އިންޑިއާ މާކެޓު ދަށްވީ އިންޑިއާ އައުޓް ހަރަކާތުގެ ސަބަބުން ކަމަށް މޭރުންވާ ފަދަ ގޮތަކަށް ވާހަކަދައްކަވައި، އިންޑިއާ އާ ދެކޮޅު ވިސްނުމަކީ ރައީސް ޔާމީނުގެ ވިސްނުން ކަމަށް ޓޫރިޒަމް މިނިސްޓަރު، އިބްރާހިމް ފައިސަލް ވިދާޅުވެއްޖެ އެވެ.
އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް މިދިޔަ މަހުގެ 31 އިން މިމަހުގެ ތިންވަނަ ދުވަހާ ހަމައަށް ކުރިއަށް ގެންދިޔަ "ވެލްކަމް އިންޑިއާ" ރޯޑްޝޯތައް ނިންމައިލުމަށް ފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފައިސަލް ވިދާޅުވީ އިންޑިއާ މާކެޓަކީ ރާއްޖެއަށް އެންމެ މުހިންމު އެއް މާކެޓު ކަމަށެވެ.
ނަމަވެސް އިންޑިއާ މާކެޓު ދަށްވީ "ސަބަބުތަކެއް މެދުވެރިވެގެން،" ކަމަށާއި ރައީސް ޑރ. މުހައްމަދު މުއިއްޒުގެ ސަރުކާރުގެ ފޮރިން ސިޔާސަތަކީ "އިންޑިއާ އާ އެކީގައި ހަމަ ވަރަށް ގާތް ގުޅުމެއް ބާއްވައިގެން އަދި ޗައިނާ އާ އެކީގައި ވެސް ވަރަށް ގާތް ގުޅުމެއް، ދުނިޔެއާ ވަރަށް ގާތް ގުޅިގެން" ކުރިއަށް ދިޔުން ކަމަށް ފައިސަލް ވިދާޅުވި އެވެ.
އިންޑިއާ އާ ދެކޮޅަށް ކުރިއަށް ގެންދިޔަ "އިންޑިއާ އައުޓް" ހަރަކާތުގެ ނަން ނުގަނެ، ނުސީދާކޮށް ފައިސަލް ވިދާޅުވީ "އެއީ އަޅުގަނޑުމެންގެ ސްޓޭންޑެއް ނޫން،" ކަމަށާއި "އެއީ ކުރިން އަޅުގަނޑުމެން ތެރޭގައި ހުންނެވި ރައީސްއެއްގެ ވިސްނުން،" ކަމަށެވެ.
އަދި، "މިއަދު އަޅުގަނޑުމެން މިތިބީކީއެއް އެގޮތަކަށް ނޫން،" ކަމަށާއި "މިއަދުގެ ސަރުކާރުގެ ވިސްނުމަކީ އެކަހެރިވުމެއް ނޫން،" ކަމަށް ވެސް ފައިސަލް ވިދާޅުވި އެވެ.
ފައިސަލް އެހެން ވިދާޅުވި ނަމަވެސް އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު މަދުވާން ފެށީ މި ސަރުކާރުގެ ނައިބު ވަޒީރުންތަކެއް އިންޑިއާގެ ބޮޑުވަޒީރު، ނަރެންދުރަ މޯދީއަށް ކުޑައިމީސްކޮށް ފުރައްސާރަ ކުރުމުން ހިލުނު މައްސަލަގަނޑުގަ އެވެ.
އެކަމާ ގުޅިގެން އިންޑިއާގެ މަޝްހޫރު ކުޅިވަރު ކުޅުންތެރިންނާއި ބޮލީވުޑު ފަންނާނުން އިސްނަގައިގެން ރާއްޖެއާ ދެކޮޅަށް ކެމްޕޭނެއް ވެސް ކުރި އެވެ. ނަތީޖާއެއްގެ ގޮތުން އިންޑިއާ ޓްރެވެލް އޭޖެންސީތަކުން ރާއްޖެ ބޮއިކޮޓު ވެސް ކުރި އެވެ.
އެ މައްސަލައިގައި ދެ ގައުމުގެ ޒަމާންވީ ގުޅުމުގައި ލީ ރެނދު ބެއްދުމުގެ މަސައްކަތް ސަރުކާރުން މިހާރު ކުރަމުންދާއިރު، މޯދީއަށް ފުރައްސާރަ ކުރި ތިން ނައިބު ވަޒީރުން އަދިވެސް ތިއްބެވީ މުސާރަ ލިބޭ ގޮތަށް ސަސްޕެންޝަނުގަ އެވެ.
އިއްޔެގެ ބައްދަލުވުމުގައި ވާހަކަދައްކަވަމުން ފައިސަލް އިތުރަށް ވިދާޅުވީ އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް ކުރާ މަސައްކަތުގެ ސަބަބުން އިންޑިއާ މާކެޓު ވަރަށް ބޮޑަށް ކުރިއަރައިގެން ދާނެ ކަމަށެވެ.
"އަޅުގަނޑުމެން މިހެން ހަމަ ތިބެފައި ބުނާ ވާހަކައެއް ނޫނޭ، މިއައީ ރޯޑް ޝޯއެއް ނިންމާފައޭ މިދިޔަ ހަފުތާގައި އިންޑިއާގައި، އެންމެ ވަރުގަދަ ތިން ސިޓީގައި ދެން އަނެއްކާ އަޅުގަނޑުމެން މި ބަލަނީ މި އަހަރު އަދި އިންޑިއާއަށް ދާން، އެހެންވީމާ އޭގެއިތުރުން އަދި އިންފްލުއެންސާސް ސްލެބްރިޓީސް ވެސް ރާއްޖެއަށް ގެނެވި އެ މަސައްކަތް ވެސް ހަމަ ވަރަށް ފުޅާ ދާއިރާއެއްގައި އެބަ ކުރިއަށް ދޭ،" ފައިސަލް ވިދާޅުވި އެވެ.
އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު މިދިޔަ އަހަރާ އަޅާ ބަލާއިރު، އިންތިހާއަށް މަދުކަމަށް އިއުތިރާފުވެވަޑައިގެން ފައިސަލް ވިދާޅުވީ ސަރުކާރުގެ އަމާޒަކީ މިއަހަރު ނިމުމުގެ ކުރިން ރާއްޖޭގެ ފަތުރުވެރިކަމުގެ އެންމެ ވަރުދަގަ ތިން މާކެޓުގެ ތެރޭގައި އިންޑިއާ ހިމެނުން ކަމަށެވެ.
"އަޅުގަނޑުގެ އަމާޒަކީ އިންޑިއާ މާކެޓަކީ ޓޮޕް ތިންވަނައަށް ގެނައުން، މިވަގުތު އަދި މިހައިތަނަށް 71،000 އެއްހައި ފަތުރުވެރިން ރާއްޖެއަށް އައީ އެހެންނަމަވެސް އެއީ މިދިޔަ އަހަރު ދެލައްކައެއްހައި ފަތުރުވެރިން އިންޑިއާ މާކެޓުން އެކަނި ރާއްޖެ އައި،" ފައިސަލް ވިދާޅުވޮ އެވެ.
އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް ކުރިއަށް ގެންދިޔަ ރޯޑް ޝޯ ވަރަށް ކާމިޔާބު ކަމަށް ފައިސަލް ވިދާޅުވި އެވެ. އެގޮތުން ރާއްޖޭ ބޮއިކޮޓު ކުރި ޓްރެވެލް އޭޖެންސީއަކާ ވެސް އެ ރޯޑްޝޯގެ ތެރެއިން ބައްދަލު ކުރި ކަމަށާއި އެ ބައްދަލުވުން ވެސް ވަރަށް ކާމިޔާބު ކަމަށް ފައިސަލް ވިދާޅުވި އެވެ.
އިންޑިއާ އަކީ މިދިޔަ ދެ އަހަރު ވެސް ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރި ގައުމެވެ. ނަމަވެސް މިއަހަރުގެ މިހައިތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދަށް ބަލާއިރު، އިންޑިއާ އޮތީ އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކުރާ ގައުމުތަކުގެ ލިސްޓުގެ ހަ ވަނައިގަ އެވެ.
