ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މެއި މަހުގެ ދެވަނަ ދުވަހާ ހަމައަށް މިނިސްޓްރީ އޮފް އެޑިއުކޭޝަނަށް 32 ސިޔާސީ މުވައްޒަފުން އައްޔަނު ކޮށްފައިވާ ކަމަށް އެ މިނިސްޓްރީން މައުލޫމާތު ދީފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން ވަނީ ނޮވެމްބަރު 17, 2023 އިން މެއި 1, 2024 އާ ހަމައަށް އެ މިނިސްޓްރީގައި ތިބި ސިޔާސީ މުވައްޒަފުންގެ މައުލޫމާތު ހޯދުމަށް އެދިފަ އެވެ.
މެއި 2، ގައި އެދުނު މި މައުލޫމާތު ދިނުމަށް ގާނޫނުން ލާޒިމުކުރާ މުއްދަތުގައި މިނިސްޓްރީން ޖަވާބެއް ނުދިނެވެ. އެ މައްސަލާގެ އަޑުއެހުމެއް ތާވަލުކުރުމާއެކު ޖުލައި 18، ގައި އެޑިއުކޭޝަން މިނިސްޓްރީން ވަނީ ދެވަނަ ޖަވާބެއް ދީފަ އެވެ.
އެ ޖަވާބުގައި ބުނެފައިވަނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ "31 ވަނަ މާއްދާގެ (1) ވަނަ ނަންބަރަށް ރިއާޔަތްކޮށް އެދިލައްވާފައިވާ މައުލޫމާތު ދެވެން ނެތް," ކަމަށެވެ. ނަމަވެސް ޖެހިގެން އައި ހަފުތާ މި މައްސަލާގައި ބޭއްވި ދެވަނަ އަޑުއެހުމުގައި އައިކޮމް އިން ވަނީ އެ މައުލޫމާތު ހިއްސާކުރުމަށް މިނިސްޓްރީއަށް އަންގާފަ އެވެ.
އެ އަޑުއެހުމުގައި، މައުލޫމާތު ދެވެން ނެތް ކަމަށް ބުނެ ޖަވާބު ފޮނުވީ މައުލޫމާތު ނުދިނުމުގެ ނިޔަތުގައި ނޫން ކަމަށްވެސް އެޑިއުކޭޝަންގެ އިންފޮމޭޝަން އޮފިސަރު ވިދާޅުވި އެވެ.
އެޑިއުކޭޝަން މިނިސްޓްރީގެ ސިޔާސީ މަގާމުތަކުގެ އަދަދާއި ލިބޭ މުސާރަ
- މިނިސްޓަރު - 58,500ރ.
- ހަ ސްޓޭޓް މިނިސްޓަރުން - މީހަކަށް 43,500ރ
- 13 ޑެޕިއުޓީ މިނިސްޓަރުން - މީހަކަށް 31,500ރ.
- ނުވަ ސީނިއާ ޕޮލިޓިކަލް ޑިރެކްޓަރުން - މީހަކަށް 25,500ރ.
- ތިން ޕޮލިޓިކަލް ޑިރެކްޓަރުން - 20،500ރ.
މި މައުލޫމާތަށް ބަލާއިރު އެ މިނިސްޓްރީގެ ސިޔާސީ މުވައްޒަފުންގެ މުސާރަ ދިނުމަށް މަހެއްގެ މައްޗަށް މިލިއަނަކަށްވުރެ ގިނަ ރުފިޔާ ހަރަދުވާނެ އެވެ. އެއީ، އަހަރެއްގެ މައްޗަށް ބަލާނަމަ، އެއީ 12.2 މިލިއަން ރުފިޔާ އެވެ. ފަސް އަހަރަށް ހިސާބުކުރާ ނަމަ 61.2 މިލިއަން ރުފިޔާ އެވެ.
މި ސަރުކާރު ވެރިކަމަށް އައީ ސިޔާސި މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމުގެ ވައުދާ އެކު އެވެ. ނަމަވެސް، މި ނޫހަށް މިހާތަނަށް 18 ވުޒާރާގައި އެކަނިވެސް 799 ސިޔާސީ މުވައްޒަފުން ތިއްބެވެ. އެޑިއުކޭޝަނާއެކު އެ އަދަދު ވަނީ 831 އަށް އަރާފަ އެވެ.
ސިޔާސީ މުވައްޒަފުންގެ ތެރޭގައި ރައީސް އޮފީހާއި މުލީއާގެ އަދި ހިލާލީގޭގެ މުވައްޒަފުންވެސް ހިމެނެ އެވެ. ނަމަވެސް، ސަރުކާރުގެ ސިޔާސީ މުވައްޒަފުންގެ ޖުމްލަ އަދަދު ރަސްމީކޮށް ހާމަކުރުމަށް ރައީސް އޮފީހުން ވަނީ ތަކުރާރުކޮށް ދެކޮޅު ހަދައިފަ އެވެ.
ވައުދާ ހިލާފުވެފައިވީ ނަމަވެސް، ސިޔާސީ މުވައްޒަފުންގެ ގޮތުގައި މިހާރު ތިބި މީހުންގެ އިތުރަށް، އަދިވެސް ސިޔާސީ މަގާމުތަކަށް މީހުން އައްޔަން ކުރާނެ ކަމުގެ އިޝާރާތެއް ވެރިކަންކުރާ ޕީއެންސީގެ އިސްވެރިން ވަނީ ޖުލައި 31، ގައި ދީފަ އެވެ.
