އެންޓި ކޮރަޕްޝަން ކޮމިޝަން (އޭސީސީ) އާއެކު، ކުރީގެ ރައީސް އަބްދުﷲ ޔާމީން ސޮއިކުރެއްވި އެސްކްރޯ އެއްބަސްވުމުގައި ބޭންކް އޮފް މޯލްޑިވްސް (ބީއެމްއެލް) އަށް ދައުރެއް ދެވިފައިވާ ކަމަށް އޭސީސީގެ ވަކީލުން ހައި ކޯޓުގެ ޝަރީއަތުގައި މިއަދު ވިދާޅުވެއްޖެ އެވެ.
އެސްކްރޯ އެއްބަސްވުމުގެ މުއްދަތު ހަމަވި ފަހުން އެމަނިކުފާނުގެ އެކައުންޓަށް އެއް މިލިއަން ޑޮލަރު ޖަމާނުކޮށްދީ ހިފެހެއްޓި މައްސަލާގައި، ބީއެމްއެލާއި އޭސީސީއަށް ޔާމީނުގެ ފަރާތުން ދައުވާކޮށް ސިވިލް ކޯޓަށް މައްސަލައެއް ހުށަހަޅާފައިވެ އެވެ. ބީއެމްއެލް ވެސް ޝާމިލުވާ ގޮތަށް މައްސަލަ ބެލުމަށް ސިވިލް ކޯޓުން ނިންމުމުން ބޭންކުން އެ ނިންމުން ހައި ކޯޓުގައި އިސްތިއުނާފުކުރީ އެވެ.
މީގެ ކުރިން ހައި ކޯޓުގައި ބޭއްވި އަޑުއެހުމުގައި ބީއެމްއެލްގެ ވަކީލުން ވިދާޅުވެފައިވަނީ ބީއެމްއެލްގައި ހުޅުވީ "އެސްކްރޯ އެކައުންޓެއް" ނޫން ކަމަށާއި އެއީ އޭސީސީގެ ނަމުގައި އެ ކޮމިޝަނުގެ ބާރު ހިނގާ ގޮތަށް ހުޅުވާފައިވާ ކަރަންޓު އެކައުންޓެއް ކަމަށެވެ. ފައިސާ ދޫކުރެވޭނީ އޭސީސީން އެންގުމުން ކަމަށެވެ.
މިއަދު ބޭއްވި އަޑުއެހުމުގައި އޭސީސީގެ ވަކީލު އައިޝަތު ޝުނައިނަތު އަބްދުﷲ ވިދާޅުވީ ޔާމީނާއި އެ ކޮމިޝަނާ ދެމެދު ވެފައިވާ އެއްބަސްވުމުގައި ވެސް ސާފުކޮށް އެއީ "އެސްކްރޯ އެކައުންޓް އެގުރިމަންޓް" އެއް ކަމަށް ބަޔާންކޮށްފައިވާ ކަމަށެވެ. އޭސީސީ އާއި ސަރުކާރުން ބޭންކަށް ފޮނުވި ސިޓީތަކުގައި ވެސް ސާފުކޮށް އެ ލަފުޒު ބޭނުންކޮށް މުއާމަލާތް ކޮށްފައިވާ ކަން ވަކީލު ފާހަގަ ކުރެއްވި އެވެ.
އެއްބަސްވުމުގެ އަސްލުގެ ގޮތުގައި ތިން ދެލިކޮޕީއެއް ތައްޔާރުކުރި ކަމާއި އަސްލު ހަވާލުކުރި ފަރާތްތަކުގެ ތެރޭގައި ބޭންކު ހިމެނޭ ކަމަށް ވަކީލު ވިދާޅުވި އެވެ. ދެން ހުރި އަސްލަކީ ޔާމީނާއި އޭސީސީއަށް ނިސްބަތްވާ އަސްލު ކަމަށް އޭނާ ވިދާޅުވި އެވެ.
އެސްކްރޯ އެކައުންޓެއް ހުޅުވަން ޓްރައިޕާޓް ނުވަތަ ތިން ފަރާތް ބައިވެރިވާ އެގުރިމަންޓެއް އޮންނަން ޖެހޭ ކަމަށް ބޭންކުން ބުނި ނަމަވެސް އެގުރިމަންޓެއް ވަކި ގޮތަކަށް އޮންނަން ގާނޫނުގައި ބަޔާން ނުކުރާ ނަމަ ދެ ފަރާތުގެ ދެމެދުގައިވާ އެއްބަސްވުމަކުން ވެސް ބީއެމްއެލް ބައިވެރިވާ ގޮތަށް އެކައުންޓު ހުޅުވޭނެ ކަމަށް ވިދާޅުވި އެވެ.
ޝަރީއަތުގެ އަޑުއެހުމަށް މިއަދު ކަނޑައެޅިފައިވާ ވަގުތު ހަމަވިއިރު އޭސީސީގެ ފަރާތުން ހުށަހަޅަން ބޭނުންވާ ހުރިހާ ނުކުތާއެއް ޝަރީއަތަށް އިއްވިފައެއް ނުވެ އެވެ. އަޑުއެހުން ނިންމައިލުމުގެ ކުރިން ޔާމީނުގެ ފައިސާ ދޫކޮށްލަންވީތޯ ބޭންކުން ސުވާލު ވެސް ކުރި އެވެ. މައްސަލަ ބައްލަވާ ފަނޑިޔާރުންގެ ބެންޗުން ނިންމެވީ އެ ސުވާލަށް ޖަވާބު ދިނުން ކުރިއަށް ދާނީ އޭސީސީގެ ހުރިހާ ނުކުތާއެއް އިއްވައި ނިމުމުން ކަމަށެވެ.
ޔާމީންގެ ފަރާތުން ސިވިލް ކޯޓަށް ހުށަހެޅުއްވި މައްސަލާގައި އެދިވަޑައިގެންފައިވަނީ އެ ފައިސާ ބޭންކުން ހިފަހައްޓާފައިވަނީ އެކްސްކްރޯ އެއްބަސްވުމާ ހިލާފަށް ކަމަށް ކަނޑައަޅައިދިނުމަށާއި އޭގެ ސަބަބުން ލިބުނު ގެއްލުމަށް އަދުލުވެރި ބަދަލެއްގެ ގޮތުގައި އެ ފައިސާއާއެކު، އެ ފައިސާ އިންވެސްޓްމަންޓް އެކައުންޓުގައި ބެހެއްޓިނަމަ ޔާމީނަށް ލިބިވަޑައިގަންނަވާނެ ކަމަށް އަންދާޒާ ކުރެވޭ އަދަދުގެ ފައިސާ ދިނުމަށް އެންގުމަށެވެ.
ޔާމީނުގެ ވެރިކަމުގައި މި އެއްބަސްވުން އެކުލަވާލައި އެކައުންޓަށް އެއް މިލިއަން ޑޮލަރު ޖަމާކުރީ ޖޫން 10، 2018 ގަ އެވެ. އެއީ ޔާމީނުގެ ނަމުގައި އިސްލާމިކް ބޭންކުގައި ހުޅުވާފައިވާ އިންވެސްޓްމަންޓް އެކައުންޓަކަށް ޖަމާކޮށްފައިވާ އެއް މިލިއަން ޑޮލަރަކީ އޭރު ހިނގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ހިމެނޭ ފައިސާއެއް ކަމަށް ބެލެވޭތީ އެ ކަން ސާފު ކުރެވެން ދެން ޝައްކު ކުރެވޭ ފައިސާ ބޭނުން ނުކޮށް ހިފަހައްޓާފައި ބޭއްވުމުގެ ބޭނުމުގަ އެވެ.
ކުރީގެ ރިޔާސީ ދައުރުގައި ޔާމީނަށް 11 އަހަރުގެ ޖަލު ހުކުމެއް އިއްވީ އެ ހިޔާނާތުގައި ހިމެނޭ ކަމަށް ބުނާ ވ. އާރަށް ކުއްޔަށް ދޫކުރުމުގައި ޔާމީން ރިޝްވަތު ނެންގެވި ކަމަށް ބުނާ މައްސަލާގަ އެވެ. އެ މައްސަލަ ކްރިމިނަލް ކޯޓުން އަލުން ބެލުމަށް ހައި ކޯޓުން ހުކުމް ކޮށްފައިވެ އެވެ. އޭގެ ކުރިން ވެސް ޔާމީނަށް ފަސް އަހަރުގެ ޖަލު ހުކުމެއް ދަށު ކޯޓުން އިއްވި އިރު އެ ހުކުމް ސުޕްރީމް ކޯޓުން ބާތިލްކުރި އެވެ.
ރ. ފުއްގިރި ކުއްޔަށް ދޫކުރުމުގައި ހިނގި ކަމަށް ބުނާ ހިޔާނާތުގެ މައްސަލާގައި ވެސް ޔާމީނުގެ މައްޗަށް ދައުވާކޮށްފައިވެ އެވެ. އެ މައްސަލަ ވެސް ދަށު ކޯޓުގައި އަދި ނުނިމެ އެވެ. ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން ހުޅުމާލޭން ކްރިމިނަލް ކޯޓަށް އިމާރާތެއް މި ފަހުން ހަމަޖެއްސި ފަހުން ވެސް މި މައްސަލައިގެ އަޑުއެހުމެއް ނުބާއްވަ އެވެ.
