ސަރުކާރު ކުންފުނިތަކުގައި ތިބި މީހުން ވަޒީފާތަކުން ވަކިކުރަމުން ދަނީ ހަރަދު ކުޑަކުރުމުގެ ބޭނުމުގައި ނޫން ކަމަށާއި އެކަން ކުރަނީ ސިޔާސީ ބޭނުމެއްގައި ކަމަށް އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސެއިން (ބިގޭ) ރޭ ތުހުމަތުކުރައްވައިފި އެވެ.
މޯލްޑިވްސް ޑިމޮކްރެޓިކް ޕާޓީ އިން ސިލްސިލާކޮށް ބާއްވަމުން އަންނަ "ހަވަރުބެރު" ޕެނަލް ޑިސްކަޝަންގައި ބިގޭ މިހެން ވިދާޅުވީ، އޭނާއަށް މައުލޫމާތު ލިބިފައިވާ ގޮތުގައި، މިހާތަނަށް ސަރުކާރު ކުންފުނިތަކުން 500 އެއްހާ މީހުން ވަޒީފާތަކުން ވަކިކޮށްފައިވާ ކަމަށް ފާހަގަ ކުރައްވަމުންނެވެ. އަދި މި އަދަދަށް މީހުން ވަކި ކުރީ އޭގެ ތިން ގުނަ އިތުރަށް ވަޒީފާތަކަށް މީހުން ނަގާފައި ކަމަށް އޭނާ ވިދާޅުވި އެވެ.
"1500 އެއްހާ މީހުންނަށް ވަޒީފާ ދިން ވާހަކަ އަޅުގަނޑުމެންނަށް އަޑު މި އިވެނީ. އެހެންމަ ދަންނަވަން މިއުޅެނީ ހަރަދު ކުޑަކުރުމުގެ ވިސްނުމުގައެއް ނޫނޭ މިކަން މިކުރައްވަނީކީ،" ބިގޭ ވިދާޅުވި އެވެ.
ހަރަދުތައް ކުޑަކުރުމުގެ ނިވަލުގައި، ވަޒީފާތަކުން މީހުން ކެނޑެމުގެ އަސްލު ބޭނުމަކީ ބިގޭ ވިދާޅުވި ގޮތުގައި ސިޔާސީ ފިކުރު ދިމާ ނުވާ މީހުން ވަޒީފާތަކުން ވަކިކޮށް، ޕީއެންސީގެ ފިކުރުގެ މީހުންނަށް ވަޒީފާ ދިނުމެވެ. މިކަމަށް ބާރު ދޭން، އަދިވެސް އިތުރު ވަޒީފާތައް ދޭން އޮތް ކަމަށް މިފަހުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެފައިވާ ވާހަކަ އޭނާ ފާހަގަކުރެއްވި އެވެ.
އޭގެ އިތުރުން، ވަޒީފާތަކުގައި ބެހެއްޓުމުގެ ޝަރުތަކަށް ޕީއެންސީއަށް ސޮއިކުރަން މަޖުބޫރު ކުރަމުން އަންނަ ކަމަަށް ވެސް ބިގޭ ތުހުމަތުކުރެއްވި އެވެ. އަދި ޕާޓީ ޖަލްސާތަކަށް ހާޒިރުވާށާއި ހާޒިރު ނުވާ މީހުން ބަލައި ފިޔަވަޅު އަޅަމުންދާ ކަމަށް ވެސް އޭނާ ވިދާޅުވި އެވެ.
ބިގޭ މި ތުހުމަތުތައް ކުރެއްވިއިރު، މިފަހުން ފެނަކައިން ހަރަދު ކުޑަކުރުމުގެ ގޮތުން ކަމަށް ބުނެ އެ ކުންފުނީގެ އެކި މަޝްރޫއުތަކަށް ނަގާފައިވާ 731 ކޮންޓްރެކްޓް މުވައްޒަފުން ވަކިކޮށްފައިވެ އެވެ. "އަދަދު" އަށް މައުލޫމާތު ލިބިފައިވާ ގޮތުގައި މީގެ ތެރޭގައި ހިމެނޭ ގިނަ މީހުންނަކީ ރައްޔިތުންގެ މަޖިލީހުގެ އިންތިހާބާ ދިމާކޮށް ވަޒީފާ ދިން މީހުންނެވެ.
