މާފުށީ ޖަލުގައި މަރުވި ށ. ފުނަދޫ, ޒަމާނީ ވިލާ, މުހައްމަދު ޖަމީލް 45, ގެ މަރާ ގުޅޭ މައުލޫމާތު އެއްކޮށްފައިވާ ކަމަށާއި އެކަމާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބުނެފި އެވެ.
ޖަމީލުގެ މަރުގައި ޝައްކުވާ ކަންކަން ހުރި ކަމަށް ބުނެ އެ މައްސަލަ ތަހުގީގު ކުރުމަށް ދަ ޑިމޮކްރެޓްސްއިން ވަނީ މިއަދު އެޗްއާރުސީއެމްއަށް ހުށަހަޅާފަ އެވެ. އެމްޑީޕީން ވެސް ވަނީ އޭނާގެ މަރާ ގުޅިގެން ކަންބޮޑުވުން ފާޅުކޮށް ތަހުގީގު ކުރަމަށް ގޮވާލާފަ އެވެ.
"ޖަމީލުގެ ހަށިގަނޑު ބަލާ، ފޮޓޯ ނަގާ، މޯލްޑިވްސް ކަރެކްޝަނަލް ސާވިސްގެ އޮފިސަރުންގެ ފަރާތުންނާއި، އާއިލާގެ ފަރާތުން މައުލޫމާތު ސާފުކޮށް، މުހައްމަދު ޖަމީލްގެ މެޑިކަލް ފައިލް ބަލާފައިވާނެ," އެޗްއާރުސީއެމް އިން މިރޭ ބުނެފައިވެ އެވެ.
އޭގެ އިތުރުނަށް, ޖަލަށް ޒިޔާރަތްކޮށް ގޮޅީގެ ސީސީޓީވީ ފުޓޭޖު ބަލައި އެ ޔުނިޓުގައި ތިބި ބަންދު މީހުންގެ ފަރާތުންނާއި، ޖަމީލު ކުރިން ހުރި ގޮޅީގައި ތިބި ބަންދުމީހުންގެ ފަރާތުން މައުލޫމާތު ސާފުކޮށްފައިވާ ކަމަށް އެޗްއާރުސީއެމްއިން ވަނީ ބުނެފަ އެވެ.
ޑިމޮކްރެޓުން ހުށަހެޅި މައްސަލާގައި ބުނެފައިވަނީ އޭނާގެ މަރުވީ ކަރެކްޝަންސް އޮފިސަރުން އަނިޔާކޮށް ފަރުވާ ދިނުމުގައި އިހުމާލުވުމުން ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަމުންދާ ކަމަށް ބުނެފަ އެވެ. އަދި, ޖަމީލަށް ލިބެން ޖެހޭ ހައްގުތައް ލިބިފައިވޭތީ ކަށަވަރުވިތޯ ބެލުމަށް ވެސް އެދިފައިވެ އެވެ.
