު ހުރީ 83،687 ޑޮލަރުގައެވެ.
"ކްރިޕްޓޯ މާރުކޭޓް ހަލަބޮލިވެއްޖެ ހާލަތެއްގައި، ބިޓްކޮއިން ފައިސާއަށް ބަދަލުކުރުމުގެ ޚަރަދު ވަރަށް ބޮޑުތަން އިތުރުވެދާނެ،" ބީއޯކޭ އިން ބުނެފައިވާ ކަމަށް ރިޕޯޓުގައި ބަޔާންކޮށްފައިވެއެވެ.
ބިޓްކޮއިނާ ގުޅޭ ގޮތުން ބީއޯކޭގެ ކަންބޮޑުވުންތައް އިތުރަށް ތަފްސީލުކޮށްދެމުން، އެ ބޭންކުން ފާހަގަކޮށްފައިވަނީ ބިޓްކޮއިން އައިއެމްއެފްގެ މިންގަނޑުތަކާ ނުގުޅޭ ކަމަށެވެ. އައިއެމްއެފްގެ ގައިޑްލައިންތަކުގައި ބަޔާންކޮށްފައިވާ ގޮތުން، ރިޒާވް އެސެޓްތަކުގެ ލިކުއިޑިޓީ، މާރުކޭޓް ވެލިއު އަދި ކްރެޑިޓް ރޭޓިން ދެމެހެއްޓެނިވި ގޮތެއްގައި ހިފަހައްޓަން ޖެހެއެވެ. ނަމަވެސް ކްރިޕްޓޯ ފައިސާތަކަށް މިހާރު މިކަން ކަށަވަރުކޮށްނުދެވެ އެވެ. މިވަގުތު 2.74 ޓްރިލިއަން ޑޮލަރުގެ އަގު ހުރި ކްރިޕްޓޯ ދާއިރާއަށް އިގުތިސާދީ ކުދި އަދި ބޮޑެތި ކަންކަމުގެ އަސަރު ވަރަށް ބޮޑަށް ކުރެ އެވެ.
މި ކަންކަމަށް ރިޢާޔަތްކޮށް، ބީއޯކޭ އިން ބުނެފައިވަނީ ރަން އަދި ފިއެޓް ފައިސާތަކާއެކު ބިޓްކޮއިން ރިޒާވް އެސެޓެއްގެ ގޮތުގައި ހިމެނުމަށް އަދި ވިސްނާފައި ނުވާ ކަމަށެވެ. މިވަގުތު ދެކުނު ކޮރެއާ އަމާޒުކޮށްފައިވަނީ ކުންފުނިތަކުގެ ބައިވެރިވުމާ ގުޅޭ ކްރިޕްޓޯ ގައިޑްލައިންތައް އެކުލަވާލުމަށެވެ. އެ ގައުމުގެ ފައިނޭންޝަލް ސަރވިސަސް ކޮމިޝަން (އެފްއެސްސީ) އިން ފަހުން އިޢުލާނުކޮށްފައިވާ ގޮތުން، މި ގައިޑްލައިންތައް މި އަހަރުގެ އޭޕްރީލް މަހުގެ ތެރޭގައި ނިންމާނެ އެވެ.
ބިޓްކޮއިނަކީ 2009 ވަނަ އަހަރު ތަޢާރަފުކުރެވުނު ފުރަތަމަ ޑިޖިޓަލް ކްރިޕްޓޯކަރަންސީއެވެ. މީގެ ފަހުން ގިނަ ޤައުމުތަކުން ބިޓްކޮއިން އަދި އެހެނިހެން ކްރިޕްޓޯ ފައިސާތަކާމެދު ތަފާތު ސިޔާސަތުތައް ގެންގުޅެމުން އައިސްފައިވެއެވެ. ބައެއް ގައުމުތަކުން މި ފައިސާތައް ޤާނޫނީ ގޮތުން ބަލައިގަންނައިރު، އަނެއްބައި ޤައުމުތަކުން މަނާކުރެއެވެ.
ދެކުނު ކޮރެއާއަކީ ކްރިޕްޓޯ ފައިސާތަކާމެދު ތަންކޮޅެއް ދެކޮޅުވެރި ސިޔާސަތެއް ގެންގުޅޭ ޤައުމެކެވެ. ނަމަވެސް، އެ ޤައުމުގައި ކްރިޕްޓޯ ފައިސާ ބޭނުންކުރުން މުޅިން މަނާކޮށްފައެއް ނުވެއެވެ. މިފަދަ ނިންމުންތަކުން ދައްކުވައިދެނީ ކްރިޕްޓޯ ފައިސާތަކާމެދު ދުނިޔޭގެ އެކި ޤައުމުތަކުގެ ސަރުކާރުތަކުން ދެކޭގޮތް ތަފާތުވާ މިންވަރެވެ.
