ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ މެޔަށް ތަދެއް އަރައިގެން ފަރުވާދޭން ފަށައިފި އެވެ.
މަޖިލީހުގެ އަމީންއާންމު އައިމިނަތު ނިއުޝާ "އަދަދު" އަށް ވިދާޅުވީ އަބްދުއްރަހީމަށް މިވަގުތު ފަރުވާދެމުންދަނީ ދަރުމަވަންތަ ހޮސްޕިޓަލުގައި ކަމަށެވެ. އަދި އެމަނިކުފާނުގެ ހާލު މިހާރު ސްޓޭބަލް ކަމަށް ވެސް އޭނާ ވިދާޅުވި އެވެ.
މިރޭގެ ވަގުތެއްގައި އަބްދުއްރަހީމް ހޮސްޕިޓަލުން ދޫކޮށްލާނެ ކަމަށް މައުލޫމާތު ލިބިިފައިވާ ކަމަށް ވެސް ނިއުޝާ ވިދާޅުވި އެވެ.
މި ނޫހަށް މައުލޫމާތު ލިބިފައިވާ ގޮތުގައި އަބްދުއްރަހީމަށް ސިއްހީ ހާލަތެއް މެދުވެރިވީ މިއަދު ހަވީރު ސަރުކާރުގެ އިސް ފަރާތްތަކަކާއެކު ކުރިއަށްދިޔަ ބައްދަލުވުމެއްގައި ހުންނަވަނިކޮށެވެ.
އަބްދުއްރަހީމްއަކީ ހާޓް ޕޭޝަންޓެކެވެ. އޭނާގެ ހިތުގެ ހިނގުން ރަނގަޅު ކުރަން ހުންނަނީ ޕޭސްމޭކާއެއް ލައްވައިފަ އެވެ. ޕޭސްމޭކާއަކީ ހާޓް ރޭޓާއި ރިދަމް ރެގިއުލޭޓް ކުރަން ލައްވާ އިލެކްޓްރޯނިކް ޑިވައިސްއެކެވެ.
އަބްދުއްރަހީމް މީގެ ކުރިންވެސް ވަނީ މެޔަށް ތަދު އަރައިގެން އެކި ފަހަރުމަތިން ހޮސްޕިޓަލުގައި އެޑްމިޓުކޮށް ފަރުވާދީފަ އެވެ. އަދި އެމަނިކުފާނުގެ ހިތުގެ މައްސަލަތަކަކަށް ފަރުވާ ހޯދި ކަމަށް ވެސް މީގެ ކުރިން ރާއްޖޭގެ އެކި ނޫސްތަކުން ރިޕޯޓުކޮށްފައިވެ އެވެ.
މަޖިލީހުގެ ރައީސް އަބްދުއްރަހީމަކީ މިވަގުތު ރާއްޖޭގައި ހުރި އެންމެ ދުވަސްވީ ސިޔާސީ އެއް ލީޑަރެވެ. އެގޮތުން މިދިޔަ ދައުރުގައި ޕީއެންސީ ކޯލިޝަނު އިދިކޮޅުގައި އޮތްއިރު އެ ޕީޕީއެމް އަދި ޕީއެންސީ ހިންގެވުމުގެ އެންމެ އުހުގައި ގިނަ ދުވަސްތަކެއް ވަންދެން ހުންނެވީ އެމަނިކުފާނު އެވެ.
