ދާހިލީ ހަމަނުޖެހުންތައް ގޯސްވެ، ބޮޑުވަޒީރު އިސްތިއުފާދީފައިވާ ބަންގްލަދޭޝްގެ ވެރިރަށް ޑާކާއަށް ގައުމީ އެއާލައިން މޯލްޑިވިއަނުން ކުރާ ދަތުރުތައް ހުއްޓާލައިފި އެވެ.
މޯލްޑިވިއަނުން ސޯޝަލް މީޑިއާގައި ކުރި ޕޯސްޓެއްގައި ބުނީ މިއަދު ޑާކާއަށް އަދި ޑާކާއިން ވެލާނާ އިންޓަނޭޝަނަލް އެއާޕޯޓަށް ކުރަން ޝެޑިއުލްކުރި ފުލައިޓުތައް ކެންސަލް ކޮށްފައިވާ ކަމަށެވެ. އަދި، އެ ގައުމުގެ ހާލަތު ގާތުން ބަލަމުންދާ ކަމަށް ވެސް އެއާލައިނުން ބުންޏެވެ.
"މި ހާލަތުގައި އަޅުގަނޑުމެންގެ ފަސިންޖަރުންނަށް ފުރިހަމަ އެހީތެރިކަން ދޭނަން، އެންމެ މުހިންމު ކަމަކީ ފަސިންޖަރުންނާއި ކުންފުނީގެ ކްރޫއިންގެ ރައްކާތެރިކަން،" މޯލްޑިވިއަންގެ ޕޯސްޓުގައިވެ އެވެ.
މީގެ ދެތިން ހަފުތާ ކުރިން އެ މުޒާހަރާތައް ފެށީ 1971 ގައި ޕާކިސްތާނާ ދެކޮޅަށް ހަނގުރާމަކުރި އެ ގައުމުގެ އަސްކަރިއްޔާގެ މީހުންނަށް ސަރުކާރުން ދޭ 30 ޕަސަންޓުގެ ވަޒީފާގެ ކޯޓާ ބަދަލު ކުރުމަށެވެ. ނަމަވެސް ސަރުކާރުގެ އެ ނިންމުން ބަދަލުކޮށް، ބަންގްލަދޭޝްގެ ސުޕްރީމް ކޯޓުން ވަނީ ފަސް ޕަސަންޓަށް ކޯޓާގެ އަދަދު ކުޑަކޮށްފަ އެވެ.
މި މުޒާހަރާތަކުގެ ބައިވެރިންނާ ދެކޮޅަށް އެ ގައުމުގެ ސިފައިން ބާރުގެ ބޭނުންކުރުމުގެ ސަބަބުން 300 އަށްވުރެ ގިނަ މީހުން މަރުވި އެވެ. ހަސީނާ އިސްތިއުފާ ދެއްވުމުގެ ކުރިއަށް ހިނގި 24 ގަޑިއިރުގެ ތެރޭގައި އެކަނިވެސް 100 މީހުން މަރުވި އެވެ.
ގިނަ ބަޔަކު ހައްޔަރުވެސް ކުރި މި މުޒާހަރާގެ ބައިވެރިން އިއްޔެ މެންދުރުފަހު ޑާކާގައި ހުންނަ ހަސީނާގެ ރިޔާސީ ގަނޑުވަރަށް ވަދެގަތެވެ. އޭރު، ބަންގްލަދޭޝްގައި އެންމެ ގިނަ ދުވަހު ވެރިކަން ކުރެއްވި ހަސީނާ ވަނީ އެ ތަން ދޫކޮށް ފިއްލަވާފަ އެވެ. އިސްތިއުފާ ދެއްވުމަށްފަހު އޭނާ މިހާރު ވަނީ ގައުމު ދޫކޮށް އިންޑިއާއަށް ވަޑައިގެންފަ އެވެ.
ބަންގްލަދޭޝްގައި 91 ދަރިވަރުންނާ އެކު ޖުމުލަ 119 ދިވެހިން ތިބި ކަމަށް ސަރުކާރުން ބުނާއިރު އެ މީހުން ސަމާލުވުމަށް ދެ ފަހަރެއްގެ މަތިން ފޮރިން މިނިސްޓްރީން ވަނީ އިލްތިމާސްކޮށްފަ އެވެ. އަދި ހަމަނުޖެހުންތައް ކުރިއަށްދިޔަ ނަމަވެސް ދިވެހިންގެ ހާލު ރަނގަޅު ކަމަށް އެ ވުޒާރާއިން ތަކުރާރުކޮށް ބުނެފައިވެ އެވެ.
titledesc
