ޓީ20 ވޯލްޑް ކަޕް ކޮލިފައިންގެ އޭޝިއާ ކޮލިފަޔާ އޭ ގައި ރާއްޖޭގެ ގައުމީ ކްރިކެޓް ޓީމުން ކުޅުނު ފުރަތަމަ ދެ މެޗުން މެލޭޝިއާ އާއި ސިންގަޕޫރު އަތުން ބަލިވެއްޖެ އެވެ.
މެލޭޝިއާގައި ކުރިއަށްދާ މި ކޮލިފައިން ފޭސްގައި ހަތް ގައުމަކުން ވާދަކުރެ އެވެ. ރާއްޖޭން ފުރަތަމަ މެޗުގައި އިއްޔެ މެލޭޝިއާ އަތުން ބަލިވީ، 94 ލަނޑުންނެވެ.
ދެ ވަނަ މެޗުގައި، މިއަދު ސިންގަޕޫރު އަތުން ބަލިވީ، 47 ލަނޑުންނެވެ.
އިއްޔެ މެޗުގައި ރާއްޖެ އަށް ޓޯސް ދިމާވުމުން ނިންމީ ހޮވާށެެވެ. އެ ގޮތުން، ފުރަތަމަ އިނިންގްސްގައި މެލޭޝިއާ އިން ކުޅެން އަރައި، 20 އޯވަރުގެ ތެރޭގައި ތިން ކުޅުންތެރިން ނުބައިވިއިރު، 203 ލަނޑު ހެދި އެވެ.
މެލޭޝިއާ އިން އެންމެ ރަނގަޅަށް ކުޅުނީ، 43 ބޯޅައިން 59 ލަނޑު ހެދި ޓީމުގެ ކެޕްޓަން، ސައީދު އަޒީޒް އެވެ. މި އިނިންގްސްގައި ރާއްޖޭގެ، ހަސަން އިބްރާހިމް އާއި ޓީމުގެ ކެޕްޓަން، އަޒްޔާން ފަރުހަތު އަދި ޝުނާން އަލީ ކޮންމެ ކުޅުންތެރިއަކު ވިކެޓެއް ނެގި އެވެ.
ކޮލިފައިންގައި ވާދަކުރާ ގައުމީ ކްރިކެޓް ޓީމުގެ ކުޅުންތެރިން.--- ފޮޓޯ: ކްރިކެޓް ބޯޑް އޮފް މޯލްޑިވްސް
ޖަވާބުގައި ރާއްޖޭން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވިއިރު، ހެދުނީ 109 ލަނޑެވެ. ރާއްޖޭން އެންމެ ރަނގަަޅަށް ކުޅުނީ ޓީމުގެ ވައިސް ކެޕްޓަން، އާދަމް ނާސިފް އުމަރު އެވެ. އޭނާ ވަނީ 32 ބޯޅައިން 46 ލަނޑު ހަދައިފަ އެވެ. އަޒްޔާން ވަނީ، 37 ބޯޅައިން 25 ލަނޑު ހަދައިފަ އެވެ.
މިއަދު ސިންގަޕޫރުން ރާއްޖެއާ ދެކޮޅަށް ކުޅުނު މެޗުގައި ޓޮސް ދިމާވުމުން، ނިންމީ ކުޅެން އަރާށެވެ. ސިންގަޕޫރަށް 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން ހެދުނީ 153 ލަނޑެވެ.
ސިންގަޕޫރު ޓީމަށް އެންމެ ރަނގަޅަށް ކުޅެދިން، ސުރެންދަރަން ޗަންދްރަމޯހަން ވަނީ 36 ބޯޅައިން 40 ލަނޑު ހަދައިފަ އެވެ. މި އިނިންސްގައި ރާއްޖޭގެ، ލީމް ޝަފީގް، އާދަމް އަދި ހަސަން، ކޮންމެ ކުޅުންތެރިއަކު ދެ ވިކެޓް ނެގިއިރު، ޝުނާން ވަނީ އެއް ވިކެޓް ނަގައިފަ އެވެ.
ޖަވާބުގައި ރާއްޖޭން ކުޅެން އަރައި، 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ރާއްޖެ އަށް ހެދުނީ 106 ލަނޑެވެ. އެންމެ ރަނގަޅު ކުޅުމެއް ދެއްކީ، ނުބައިނުވެ، 25 ލަނޑު ހެދި މުހައްމަދު ޝިޔާމް އާއި 14 ބޯޅައިން 20 ލަނޑު ހެދި އިސްމާއިލް އަލީ އެވެ. އަޒްޔާން ނުބައިވީ، ހަތް ބޯޅައިން ފަސް ލަނޑު ހަދާފައިވަނިކޮށެވެ.
ކޮލިފައިންގައި ރާއްޖެ ދެން ކުޅޭ މެޗުގައި، ހޯމަ ދުވަހު ކުޅޭނީ ކުވެއިތުއާ އެވެ. އަދި އަންގާރަ ދުވަހު، ހޮންގް ކޮންގާ ކުޅުމަށް ފަހު، އެއް ދުވަހުގެ ބްރޭކެއް ލިބޭނެ އެވެ. އެ ބްރޭކަށް ފަހު ފުރަތަމަ މެޗުގައި، މިޔަންމާއާ ކުޅުމަށް ފަހު ކޮލިފައިން ފަހު މެޗުގައި ބައްދަލުކުރާނީ، މޮންގޯލިއާއާ އެވެ.
މި ހަތް ގައުމުގެ މެދުގައި، ކުޅޭ ކޮލިފައިން ލީގު ބުރަށް ފަހު، އެންމެ ގިނަ ޕޮއިންޓް ހޯދާ ދެ ޓީމެއް، ރީޖަނަލް ފައިނަލް ބުރަށް ހޮވޭނެ އެވެ. ރީޖަނަލް ފައިނަލުގައި، މުޅި އޭޝިއާ އިން ނުވަ ޓީމެއް ވާދަކުރާނީ، ޓީ20 ވޯލްޑް ކަޕުން އޭޝިއާ ލިބޭ ފަހު ދެ ޖާގަ އަށެެވެ.
