ސްރީލަންކާ މޮޓޯރޭސިން ކްލަބުން ބާއްވާ ޑްރެގް ވޯސް މުބާރާތަށް ރާއްޖެގައި ރޭސިންގައި ނަން މަޝްހޫރު އަންސޯލްޓަޑް ރޭސިންގެ ހަމްދޫން ނަސީރް (އޮންޕި) އާއި ހަސަން ފަޔާޒް (ފަޔާ) ބައިވެރިވާ ގޮތަށް ހަމަޖެހިއްޖެ އެވެ.
ލަންކާގެ ކަޓުކުރުނާޑާ ރޭސިންގް ޓުރެކުގައި ޖެނުއަރީ 26، ގައި ބާއްވާ އެ މުބާރާތުގައި ވާދަކުރާ ދިވެހި ދެ އެތުލީޓުން ބައިވެރިވީ 600ސީސީ އާއި 1000ސީސީ ކެޓެގަރީގެ އިވެންތަކުގަ އެވެ.
އަންސޯލްޓަޑް ރޭސިން އިން ބުނީ މުބާރާތުގައި ކްލަބުގެ ނަމުގައި އެ ދެ އެތުލީޓުން ބައިވެރިވި ނަމަވެސް، އެތުލީޓުން ތަމްސީލު ކުރާނީ ރާއްޖެ ކަމަށާއި އެތުލީޓުން ރާއްޖެ އަށް ރީތި ނަމެއް ހޯދައި ދިނުމަށް މަސައްކަތް ކުރާނެ ކަމަށެވެ.
ރޭސިން އެސޯސިއޭޝަނުގެ އިތުރުން ސްޕޯޓްސް މިނިސްޓްރީން މުބާރާތުގައި ކްލަބު ވާދަކުރުމަށް ދޭން ޖެހޭ ފުރިހަމަ އެއްބާރުލުންދީ އެހީތެރިވިކަން އަންސޯލްޓަޑް ރޭސިއިން ފާހަގަކުރި އެވެ.
މީގެ ކުރިން ލަންކާގެ އިތުރުން ތައިލެންޑުގައި ބޭއްވި އެކި ރޭސިން މުބާރާތްތަކުގައި ރާއްޖޭގެ އެތުލީޓުން ވަނީ ވާދަކޮށް ވަނަތައް ވެސް ހޯދާފަ އެވެ.
އެ ގޮތުން ތައިލެންޑުގައި 2022 ގައި އޮތް ޑްރޭގް ރޭސްއެއްގައި ރާއްޖޭގެ ކްލަބް 30 މޮޓޯ ސްޕޯޓްސްގެ އަލީ އައިމަން ވަނީ ވާދަކޮށް ހަތަރު ވަނަ ހޯދާފަ އެވެ.
ރޭސިން އަށް ލޯބިކުރާ ގިނަ އެތުލީޓުން ރާއްޖޭގައި ތިބިއިރު، ރޭސިންގައި އުޅޭ ޒުވާން އެތުލީޓުންގެ އެންމެ ބޮޑު ޝަކުވާއަކީ އެ އެތުލީޓުން ފަރިތަކޮށް މުބާރާތްތައް ކުރިއަށް ގެންދަން ރޭސިން ޓްރެކެއް ނެތުމެވެ.
ލަންކާ ރޭހަށް ފުރާ ދެ ރައިޑަރުންނަށް ފަރިތަކުރާނެ ގޮތެއް ހަމަ ނުޖެހުނު ކަމަށާއި މިދިޔަ މަހު ހުރިހާ ކަމެއް ހަމަޖެހި ބާއްވަން ތައްޔާރުވި އިވެންޓް ފަހު ގަޑީ ކެންސަލްކޮށްލުން ވެގެން ދިޔައީވެސް އެތުލީޓުން ފަރިތަކޮށްލަން ލިބުނު ފުރުސަތު ގެއްލުނު ކަމެއްކަން އަންސޯލްޓަޑް ރޭސިން އިން ފާހަގަކުރި އެވެ.
ރޭސިން އެސޯސިއޭޝަނުގެ ނައިބުރައީސް ޝަރުވާން ޝަރީފް ވިދާޅުވީ ކުޅިވަރެއްގައި ކުރިއަރަން އޮތް ފުރުސަތު ގެއްލުވާލައިގެން ނުވާނެ ކަމަށާއި ސަރުކާރުން ޒުވާނުންނަށް ދެނީ ވަރަށް ގޯސް މެސެޖެއް ކަމަށެވެ.
"ކުރިޔަށް ދާން ބޭނުންވާ ކުޅިވަރުގައި ކުރިޔަށް ދެވެން ނެތީޔާ ދިރިއުޅުމުގައި ކޮންމެވެސް ކަމެއް ހިޔާރު ކުރާނެ. އެހެން ކުރާ އިރު ގިނަ ފަހަރު ދަނީ ހެޔޮ މަގުން ކައްސާލައިގެން މިއީ އަޅުަގަނޑުމެން ދެކެން ބޭނުންވާ ދުވަހެއް ނޫން،” އޭނާ ވިދާޅުވި އެވެ.
ރޭސިން އެސޯސިއޭޝަންގެ ކަންބޮޑުވުންތަކަށް ހައްލު ހޯދަން އެ އެސޯސިއޭޝަނުން ސަރުކާރާ އެކު މަޝްވަރާތައް ކުރި ނަމަވެސް، މިހާތަނަށް އެއްވެސް ހައްލެއް ލިބިފައެއް ނުވެ އެވެ.
މި މުބާރާތަށް ފުރާގޮތަށް ހަމަޖެހިފައިވަނީ، މި މަހުގެ 21 ވަނަ ދުވަހު އެވެ.
