ޕީއެންސީގެ ޖަގަހަ ޖަލްސާ ބާއްވާތީ ބޮޑު ތަކުރުފާނުގެ ބައެއް ބަންދުކޮށް މުޅި އެ ސަރަހައްދުގެ ޓްރެފިކް ކޮންޓުރޯލު ކުރަން ފުލުހުން ނިންމައިފި އެވެ.
އެކްސްގައި ފުލުހުން ކުރި ޕޯސްޓެއްގައި ބުނީ ބޮޑުތަކުރުފާނު މަގުގައި ހުންނަ ޕީއެންސީ ޖަގަހައިގެ ކުރިމަތި މިރޭ 7:30 އިން ފެށިގެން މިރޭ އެ ޖަގަހައިގައި އޮންނަ ޖަލްސާ ނިމެންދެން ބަންދު ވާނެ ކަމަށެވެ.
އޭގެ އިތުރުން ކާނިވާ ސަރަހައްދުގައި ހުންނަ ޕެޓްރޯލް ޕަމްޕާ ހަމައިން ފެށިގެން ގޮސް ރާޅުގަނޑު ކައިރިން ލަނބާލައިގެން ގޮސް ބޮޑުފުންގަނޑު މަގާ ހަމައަށް ބޭރުމަގުގެ ޓްރެފިކް ކޮންޓްރޯލް ކުރާނެ ކަމަށް ފުލުހުން ބުނެފައިވެ އެވެ.
މަޖީދީ މަގާއި ހެންވޭރު ބޯޅަ ދަނޑުގެ އިރުން އޮންނަ މަގު ހިމެނޭހެން އެ ދެމެދުގައި ހުރި ހުރިހާ ގޯޅިތަކެއްގެ ޓްރެފިކް ވެސް ބަލަހައްޓަމުން ގެންދާނެ ކަމަށް ފުލުހުންގެ ޕޯސްޓުގައި ބުނެފައިވެ އެވެ.
މިރޭގެ ޖަލްސާގައި ރައީސް ޑރ. މުހައްމަދު މުއިއްޒުގެ އިތުރުން ސަރުކާރުގެ އިސް ގިނަ ބޭފުޅުން ބައިވެރިވެވަޑައިގަންނަވަ އެވެ.
މިއީ، މިދިޔަ ހަ އަހަރުގެ ތެރޭގައި ވެސް ޕާޓީއެއްގެ ޖަލްސާއަކަށް މިވަރަށް ސެކިއުރިޓީ ވަރުގަދަ ކުރާ ފުރަތަމަ ފަހަރެވެ. މީގެ ކުރިން، 2013 އިން 2018 އަށް ވެރިކަން ކުރެއްވި ކުރީގެ ރައީސް ޔާމީނުގެ ވެރިކަމުގައި ބައެއް ޖަލްސާތައް ބޭއްވުމަށް މިގޮތަށް ޓްރެފިކް ފްލޯއަށް ބޮޑެތި ބަދަލުތައް ގެނެ އެވެ.
