މޯލްޑިވްސް މީޑިއާ ކައުންސިލުގެ 10 މެންބަރެއްގެ ދައުރު ހަމަވާތީ އެ މަގާމުތަކަށް ކުރިމަތިލާން ފުރަތަމަ ހުޅުވާލި މުއްދަތު ހަމަވިތާ މަހެއްހާ ދުވަސް ފަހުން، ބައެއް މީޑިއާތަކުން އެދިގެން ކަމަށް އަނެއްކާވެސް އެ މަގާމުތަކަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.
ޔޫތު މިނިސްޓްރީމް އެމްއެމްސީގެ މެންބަރު ކަމަށް ކުރިމަތިލުމަށް ފުރުސަތު ހުޅުވާލާ ފުރަތަމަ އިއުލާނު ގެޒެޓުކުރީ ސެޕްޓެމްބަރު 16، ގަ އެވެ. އެ އިއުލާނުގައި ސުންގަޑިއެއްގެ ގޮތުގައި އޮތީ ސެޕްޓެމްބަރު 25، އެވެ.
ނަމަވެސް، އެ އިއުލާނު ބާތިލުކުރުމެއްނެތި އޭރު ކުރިމަތިލީ މީހުން އަލުން ކުރިމަތިލާން ނުޖެހޭ ގޮތަށް އިތުރު މީހުންނަށް ފުރުސަތު ހުޅުވާލައި، ޔޫތު މިނިސްޓްރީން އިއުލާނުކުރީ މިއަދެވެ. އިތުރު ފުރުސަތު ދިން ސަބަބެއް ކަމުގައި ބުނީ މުއްދަތު އިތުރުކޮށްދިނުމަށް މީޑިއާ ތަކުން އެދެމުން ދިޔުމެވެ. މިހާރު ސުންގަޑިއަކަށް އޮތީ އޮކްޓޯބަރު 29، އެވެ.
އެކަމާ ގުޅިގެން އިއުލާނުގައި އިތުރު ތަފުސީލު ދޭނެ ކަމަށް ބުނެފަ އިން ނަންބަރަށް މި ނޫހުން ގުޅުމުން، މުއްދަތު އިތުރުކުރަން އެދުނު މީޑިއާތަކުގެ އަދަދާއި މުއްދަތު އިތުރުކުރީ ކޮން އުސޫލެއްގެ ދަށުންކަން ހާމަކުރަން މިނިސްޓްރީގެ އޮފިޝަލުން ވަނީ ދެކޮޅު ހަދާފަ އެވެ.
ކުރިމަތިލުމުގެ އިތުރުން، މީޑިއާ ކައުންސިލް އިންތިހާބުގައި ވޯޓުލުމަށް ހުށަހެޅުމަށް އޮތް މުއްދަތު ވެސް ވަނީ ޔޫތު މިނިސްޓްރީން އިތުރުކޮށްފަ އެވެ. މިއަދާ ހަމައަށް ކުރިން އޮތް އެ ފުރުސަތު ވެސް މިހާރު ވަނީ އޮކްޓޯބަރު 30، ގެ ރަސްމީ އޮފީސް ގަޑިއާ ހަމައަށް އިތުރުކޮށްފަ އެވެ.
މީޑިއާ ކައުންސިލުގެ ދައުރަކީ މީލާދީ ގޮތުން ދެ އަހަރެވެ. އަދި, ކައުންސިލުކަމުގައި ދެ ދައުރު ޖެހިޖެހިގެން އެއް މެންބަރަކަށް އަދައެއް ނުކުރެވޭނެ އެވެ. މީޑިއާ ކައުންސިލްގެ މެމްބަރުންގެ އަދަދަކީ 15 އެވެ.
