އިޒްރޭލުން ފަލަސްތީނުގައި ހިންގަމުންދާ ގަތުލްއާންމާ ދެކޮޅަށް އަޑު އުފުލަމުންދިޔަ އާއިޝަތު ޝާދިޔާ އާއި ޑރ. ޝަޒްރާ އިބްރާހީމް ހައްޔަރުކުރުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކުށްވެރިކޮށް، އެ ދެމީހުން ދޫކޮށްލަން ގޮވާލައިފި އެވެ.
އެމްޑީޕީން ބުނީ ހިޔާލު ފާޅުކުރުމުގެ މިނިވަންކަމަކީ ގާނޫނު އަސާސީން ކޮންމެ މީހަކަށް ކަށަވަރުކޮށްދީފައިވާ ހައްގަކަށްވާއިރު، އިސްލާމް ދީނުގެ އަސްލަކާ ހިލާފު ނުވާ ގޮތަށް ކޮންމެ މީހަކަށް ހިޔާލު ފާޅު ކުރުމުގެ މިނިވަންކަން ލިބެންޖެހޭނެ ކަމަށެވެ.
"ފަލަސްތީނުގެ ރައްޔިތުންނާ ދެކޮޅަށް ހިންގަމުން ގެންދާ ލާއިންސާނީ އަނިޔާވެރި ޖަރީމާތަކާ ދެކޮޅަށް މެދުކެނޑުމެއްނެތި އަޑުއުފުއްލަވަމުން ގެންދެވި އާއިޝަތު ޝާދިޔާ އާއި ޑރ.ޝަޒްރާ އިބްރާހީމް ހައްޔަރުކޮށްފައިވާތީ ކަންބޮޑުވުން ފާޅުކުރަން،" އެމްޑީޕީން ބުންޏެވެ.
އެ ދެ މީހުން ހައްޔަރުކުރީ ފަލަސްތީނުގެ ރައްޔިތުންގެ ހައްގުގައި ހިޔާލު ފާޅުކުރަނިކޮށްކަން ފާހަގަކޮށް އެމްޑީޕީން ބުނީ ހިޔާލުފާޅު ކުރުން ހުއްޓުވުމަކީ ހުއްދަ ކަމެއް ނޫން ކަމަށެވެ.
އޭގެ އިތުރުން، ހިޔާލުފާޅު ކުރުމުގެ މިނިވަންކަމަށް ހުރަސް އެޅުމަށް ހަބަރު ފަތުރާ ވެބްސައިޓުތައް ބަންދުކުރުމާއި، ނޫސްތަކާ ދެކޮޅަށް މައްސަލަ ހުށަހެޅުމާއި، މީހުންގެ ސިޔާސީ ވިސްނުމަށް ބަލައި އެކަހެރިކުރުން ފަދަ އަމަލުތައް ތަކުރާރުކޮށް ސަރުކާރުން ކުރަމުންދާތީ އެމްޑީޕީން ވަނީ ކަންބޮޑުވުން ފާޅުކޮށްފަ އެވެ.
"ފަލަސްތީނުގެ ރައްޔިތުންގެ ހައްގުގައި ކަމަށް ބުނެ މިސަރުކާރުން ހިންގި އެއްވެސް އަމަލެއްގައި އިހުލާސްތެރިކަމެއް ނެތްކަން، މިހާތަނަށް މިސަރުކާރުން އަމަލު ކޮށްފައިވާ ގޮތަށް ބެލުމުން ވެސް ހާމަވޭ،" އެމްޑީޕީން ބުންޏެވެ.
އެމްޑީޕީން ބުނީ ފަލަސްތީނަށް އެހީ ފޮނުވުމުގައި އާއި ބައިނަލްއަގުވާމީ މުޖުތަމައުގައި އަޑުއުފުލުމުގައި އަދި ފަލަސްތީނުގެ ހައްގުގައި އަޅާނެ ކަމަށް އިއުލާނުކުރި ފިޔަވަޅުތައް އެޅުމުގައި ވެސް މި ސަރުކާރުގެ ފަރާތުން ފެންނަނީ ފަހަތުފަޔަށް ބުރަވުމާއި އިހުމާލުތައް ކަމަށެވެ.
ފަލަސްތީނުގެ ރައްޔިތުންނާމެދު ދިވެހި ކޮންމެ ރައްޔިތެއްގެ ހިތުގައި އޮންނަ ހަމްދަރުދީއަކީ ރާއްޖޭގެ ރައްޔިތުންގެ އާންމު ޖަޒުބާތުކަން ފާހަގަކޮށް އެމްޑީޕީން ބުނީ އެ ޖަޒުބާތުގައި ދިވެހިންގެ ތެރެއިން ބަޔަކު ކުރާ ގާނޫނު ހުއްދަކުރާ އަމަލެއްގެ ސަބަބުން ހިފައި ހައްޔަރުކުރެވުމަކީ ބަލައިގަނެވޭނޭ ކަމެއް ނޫން ކަމަށެވެ.
