މިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރި ފުލެޓުތައް ހަވާލު ކުރުން ލަސްވާ މައްސަލައިގައި ފުލެޓުވެރިންގެ ހައްގުގައި މަސައްކަތް ކުރާ ފަހި ޔޫނިއަނުން މަޖިލީހުގެ ރައީސް، އަބްދުއްރަހީމް އަބްދުﷲ އާ ބައްދަލުކޮށް ކަންބޮޑުވުންތައް ހިއްސާކޮށްފި އެވެ.
އިއްޔެ ކުރިއަށް ގެންދިޔަ އެ ބައްދަލުވުމުގައި ފަހި ޔޫނިއަނުގެ ފަރާތުން ވަނީ ފުލެޓުތައް ހަވާލު ކުރުން ލަސްވާ މައްސަލައިގައި ސަރުކާރުން އެއްވެސް މައުލޫމާތެއް ހިއްސާ ނުކުރާކަން ފާހަގަކޮށް އެކަމުގެ ޝަކުވާ މަޖިލިސް ރައީސްއާ ހިއްސާކޮށްފަ އެވެ. އަދި މަޖިލީހުގެ ރައީސްއަށް އެކަމާ ގުޅޭގޮތުން އެނގޭ މައުލޫމާތުގެ މިންވަރެއް ހިއްސާ ކޮށްދިނުމަށް ވެސް އެ ޔޫނިއަނުން އެދުނެވެ.
އެ ޖަމިއްޔާގެ ފައުންޑަރު، އިސްމާއިލް ނާއިފް އަބޫބަކުރު ވިދާޅުވީ އެ ބައްދަލުވުމުގައި ފުލެޓު ލިބުނު މީހުންނަށް ލިބުނު ތަނަކުން ލިބުނު ބަޔަކަށް ދޭނެ ކަމަށް ރައީސް ޑރ. މުހައްމަދު މުއިއްޒު ވައުދު ވެވަޑައިގެންނެވި ގޮތަށް އެކަން ކުރައްވާނެ ކަމާމެދު އެއްވެސް ޝައްކެއް ނެތް ކަމުގެ ޔަގީންކަން އަބްދުއްރަހީމް ދެއްވި ކަމަށެވެ.
"މަޖިލިސް ރައީސް ވިދާޅުވީ ރައީސް މުއިއްޒުގެ ވައުދެއް ނޫންހެއްޔޭ އެއީ ދީފަ އޮތް އެއްޗެއް ދީފަ އޮތް ތަނަކުން ދޭން، އެހެންވީމާ ވައުދު ރައީސް ފުއްދަވާނެ ކަމާމެދު އެއްވެސް ޝައްކެއް ނެތޭ، ނަމަވެސް [ފުލެޓު ހޯދުމުގެ ބޭނުމުގައި] މީހަކު ގޯސް މައުލޫމާތެއް ދީފައި އޮވެއްޖެ ނަމަ އެކަން ބެލެންޖެހޭނެޔޭ،" އިސްމާއިލް ވިދާޅުވި އެވެ.
ފަހި ޔޫނިއަނުން ވެސް ގަބޫލު ކުރާ ހަމައަކީ ހައްގު ނޫން މީހަކަށް ފުލެޓު ދީގެން ނުވާނެކަން ކަމަށް އިސްމާއިލް ވިދާޅުވި އެވެ. ނަމަވެސް އެކަން ކުރަން ޖެހޭނީ ފުލެޓު ހައްގު ނޫން ކަމަށް ކަނޑައަޅާ މީހުން ހައުސިން މިނިސްޓަރީއަށް ގެންގޮސް ޖަވާބުދާރީވުމުގެ ފުރުސަތު ދިނުމަށް ފަހު ކަމަށް އިއްޔެގެ ބައްދަލުވުމުގައި ޔޫނިއަނުގެ ފަރާތުން ފާހަގަކުރި ކަމަށް އިސްމާއިލް ވިދާޅުވި އެވެ.
"3778 އެބައުޅޭ [ފުލެޓު] އެގްރިމެންޓު ދެވިފައި، އެހެންވީމާ އޭގެތެރެއިން އެއްވެސް ބަޔަކު އުނި ކުރަންޖެހޭނީ އެ އެގުރީމެންޓު ލިބުނު މީހުން ގެންގޮސްފައި އެ މީހުންނަކީ ޝަރުތު ފުރިހަމަވާ ބައެއްކަން ސާބިތު ކޮށްދިނުމަށްފަހު އޭ، އެއްވެސް ބައެއްގެ ހައްގަކަށް އުނިކަމެއް ލިބިގެން ނުވާނެޔޭ،" އިސްމާއިލް ވިދާޅުވި އެވެ.
ފަހި ޔޫނިއަނުގެ ފަރާތުން ހިއްސާކުރި ކަންބޮޑުވުންތައް އަޑުއެހުމަށްފަހު ފުލެޓުތަކާ ބެހޭ މައުލޫމާތު އިތުރަށް ހޯދުމަށްފަހު އަދި ޔޫނިއަންގެ ވެރިންނަށް ގުޅުއްވާނެ ކަމަށް އަބްދުއްރަހީމް އިއްޔެގެ ބައްދަލުވުމުގައި ވިދާޅުވިކަން އިސްމާއިލް ފާހަގަކުރެއްވި އެވެ.
ދެން ރައީސް [އަބްދުއްރަހީމް؛] ވެސް ވިދާޅުވީ ތިއީ ރަނގަޅު ވާހަކަތަކެކޭ، އެކަމަކު ތިމަންނައަކަށް ތީގައި ހުރި މައުލޫމާތުތަކެއް އަދި އެހާ ރަނގަޅަކަށް ނޭނގެޔޭ، ތީގެ މައުލޫމާތުތައް ނަގާފައި އަދި ތިމަންނަ ގުޅާނަމޭ،" އިސްމާއިލް ވިދާޅުވި އެވެ.
އިސްމާއިލް ވިދާޅުވީ ފުލެޓުތައް ދިނުން ލަސްވާ މައްސަލައިގައި މަޖިލީހުގެ މިދިޔަ ދައުރުގެ ރައީސް، މުހައްމަދު އަސްލަމްއާ ވެސް ބައްދަލު ކުރެއްވި ކަމަށެވެ. އެ ބައްދަލުވުމުގައި ޔޫނިއަނުގެ ފަރާތުން ފާހަގަކުރި ކަންބޮޑުވުންތަކާ އެއްގޮތަށް ފުލެޓުތަކުގެ ހައްގުވެރިންނަށް ހަވާލު ކުރުން އަވަސް ކޮށްދިނުމަށް އެދި ރައީސް މުއިއްޒުއަށް ސިޓީއެއް ވެސް އޭރު ފޮނުވި ކަމަށް އިސްމާއިލް ވިދާޅުވި އެވެ.
ނަމަވެސް މިއަދާ ހަމައަށް ވެސް އެ ސިޓީގެ ޖަވާބު ލިބިފައި ނުވާކަމަށް އިސްމާއިލް ވިދާޅުވި އެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކުރެވި މަސައްކަތް ފަށާފައި ވަނީ 4000 ފުލެޓުގެ އެވެ.
ރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ކަމަށް ކަނޑައަޅާފައިވަނިކޮށް އޭސީސީއަށް ހުށަހެޅު މައްސަލައަކާ ގުޅިގެން އެ މަސައްކަތް މަޑުޖައްސާލަން އެންގި އެވެ. އެ ސްކީމަށް ތައްޔާރުކުރި ޕޯޓަލްގެ އެކްސެސް ލިބުމުން، މައްސަލަ ތަހުގީގު ކުރުން ގެންދިޔުމަށް ފަހު، މަސައްކަތް އަލުން ފަށަން ކޮމިޝަނުން ހުއްދަ ދިނީ ފެބްރުއަރީ އެކެއްގަ އެވެ.
އޭގެ ފަހުން ފުލެޓު ލިސްޓުގެ މައްސަލަ ބަލަން ހައުސިން މިނިސްޓަރީން ވަނީ ފުލެޓު ކޮމެޓީއެއް އެކުލަވައިލައިފަ އެވެ. ނަމަވެސް އެ ކޮމެޓީ އެކުލަވައިލުމަށް ފަހު މިއަދާ ހަމައަށް އެއްވެސް މައުލޫމާތެއް ހާމަނުކުރެ އެވެ.
