ހަމާސްގެ ލީޑަރު، އިސްމާއިލް ހަނިއްޔާއަށް ހަމަލާދީ ޝަހީދުކޮށްލުން ކުށްވެރިކޮށް ރާއްޖޭގެ ފޮރިން މިނިސްޓަރީން ދެންމެ ބަޔާނެއް ނެރެފި އެވެ.
އެ ބަޔާން ނެރުނުއިރު، މިއަދު ހެނދުނު ވަނީ ހަނިއްޔާގެ ޖަނާޒާ ވެސް ބާއްވައިފަ އެވެ.
ފޮރިން މިނިސްޓަރީން މިއަދު ނެރުނު ބަޔާނުގައި ބުނީ އިއްޔެ ރޭ ހަނިއްޔާއަށް ދިން ހަމަލާ ކުށްވެރި ކުރާ ކަމަށެވެ.
"އިރާނުގައި ހުންނަވަނިކޮށް ހަމާސްގެ ޕޮލިޓިކަލް ބިއުރޯގެ ޗީފް، އިސްމާއިލް ހަނިއްޔާ އަވަހާރަކޮށްލުން ދިވެހިރާއްޖޭގެ ސަރުކާރުން ކުށްވެރި ކުރަން،" ފޮރިން މިނިސްޓަރީން ނެރުނު ބަޔާނުގައި ބުނެފައިވެ އެވެ.
ފޮރިން މިނިސްޓަރީން ބަޔާނެއް ނެރެފައި މިވަނީ އެ ހަމަލާ އާ ގުޅިގެން ރާއްޖެއިން އެއްވެސް ބަހެއް ބުނެފައި ނުވާތީ އެކަމަށް އާންމުންގެ ނުރުހުން އަމާޒުވިފަހުންނެވެ. ހަނިއްޔާއަށް ދިން ހަމަލާ އާ ދެކޮޅަށް ދުނިޔޭގެ ބޮޑެތި ގައުމުތަކުން ވަނީ އިއްޔެ ބަސް ބުނެފަ އެވެ. އޭގެތެރޭގައި ރާއްޖޭގެ އަވަށްޓެރި ސްރީލަންކާ އާއި ޕާކިސްތާން ވެސް ހިމެނެ އެވެ.
ހަނިއްޔާ ޝަހީދުކޮށްލާފައި ވަނީ އިރާނުގެ އައު ރައީސް ހުވާ ކުރެއްވުމުގެ ރަސްމިއްޔާތަށް އެގައުމުގެ ވެރި ރަށް، ތެހެރާނަށް ވަޑައިގެން ހުންނަވަނިކޮށް އިއްޔެ ރޭ ފަތިހު އެވެ. ހަނިއްޔެ ޝަހީދުކޮށްލި ހަމަލާ ދީފައި ވަނީ އޭނާ ހުންނެވި އިމާރާތަށް ދިން ހަމަލާއެއްގަ އެވެ. އެ ހަމަލާގައި ހަނިއްޔާގެ ބޮޑީ ގާޑެއް ވެސް ޝަހީދުފައިވެ އެވެ.
ހަނިއްޔާ އަށް ދިން ހަމަލާގެ ޒިންމާ އަދި އެއްވެސް ފަރާތަކުން އުފުލައިފައެއް ނުވެ އެވެ. ނަމަވެސް އެއީ އިޒްރޭލުން ދިން ހަމަލާއެއް ކަމަށް ހަމާސްއިން ވަނީ ތުހުމަތުކޮށްފަ އެވެ. ހަމަލާ އާ ގުޅިގެން އިރާނުގެ ރޫހާނީ ލީޑަރު، އާޔަތުﷲ ހާމަނާއީ ވަނީ ރައްދުގައި އިޒްރޭލަށް ހަމަލާ ދިނުމަށް އެގައުމުގެ ސިފައިންނަށް އަންގައިފަ އެވެ.
ފޮރިން މިނިސްޓަރީން މިއަދު ނެރުނު ބަޔާނުގައި ގާޒާގައި ހިނގަމުންދާ ޖެނޮސައިޑް ސިފަކޮށްފައި ވަނީ ކާރިސާއެއް ގޮތަށެވެ. ދެ ޖުމުލަ ހިމެނޭ ބަޔާނުގައި "ޖެނޮސައިޑް" ލަފުޒު ވެސް އަދި އިޒްރޭލުގެ ނަން ވެސް ހިމަނައިފައެއް ނުވެ އެވެ.
ބަޔާނުގައި ގޮވާލައިފައި ވަނީ ބައިނަލްއަގުވާމީ ގާނޫނުތައް ނަގަހައްޓައިގެން ގާޒާގައި ހިނގަމުންދާ "ކާރިސާ" އަށް ދާއިމީ ހައްލެއް ހޯދައިދިނުމަށް ހުރިހާ ގައުމަކުން މަސައްކަތް ކުރުމަށް އެދި ރާއްޖެއިން ގޮވައިލާ ކަމަށެވެ.
