ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 11) - އެމެރިކާގެ ގައުމީ ފުޓްބޯޅަ ޓީމުގެ ކޯޗުގެ މަގާމާ މައުރީސިއޯ ޕޮޗެޓީނޯ ހަވާލުވެއްޖެ އެވެ.
މިދިޔަ ސީޒަނަށް ފަހު ޗެލްސީގެ ކޯޗުކަމުން ވަކިކުރި ޕޮޗެޓީނޯ، 52، އެމެރިކާގެ ކޯޗުކަމާ ހަވާލުވީ ދެ އަހަރުގެ ކޮންޓްރެކްޓެއްގަ އެވެ. އެއީ، 2026 ވަނަ އަހަރު އެމެރިކާ އާއި ކެނަޑާ އަދި މެކްސިކޯގައި ހޯސްޓްކުރާ ފީފާ ވޯލްޑް ކަޕްގެ ނިޔަލަށެވެ.
ޕޮޗެޓީނޯ ބުނީ، އެމެރިކާގެ ކޯޗުކަމާ ހަވާލުވުމަކީ އޭނާ ބޮލުގައި އެޅުނު ބޮޑު ޒިންމާއެއް ކަމަށެވެ.
"މިއީ ހަމައެކަނި ފުޓްބޯޅަ ޓީމަކަށް ކޯޗުކޮށްދޭ ވިސްނުމުގައި ކުރި ކަމެއް ނޫން. އަހަރެން އެހީވާން ބޭނުމީ، މި ގައުމުން ފުޓްބޯޅައިގައި ހާސިލްކުރަން ބޭނުންވާ އުންމީދުތަކަށް،" ޕޮޗެޓީނޯ ބުންޏެވެ.
ޕޮޗެޓީނޯ، އެމެރިކާ ޓީމާ ހަވާލުވިކަން އިއުލާނުކުރީ، އެމެރިކާ އިން އެކުވެރިކަމުގެ މެޗެއްގައި، ނިއު ޒީލެންޑާ ކުޅުމުގެ ކުރިންނެވެ. އެމެރިކާ އާއި ނިއު ޒީލެންޑުން ސިންސިނާޓީގައި ކުޅުނު އެކުވެރިކަމުގެ މެޗުގައި ވަނީ 1-1 އިން އެއްވަރުވެފަ އެވެ. މީގެ ހަތަރު ވަރަކަށް ދުވަސް ކުރިން، އެމެރިކާ އިން ވަނީ އަމިއްލަ ދަނޑުގައި ކެނަޑާ އަތުން 2-1 އިން ބަލިވެފަ އެވެ. މިއީ، 67 އަހަރު ތެރޭ އެމެރިކާ އިން އަމިއްލަ ގައުމުގައި ކެނަޑާ އަތުން ބަލިވި ފުރަތަަމަަ ފަހަރެވެ.
އާޖެންޓީނާ ގައުމީ ޓީމުގެ ކުރީގެ މިޑްފީލްޑަރު، ޕޮޗެޓީނޯގެ ކޯޗިން ކެރިއަރަށް 15 އަހަރު ވަނީ ވެފަ އެވެ. ކުރީގެ މިޑްފީލްޑަރު، ޕޮޗެޓީނޯ ވަނީ، މީގެ ކުރިން، ސްޕެއިނުގެ އެސްޕަންޔޯލާއި އިނގިރޭސި ތިން ކްލަބް ކަމަށްވާ ސައުތެމްޓަން އާއި ޓޮޓެންހަމްގެ އިތުރުން ޗެލްސީ އަދި ފްރާންސްގެ ގަދަބާރު، ޕީއެސްޖީ އަށް ކޯޗުކޮށްދީފަ އެވެ.
