މުސްލިމުންގެ ފުރަތަމަ ގިބުލަ، އަލް އަގްސާ މިސްކިތަށް އިޒުރޭލުގެ ސިހުޔޫނީ ވެރިން ހިމެނޭހެން 2000 އެއްހައި މީހުން އިއްޔެ ހެނދުނު ވަދެގަނެ އެ މިސްކިތުގެ ހުރުމަތް ކެނޑިތާ 24 ގަޑިއިރު ފާއިތުވިފަހުން ދިވެހި ސަރުކާރުން އެކަން ކުށްވެރި ކޮށްފި އެވެ.
އިރުމަތީ ގުދުސްގައި ހުންނަ އަގްސާ މިސްކިތަށް އިއްޔެ ސިހުޔޫނީން ވަދެގަތީ ކޮންމެ އަހަރަކު އެއްފަހަރު ޔަހޫދީން ހިތާމައިގެ ދުވަހެއްގެ ގޮތުގައި ފާހަގަކުރާ ޓިޝާ ބިއާވް ފާހަގަ ކުރުމުގެ ގޮތުންނެވެ.
ޓިޝާ ބިއާވްއަކީ ހިބްރޫ ކަލަންޑަރުގައި އެންމެ ހިތާމަވެރި ދުވަހުގެ ގޮތުގައި ޔަހޫދީން ފާހަގަކުރާ ދުވަހެވެ.
އެ މީހުން ގަބޫލު ކުރާ ގޮތުގަައި އެ ދުވަހަކީ ބާބިލުގެ އަހުލުވެރިންގެ އަތް ދަށަށް ގުދުސް ދިޔައިރު، ސުލައިމާނު އަލައިހިއްސަލާމް ބިނާ ކުރެއްވި ފުރަތަމަ ފައްޅި ތަޅާލި ދުވަހެވެ. އޭގެ ފަހުން ރޯމަނުންގެ އަތް ދަށަށް ގުދުސް ދިޔައިރު، ދެވަނަ ފައްޅި ތަޅާލީ ވެސް އެ ދުވަހު ކަމަށް ޔަހޫދީން ގަބޫލު ކުރެ އެވެ.
އަގުސާ މިސްކިތަށް ވަދެގަތުން ކުށްވެރިކޮށް ރާއްޖެއިން ނެރުނު ބަޔާނުގައި ބުނީ އަގްސާ މިސްކިތަށް ވަދެގަތުމަކީ މުސްލިމު އުއްމަތުގެ އެންމެ މަތިވެރި އެއްތަނުގެ ހުރުމަތް ކަނޑައިލުން ކަމަށާއި، އެކަން ހަރުކަށި އިބާރާތުން ކުށްވެރި ކުރާ ކަމަށެވެ.
"ތަކުރާރުކޮށް އިޒުރޭލުން އަލް އަގްސާ މިސްކިތަށް ވަދެގަނެ ހިންގަމުންދާ އަމަލުތަކުގެ ސަބަބުން ސަރަހައްދީ ހަމަޖެހުން ގާއިމު ކުރުމަށް އޮތް އުއްމީދަށް ހުރަސް އެޅޭ، އެކަމާ މެދު ރާއްޖެއިން ވަރަށް ކަންބޮޑުވޭ،" ރާއްޖެއިން ނެރުނު ބަޔާނުގައި ބުންޏެވެ.
އިޒުރޭލު ކަނާތު ފިޔައިގެ ނެޝަނަލް ސެކިއުރިޓީ މިނިސްޓަރު، އިޓަމާ ބެން ގްވިރް އިސްކޮށް ހުރެ އިއްޔެ ލީޑު ކުރި ހަރަކާތުގައި އަގްސާ މިސްކިތަށް ވަދެގަތް މީހުން އެ މިސްކިތުގެ ތެރޭގައި ޔަހޫދީންގެ އަޅުކަން ވެސް ކުރި އެވެ. އެ މީހުން އަގްސާ މިސްކިތުގެ ގޯތި ތެރެއަށް ވަދެގަތީ ޔަހޫދީ ފުލުހުންގެ ހިމާޔަތުގަ އެވެ.
މިސްކިތުގެ ތެރޭގައި ހުރެ ބެން ގްވިރް އާންމު ކުރި ވީޑިއޯއެއްގައި ބުނީ ހަމާސް ނައްތާލާނެ ކަމަށެވެ.
އަގްސާ މިސްކިތަކީ މުސްލިމުންގެ އެންމެ މުގައްދަސް އެއް މިސްކިތެވެ.
އަގްސާ މިސްކިތަށް އިއްޔެ ސިހުޔޫނީން ވަދެގަނެ ހިންގި އަމަލުތައް ކުށްވެރިކޮށް މުސްލިމު އުއްމަތުގެ ހުރިހާ ގައުމަކުންހެން އިއްޔެ ކަންބޮޑުވުން ފާޅުކޮށް އެކަން ކުށްވެރި ކުރި އެވެ.
ރާއްޖެއިން މިއަދު ނެރުނު ނޫސް ބަޔާނުގައި ބުނީ ރާއްޖޭގެ ރައްޔިތުންނާއި ސަރުކާރު އަބަދުވެސް އޮންނާނީ ފަލަސްތީނުގެ ރައްޔިތުންނާ އެކުގައި ކަމަށެވެ. އަދި، ފަލަސްތީނުގައި ހިނގަމުންދާ ހަމަނުޖެހުމަށް ދާއިމީ ހައްލެއް ހޯދަން މަސައްކަތް ކުރަން ބައިނަލްއަގުވާމީ މުޖުތަމައުއަށް ރާއްޖެއިން ގޮވައިލި އެވެ.
