ސަރުކާރުގެ އެއްބާރުލުން ނުލިބޭތީ ރާސް ޗެމްޕިއަންޝިޕް މާލެ އެޑިޝަން މުއްދަތެއް ނެތް ގޮތައް ފަސް ކުރަން ޖެހިފައިވާކަމަށް ރޭސިން އެސޯސިއޭޝަން އޮފް މޯލްޑިވްސް އިން ބުނެފި އެވެ.
ރޭސިން އެސޯސިއޭޝަނުން ނެރުނު ބަޔާނެއްގައި ބުނީ މިދިޔަ ދެ މަސްދުވަހު އެ މުބާރާތް ބޭއްވުމަށް ގިނަ މަސައްކަތްތަކެއް އެ އެސޯސިއޭޝަނުން ކޮށްފައިވާ ކަމަށެވެ. އެކަމަކު, ސަރުކާރުން ލިބެންޖެހޭ ހުއްދަތައް ލިބިފައިނުވާ ކަމަށެވެ. އަދި މި ހުއްދަތައް ލިބިފައި ނުވަނީ މިދިޔަ މަސްތަކުގައި މާލެ ސަރަހައްދުގައި ހިނގި ނުރައްކާތެރި އެކްސިރެންޓްތަކުގެ ސަބަބުން ކަމަށާއި, އެކަމަކު މި އެކްސިރެންޓް ތަކަކީ މި މުބާރާތާ ގުޅުންހުރި އެކްސިރެންޓްތަކެއް ނޫން ކަމަށް ރޭސިން އެސޯސިއޭޝަނުގެ ބަޔާނުގައި ފާހަގަކޮށްފައިވެ އެވެ.
ރޭސިން އެސޯސިއޭޝަނުގެ ބަޔާނުގައި އިތުރަށް ބުނީ ރޭސިން ކުޅިވަރު ކުރިއެރުވުމަށް މިއަށްވުރެ ބޮޑު ސަމާލުކަމެއް ސަރުކާރުގެ ފަރާތުން ބޭނުންވާ ކަމަށާއި, ރާސް ޗެމްޕިއަންޝިޕަކީ ރޭސިން އަށް ލޯބިކުރާ އެތުލީޓުންނަށް އެ އެތުލީޓުންގެ ހުނަރު ދައްކާލުމަށް ލިބޭ ފަހި ފުރުސަތެއް ކަމަށެވެ.
ރޭސިން އެސޯސިއޭޝަނުން ބުނީ މި މުބާރާތް ބޭއްވުމަށް ކުރަން ޖެހޭ މަސައްކަތްތަކާ ހުއްދަތަކެއް ހޯދުމުގެ މަސައްކަތް އަދިވެސް އެ އެސޯސިއޭޝަނުން ހުއްޓުމެއް ނެތި ކުރަމުން އަންނަ ކަމަށެވެ.
