މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު ވަކިކުރަން ރައީސަށް ލަފާ ދޭން މާލިއްޔަތު ކޮމިޓީން ނިންމިނިންމުން ރައްޔިތުންގެ މަޖިލީހަށް ބަލައިގަނެ، މައްސަލަ ދިރާސާކުރަން އެ ކޮމިޓީއަށް ފޮނުވަން މިއަދު ފާސްކޮށްފި އެވެ.
އެމްއެމްއޭގެ ގަވަރުނަރު ހާޝިމް ވަކިކުރަން ރައީސްއަށް ލަފާ ދޭން މާލިއްޔަތު ކޮމިޓީން ފާސްކުރި އިއްޔެ އެވެ. އޭނާ މަގާމުން ވަކިކުރަން ލަފާ ދޭން މާލިއްޔަތު ކޮމިޓީން ފާސްކުރީ ގައުމުގެ އިގުތިސޯދު މި ހާލަތަށް ވެއްޓުނީ ގަވަރުނަރަށް ޒިންމާ އަދާނުކުރެވޭތީ ކަމަށް ދެކޭތީ އެވެ.
އެގޮތުން މި މައްސަލަ ކޮމިޓީއަށް ހުށަހެޅުއްވި މަޖިލީހުގެ ނައިބު ރައީސް، ދިއްގަރު ދާއިރާގެ މެމްބަރު އަހުމަދު ނާޒިމު ވިދާޅުވީ ގަވަރުނަރު ވަކިކުރަން ލަފާ ދެނީ ގައުމުގެ އިގުތިސޯދު ހީނަރުވެ، އަލުން އަނބުރާ އިޔާދަކުރަން އުނދަގޫ ހިސާބަކަށް ދިޔައިރު، އެމްއެމްއޭއަށް މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިންގަމުންދާ ތަން ފެންނަމުން ނުދާ ކަމަށެވެ.
ގަވަރުނަރު ހާޝިމަށް މަގާމުގެ ޒިންމާ އަދާނުކުރެވޭ ކަންކަމުގެ ތެރޭގައި ނާޒިމް ފާހަގަކުރެއްވި ކަންކަމުގެ ތެރޭގައި ހިމެނެނީ:
- ރާއްޖޭގައި ހިންގާ ބޭންކުތަކާއި މާލީ އިދާރާތަކުން އާންމުންނަށް ލޯނު ދޫކުރާ މިންވަރު ނުސީދާކޮށް ހިފަހައްޓާ، ބޭންކުތަކުގެ ރިޒާާވް، އެމްއެމްއޭގައި ބަހައްޓަން ގަވަރުނަރު ބާރުއެޅުުއްވުން
- ސަރުކާރުން ވެސް މިހާރު ފައިސާ ހޯދަމުން ގެންދަނީ ޑޮމެސްޓިކް މާކެޓްއިން ކަމުން ޑޮމެސްޓިކް މާކެޓް ރެގިއުލޭޓުކުރުމުގެ މުހިންމުކަން ބޮޑުވެފައިވާ ވަގުތެއްގައި އެކަން ކުރަމުންދާތަން ނުފެނުން
- ކުށްކުރުން ހުއްޓުވަން ހުރި ގޮންޖެހުންތަކުގެ ތެރޭގައި އެމްއެމްއޭގެ ގަވާއިދުތައް އަދާ ހަމަ ނޫން މައްސަލަ ފާހަގަކުރެވޭތީ
އެމްއެމްއޭ ގާނޫނުގެ ދަށުން، އެ އޮތޯރިޓީގެ ގަވަރުނަރު ވަކިކުރަން ރައީސްއަށް ލަފާދިނުމަކީ މަޖިލީހަށް ކުރެވޭނެ ކަމެކެވެ. މިކަމާ މެދު އެންމެ ފަހު ގޮތް ނިންމާނީ ކޮމިޓީން މައްސަލަ ދިރާސާކޮށް ނިންމައި، މަޖިލީހުގެ ތަޅުމަށް މި މައްސަލަ ހުށަހަޅައިގެން ނަގާ ވޯޓަކުންނެވެ.
ކޮމިޓީގައި މި މައްސަލަ ދިރާސާކުރާއިރު، ގަވަރުނަރަށް ޖަވާބުދާރީ ވުމުގެ ފުރުސަތު ވެސް ދޭން ޖެހޭނެ އެވެ.
