ހަމާސްގެ ލީޑަރު، އިސްމާއީލް ހަނިއްޔާގެ މައްޗަށް މިއަދުގެ ހުކުރު ނަމާދަށް ފަހު ޣައިބަށް ކަށުނަމާދުކޮށް ދިނުމަށް އަދާލަތު ޕާޓީން އެދިއްޖެ އެވެ.
ހަނިއްޔާ ޝަހީދުކޮށްލީ އިރާނުގެ އައު ރައީސް ހުވާ ކުރެއްވުމުގެ ރަސްމިއްޔާތަށް އެ ގައުމުގެ ވެރި ރަށް، ތެހެރާނަށް ވަޑައިގެން ހުންނަވަނިކޮށް ބުދަ ދުވަހުގެ ފަތިހު އެވެ. ހަނިއްޔާ ޝަހީދުކޮށްލި ހަމަލާ ދީފައި ވަނީ އޭނާ ހުންނެވި އިމާރާތަށް ދިން ހަމަލާއެއްގަ އެވެ. އެ ހަމަލާގައި ހަނިއްޔާގެ ބޮޑީ ގާޑެއް ވެސް ޝަހީދުވެފައިވެ އެވެ.
ހަނިއްޔާގެ މައްޗަށް ޣައިބަށް ކަށުނަމާދު ކޮށް ދިނުމަށް އެދި އަދާލަތު ޕާޓީން، އިސްލާމިކް މިނިސްޓަރު ޑރ. މުހައްމަދު ޝަހީމަށް ފޮނުވި ސިޓީގައި ބުނެފައި ވަނީ ހަނިއްޔާ އަކީ ފަލަސްތީނުގެ މިނިވަންކަމާއި އިސްލާމީ އުންމަތަށްޓަކައި މަތިވެރި ގުރުބާނީތަކެއް ވެވަޑައިގެންނެވި އަބުޠާލެއް ކަމަށާއި، އެފަދަ ބޭފުޅުންގެ އަގު ވަޒަން ކުރުމަކީ އުންމަތުގެ ކޮންމެ ފަރުކު ވެސް ކުރަންޖެހޭ ކަމެއް ކަމަށެވެ.
"ހާއްސަކޮށް އިސްލާމީ ގައުމުތަކުގެ އިސްލާމީ މުއައްސަސާތަކަކީ މިކަމުގައި އިސް ނެގުން އެންމެ އައުލާވެގެންވާ ފަރާތްތައް ކަމުގައި ވީހިނދު ޝަހީދު އަލްޤާއިދާ އިސްމާއީލް ހަނިއްޔާގެ މައްޗަށް ޣައިބަށް ކަށުނަމާދު ކޮށް ދިނުމަކީ އެ މަނިކުފާނާއި ފަލަސްތީނުގެ ރައްޔިތުންނާއި އަދި އިސްލާމީ އުންމަތުގެ ހައްގުގައި ކުރަންޖެހޭ ކަމެއް ކަމުގައި ދެކެމެވެ،" އެ ސިޓީގައި ބުނެފައިވެ އެވެ.
އެހެންވެ، ދިވެހިރާއްޖޭގައި ހުކުރުކުރާ ހުރިހާ މިސްކިތެއްގައި މިއަދުގެ ހުކުރު ނަމާދަށް ފަހު ހަނިއްޔާގެ މައްޗަށް ޣައިބަށް ކަށުނަމާދު ކުރުމުގެ އިންތިޒާމު ހަމަޖައްސައި ދެއްވުމަށް އެ ޕާޓީން އެދެ އެވެ. ނަމަވެސް އެ އިންތިޒާމު ހަމައްސާފައިވާކަން އިސްލާމިކް މިނިސްޓްރީން ހާމައެއް ނުކުރެ އެވެ.
ހަނިއްޔާ އަށް ދިން ހަމަލާގެ ޒިންމާ އަދި އެއްވެސް ފަރާތަކުން އުފުލައިފައެއް ނުވެ އެވެ. ނަމަވެސް އެއީ އިޒްރޭލުން ދިން ހަމަލާއެއް ކަމަށް ހަމާސްއިން ވަނީ ތުހުމަތުކޮށްފަ އެވެ.
އެ ހަމަލާ ގިނަ ގައުމުތަކަކުން ކުށްވެރި ކުރަމުން ދިޔައިރު، ދިވެހި ސަރުކާރުން އެ ކަމާ ގުޅޭ ގޮތުން ބަހެއް ބުނީ، އެ ހަމަލާ ދިވެހި ސަރުކާރުން ކުށްވެރި ނުކުރާތީ އާންމުން ފާޑުކިޔަމުން ދަނިކޮށެވެ.
ހަނިއްޔާ އަށް ދިން ހަމަލާ ރާއްޖެއިން ކުށްވެރި ނުކޮށްގެން، ކުރީގެ އިސްލާމިކް މިނިސްޓަރު ޑރ. އަހުމަދު ހާޒިރު ވެސް ސަރުކާރަށް ފާޑުވިދާޅުވި އެވެ.
ނަމަވެސް ފޮރިން މިނިސްޓްރީން ބަޔާން ނެރުނީ ހަނިއްޔާގެ ޖަނާޒާ ބާއްވައި ނިމުނު ފަހުންނެވެ.
ތެހެރާނުގައި އިއްޔެ ބޭއްވި ޖަނާޒާގައި ގިނަ އަދަދެއްގެ މީހުން ބައިވެރިވި އެވެ.
