ސެޓްލައިޓް ބޭނުންކޮށްގެން ރާއްޖޭގެ ކަނޑުގެ ސަރަހައްދު ބެލެހެއްޓޭނެ ނިޒާމެއް ވަރަށް އަވަހަށް ގާއިމުކުރެވޭނެ ކަމަށް ޑިފެންސް މިނިސްޓަރު މުހައްމަދު ގައްސާން މައުމޫން ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމް އިން ރޭ ގެނެސްދިން ޕްރޮގްރާމެއްގައި ވާހަކަ ދައްކަވަމުން ގައްސާން ވިދާޅުވީ، މި ނިޒާމު ގާއިމުކުރުމަށް އެ ވުޒާރާއެކު މަސައްކަތް ކުރަމުންދަނީ މޯލްޑިވްސް ސްޕޭސް ރިސާޗް އޮގަނައިޒޭޝަން އިން ކަމަށެވެ. އެ ފަރާތްތަކުން އެމެރިކާގެ ނާސާ އާއެކުވެސް މަސައްކަތް ކުރަމުންދާ ކަމަށް ދިފާއީ ވަޒީރު ވިދާޅުވި އެވެ.
"މި މަސައްކަތުގެ ތެރެއިން އަޅުގަނޑުމެން މި ބަލަނީ ދިވެހިރާއްޖޭގަ އަޅުގަނޑުމެންގެ މެރިޓައިމް ޑޮމައިން އެވެއާނެސް. ވާހަކައަކީ، އަޅުގަނޑުމެންގެ މުޅި ސަރަހައްދު ބެލުމުގެ މަސައްކަތް ވަރަށް ކައިރި މުސްތަގުބަލެއްގެ ތެރޭގަ ސެޓްލައިޓް މެދުވެރިކޮށް ބެލޭނެ ނިޒާމެއްވެސް ގާއިމުކުރަން،" ގައްސާން ވިދާޅުވި އެވެ.
އޭނާ ވިދާޅުވީ މިއީ ރާއްޖޭގެ ބައިނަލްއަގުވާމީ ޒިންމާ އަމިއްލައަށް އުފުއްލާ އެހެން ގައުމުތަކަށް ވެސް ރާއްޖޭގެ ސަރަހައްދަކީ ސުލްހަވެރި ތަނަކަށް ހެދުމަށް ރައީސް މުއިއްޒު ބޭނުންވާތީ އެކަން ހާސިލްކުރުމަށް ކުރެވޭ މަސައްކަތެއް ކަމަށެވެ.
ރާއްޖޭގެ ކަނޑުގެ ސަރަހައްދު ބައިނަލްއަގުވާމީ ދުނިޔެއަށް މުހިންމު ވަނީ ރާއްޖޭގެ އުތުރުން އޮންނަ 8 ޑިގްރީ ޗެނަލް މެދުވެރިކޮށް މުދާ އުފުލާ ގިނަ ބޯޓުތައް ދަތުރުކުރާތީ ކަމަށާއި އެ ވިޔަފާރިތަކަށް އަމާޒުކޮށް ކުށްވެރިން ރޭވުންތައް ރާވާ ކަމަށްވެސް ގައްސާން ވިދާޅުވި އެވެ.
"ރައީސުލްޖުމްހުރިއްޔާގެ ވިސްނުންފުޅު ހުރީ، އަޅުގަނޑުމެންގެ ތެރެއަށް އަންނަ މި ދެންނެވި މުއާމަލާތްތައް ހިނގާ ކަނޑުގެ ސަރަހައްދު ބެލެހެއްޓުން އެއީ އަޅުގަނޑުމެން އަމިއްލަ ގާބިލިއްޔަތު އިތުރުކޮށް ކުރާ މަސައްކަތެއް ކަމުގަ ހަދަން."
މި އަހަރު ކުރީކޮޅު ދައުލަތުން ބޮޑު ހަރަދެއް ކޮށްގެން ތުރުކީން ގަތް ޑްރޯންތަކަކީ ވެސް މި އަމާޒަށް ވާސިލުވުމަށް ކުރި މަސައްކަތެއް ކަމަށާއި އެ ޑްރޯންތަކުން ހަމަލާދޭން ޖެހިއްޖެ ހާލަތެއްގައި ހަމަލާ ދެވޭނެކަމަށްވެސް އޭނާ ވިދާޅުވި އެވެ.
އެ ޑްރޯންތައް ބޭނުންކޮށްގެން މިހާރު ރާއްޖޭގެ ކަނޑުގެ ސަރަހައްދު ވަރަށް ފުރިހަމައަށް ބެލެހެއްޓޭ ކަމަށާއި ރައީސްގެ ވިސްނުން ހުރީ އެކަން އިތުރަށް ފުޅާކުރަން ކަމަށްވެސް އޭނާ ވިދާޅުވި އެވެ. ނަމަވެސް ތުރުކީން ގެނައި ޑްރޯންތަކާއެކު ރާއްޖޭގެ ކަނޑުގެ 900،000 އަކަކިލޯމީޓަރުގެ ސަރަހައްދު 24 ގަޑިއިރު ބެލެހެއްޓޭނެ ކަމަށް ރައީސް މުއިއްޒު މީގެ ކުރިން ވިދާޅުވެފައިވެ އެވެ.
