މި ހިނގާ އޮގަސްޓު މަސް ނިމުމުގެ ކުރިން ބޭނުންކުރެވޭ ޑޮލަރު ރިޒާވުގައި ހުރި ފައިސާ އެއްކޮށް ހުސްވެދާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފިނޭންސް މިނިސްޓްރީއަށް އަންގައިފި އެވެ.
ސަރުކާރާއި އެމްއެމްއޭއިން މި މައުލޫމާތު ރަސްމީކޮށް ކަށަވަރުކޮށް ނުދިން ނަމަވެސް އިތުބާރު ކުރެވޭ މަސްދަރުތަކުން "އަދަދު" ނޫހަށް މައުލޫމާތު ދިން ގޮތުގައި މަރުކަޒީ ބޭންކުން ވަނީ ސިޓީއެއްގެ ޒަރިއްޔާއިން މިކަން ފިނޭންސަށް އަންގާފަ އެވެ.
އެމްއެމްއޭގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި ޖުލައި ނިމުނުއިރު، ޖުމްލަ ޑޮލަރު ރިޒާވު (ގްރޮސް އިންޓަނޭޝަނަލް ރިޒާވު) ގައި ހުރީ 395 މިލިއަން ޑޮލަރެވެ. އޭގެ ކުރީ މަސް ނިމުނުއިރު އެ ރިޒާވުގައި 509 މިލިއަން ޑޮލަރު ހުއްޓެވެ.
ޖުމްލަ ރިޒާވަށް އައި ބޮޑު ބަދަލާއެކީ، ބޭނުންކުރެވޭ ރިޒާވުގައި ހުރި ފައިސާގެ އަދަދު ވަނީ 43 މިލިއަން ޑޮލަރަށް ވެއްޓިފަ އެވެ. މިއީ މަހެއްގެ ޒަރޫރީ އިމްޕޯޓަށް ބޭނުންވާ ވަރަށް ވުރެ ވެސް މަދު އަދަދެކެވެ.
ރިޒާވުގެ ހާލަތު މިހާ ހިސާބަށް ދިޔަ އިރު، މިހާތަނަށް މިކަމާ ގުޅޭ އެއްވެސް މައުލޫމާތެއް ސަރުކާރުން ހާމައެއް ނުކުރެ އެވެ. އެންމެ ފަހުން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ފިނޭންސުގެ އިސްވެރިން ހާޒިރުކޮށްގެން ބޭއްވި ބައްދަލުވުމުގައި ވެސް މިފަދަ އެއްވެސް ކަމެއް ހިއްސާއެއް ނުކުރެ އެވެ.
ރަސްމީކޮށް މައުލޫމާތު ނުދިން ނަމަވެސް، މި ނޫހާ ވާހަކަ ދެއްކި ސަރުކާރުގެ އިސް އޮފިޝަލަކު ބުނީ އެމްއެމްއޭއިން ފޮނުވި ސިޓީއަކީ އެންމެ ގޯސް ހާލަތުގައި ކަންކަން ވެދާނެ ގޮތުގެ ލަފާކުރުމެއް ކަމަށެވެ. އަދި ސަރުކާރުން އެ ހުރިހާ ކަމަކަށް ތައްޔާރަށް އޮތް ކަމަށާއި ކަންބޮޑުވާން ޖެހޭ ވަރުގެ ކަމެއް ނެތް ކަމަަށް އޭނާ ބުންޏެވެ.
ރިޒާވު މި ހާލަތަށް ވެއްޓެން މެދުވެރިވީ ސަބަބުތަކުގެ ތެރޭގައި އިގުތިސާދާ ނުބައްދަލު ހަރަދުތައް ކުރުމުގެ ބޭނުމުގައި ފައިނޭންސް ކުރަން ވިއްކި ސެކިއުރިޓީ އާއި ނެގި ލޯނުތައް އަދާކުރަން ޖެހުމާއި ތެލާއި އެހެނިހެން އިމްޕޯޓަށް ކުރަން ޖެހޭ ހަރަދުތައް ބޮޑުވުން ހިމެނެ އެވެ.
މި އަހަރު ބަޖެޓު ހުށަހަޅައިގެން އެ މަސައްކަތް މަޖިލީހުގައި ކުރިއަށް ދިޔަ އިރު ވެސް މި ހާލަތު ކުރިމަތިވެދާނެ ކަމަށް އެމްއެމްއޭއިން ލަފާކުރި އެވެ. އެއިރު ބަޖެޓު ކޮމިޓީގައި އެމްއެމްއޭއިން ބުނީ މި އަހަރުގެ ޑެފިސިޓު ފޫބައްދަން ބޭނުންވާ ފައިސާ އަހަރުގެ ކުރީކޮޅު ނުހޯދައިފި ނަމަ ދަތިތަކާ ކުރިމަތިވާނެ ކަމަށެވެ.
ސަރުކާރުން އަންނަނީ ޑޮލަރު އާމްދަނީ އިތުރުކުރަން ބައެއް ފީތަކާއި ޓެކްސްތައް ބޮޑުކޮށް، އާ ޓެކްސްތައް ތައާރަފުކުރަން މަސައްކަތް ކުރަމުންނެވެ. ބޮޑުކުރަން ވިސްނަނީ އެއާޕޯޓު ޑިޕާޗާ ފީ އާއި ގްރީން ޓެކްސް އެވެ. އަލަށް ތައާރަފުކުރަން ވިސްނާ އެއް ޓެކްސްއަކީ ބިން ހިއްކަން ވެލިން ނަގާ ޓެކުހެވެ.
