ރައްކާތެރިކަމުގެ މިންގަނޑުތަކާ ހިލާފަށް އާތު ލީކޭޖް ސާކިއުޓް ބްރޭކާ (އީއެލްސީބީ) ހަރުނުކުރާ މަގު ބައްތިތައް މިންގަނޑަށް ފައްތަން ހަ މަސް ދުވަހުގެ މުއްދަތެއް ދޭން ޔޫޓިލިޓީ ރެގިއުލޭޓަރީ އޮތޯރިޓީއާއެކު އެއްބަސްވުމަކަށް އާދެވިފައިވާ ކަމަށް ލޯކަލް ގަވަމަންޓް މިނިސްޓަރު އާދަމް ޝަރީފް މިއަދު ވިދާޅުވެއްޖެ އެވެ.
މާލެ ސިޓީ ކައުންސިލަށް އަލަށް އިންތިހާބުވި ކައުންސިލަރުން ހުވާކުރެއްވި ރަސްމިއްޔާތުގައި އާދަމް ޝަރީފް ވިދާޅުވީ މަހެއް ތެރޭގައި މަގުބައްތީގެ މައްސަލަ ހައްލު ކުރުމަށް ކައުންސިލްތަކަށް ޔޫޓިލިޓީ ރެގިއުލޭޓަރީ އޮތޯރިޓީން އެންގުމުން އެކަން ކުރު މުއްދަތެއްގައި ކުރަން ދަތިތައް ދިމާވި ކަމަށެވެ.
"އިރާދަކުރެއްވިއްޔާ ފެނަކަ އާއި ރެގިއުލޭޓަރީ އޮތޯރިޓީ އާއި އަދި ފިނޭންސް މިނިސްޓްރީއާއެކު މަސައްކަތް ކޮށްގެން އަޅުގަނޑުމެން މަސައްކަތް ކުރަމުން މިދަނީ ތިން މަސް ނުވަތަ ހަ މަސް ދުވަހުގެ ތެރޭގައި ޕްލޭނެއް އެކުލަވާލެވި އެ ޕްލޭންގެ ދަށުން ރަށްރަށުގެ މަގުބައްތިތަކުގެ މައްސަލަ ހައްލު ކުރުން،" އާދަމް ޝަރީފް ވިދާޅުވި އެވެ.
އާދަމް ޝަރީފް ވަނީ ކައުންސިލްތަކަށް ދިމާވާ މިފަދަ މައްސަލަތަކަށް ސަރުކާރުން އެކި ތަންތަނާ ގުޅިގެން މަސައްކަތްކޮށް ހައްލު ހޯދައިދޭނެ ކަމުގެ ޔަގީންކަން ދީފަ އެވެ.
މަގު ބައްތިތަކާ ގުޅޭ މައްސަލަ ފެންމަތިވީ ދުވާފަރުވައި މެއި 23، ގައި ހިނގި ހާދިސާއެއްގައި، ޒުވާނަކު ކަރަންޓުގައި ޖެހިގެން، ފަރުވާދެނިކޮށް މަރުވުމާ ގުޅިގެންނެވެ.
އެކަމާ ގުޅިގެން ފެނަކައިން ހެދި އިންސްޕެކްޝަނުން ފާހަގަކުރެވިފައި ވަނީ 144 ރަށެއްގައި މަގުބައްތިތައް ހުރީ ޔޫޓިލިޓީ ރެގިއުލޭޓަރީ އޮތޯރިޓީގެ މިންގަނޑަށް ނުފެތި އެވެ. އެއާއެކު ފެނަކައިން ވަނީ އޯގަސްޓް 21، ގެ ނިޔަލަށް މަގުބައްތިތައް މިންގަނޑަށް ފެއްތުމަށް އޭރު މުއްދަތެއް ދީފަ އެވެ.
ރަށްރަށުގެ މަގުބައްތިތައް ބަލަހައްޓައި، މެއިންޓެއިން ކުރުމަކީ ކައުންސިލުތަކުގެ ޒިންމާއެކެވެ.
