މާލޭގައި އާންމުކޮށް ވައްކަން ކުރުމުގައި އާންމުކޮށް ހަރަކާތްތެރިވާ 46 މީހުން ފާއިތުވި ހަ މަސްދުވަހުގެ ތެރޭގައި 4000 ފަހަރު ހައްޔަރުކޮށް އަދި މުއާމަލާތު ކުރުމަށްފަހު ވެސް ދޫވެފައި ތިބީ ކޯޓުތަކުގެ އިހުތިސާސް ސާފު ނުވާތީ ކަމަށް ހޯމް މިނިސްޓަރު، އިހުސާން އަލީ ވިދާޅުވެއްޖެ އެވެ.
މަޖިލީހުގެ ގައުމީ ސަލާމަތަ ބެހޭ ކޮމެޓީއަށް މިއަދު އިހުސާން ކުރުމުން، އެމްޑީޕީ ޕީޖީ ގުރޫޕުގެ ލީޑަރު، އިބްރާހިމް ނާޒިލް ކުރެއްވި ސުވާލަކަށް ޖަވާބު ދެއްވަމުން އިހުސާން ވިދާޅުވީ މާލޭގެ ވައްކަމުގެ ނެޓްވޯކުގައި ފާހަގަ ކުރެވޭ 46 މީހުން ތިބި ނަމަވެސް އެމީހުން ހައްޔަރުކޮށްގެން ބަންދުގެ މުއްދަތު ޖެހުމަށް ކޯޓުތަކަށް ގެންދިޔުމުން ކޯޓުގެ އިހުތިސާސްގެ ދަށުން އެ މައްސަލަ ނުބެލޭނެ ކަމަށް ބުނެ ދޫކޮށްލާ ކަމަށެވެ.
"މީގެ މައްސަލައަކީ އަޅުގަނޑުމެން އެމީހުން ހައްޔަރު ކޮށްގެން އެމީހުންގެ ޔޫރިން ޕޮޒިޓިވްވެގެން އެއް ކޯޓަށް ގެންދިިޔައީމާ އެމީހުން ބުނާނެ ނޫނޭ ތިއީ ޑްރަގް މައްސަލައެއް ނޫނޭ ތިއީ ކްރިމިނަކް މައްސަލައެކޭ، ކްރިމިނަލް ކޯޓަށް ގެންދިޔައީމާ ބުނެފާނެ ތިއީ ޑްރަގް މައްސަލައެކޭ، އެހެންވީމާ ގާނޫނުގައި ސާފުކޮށް ބައެއް ކަންކަން އެބަޖެހޭ ބަޔާން ކުރަން، މިކަހަލަ ހާލަތްތަކުގައި މީނާ ގެންދަން ޖެހޭނީ ކްރިމިނަލް ކޯޓަށޭ،" އިހުސާން ވިދާޅުވި އެވެ.
ފުލުހުންނަށް ގާނޫނުން ލިބިދޭ ބާރުގެ ދަށުން ބަންދުގެ މުއްދަތު ޖަހަން ކޯޓަކަށް ހާޒިރު ނުކޮށް ހައްޔަރުގައި ކުށްވެރިން ބޭތިއްބެނީ 24 ގަޑިއިރުކަން ފާހަގަ ކުރައްވައި އިހުސާން ވިދާޅުވީ ވައްކަމުގެ މައްސަލަތަކުގައި ހައްޔަރު ކުރާ މީހުން މިއޮއްހައި ދުވަހު ދޫވެފައި ތިބީ ކޯޓުތަކަށް ގެންދިޔުމުން ދިމާވާ ގޮންޖެހުމާ ގުޅިގެން ކަމަށެވެ.
ނަމަވެސް އެ 46 މީހުންގެ ތެރެއިން ވައްކަމުގެ މައްސަލަތަކުގައި އެންމެ ފާހަގަ ކުރެވޭ 21 މީހަކަށް ޓާގެޓު ކޮށްގެން މިދިޔަ ހަފުތާއިން ފެށިގެން ފުލުހުން އޮޕަރޭޝަނެއް ހިންގަމުންދާ ކަމަށް އިހުސާން ވިދާޅުވި އެވެ.
އެ އޮޕަރޭޝަނުގެ ތެރެއިން 21 މީހުންގެ ތެރެއިން 10 މީހަކު މިހާރު ނޭޝަނަލް ޑްރަގް އޭޖެންސީގެ ފަރުވާއަށް ނަގާފައިވާ ކަމަށާއި އިތުރު ހަތަރު މީހަކު އެކި މައްސަލަތަކުގައި މިހާރު ހައްޔަރު ކޮށްފައިވާ ކަމަށް ވެސް އިހުސާން ވިދާޅުވި އެވެ. ދެން ބާކީ ތިބި ހަތް މީހުން ހޯދުމުގެ މަސައްކަތް ފުލުހުން ކުރަމުންދާ ކަމަށް އިހުސާން ވިދާޅުވި އެވެ.
"ދެން މި 21 މީހުން ނަގާލީމާ ވެސް މާލެ ތެރެއަށް ބޮޑު ބަދަލެއް އަންނާނެ ކަމަށް އަޅުގަނޑު ގަބޫލު ކުރަން، އެހެންނަމަވެސް މިދެންނެވި ބާކީ މިތިބަ 46 ދޭތެރޭގައި މިތިބަ ހުރިހާ މީހުންނަކީ ވެސް އަޅުގަނޑުމެން ގާނޫނުގެ ތެރެއަށް އެމީހުން ގެނެސް ރިހެބިލިޓޭޓު ކުރަންޖެހޭ މީހުން ކަމަށް އަޅުގަނޑު ގަބޫލު ކުރަން،" އިހުސާން ވިދާޅުވި އެވެ.
ވައްކަން ކުރާ މީހުން ބަންދު ނުކުރެވޭ ސަބަބަކީ ކޯޓުތަކުގެ އިހުތިސާސް ސާފު ނުވުން ކަމަށް އިހުސާން ވިދާޅުވި ނަމަވެސް ގާނޫނުގައި މިހާރު ވެސް ހައްޔަރު ކުރެވޭ މީހުންނާ މެދު އަމަލު ކުރަންޖެހޭ ގޮތާއި ކޯޓުތަކުގެ އިހުތިސާސްގެ ތެރޭގައި ހިމެނޭ މީހުންނާއި ނުހިމެނޭ މީހުން ވަރަށް ސާފުކޮށް ލިޔެފައިވެ އެވެ.
އެގޮތުން މަސްތުވާތަކެއްޗާ ބެހޭ ގާނޫނުގެ 35 ވަނަ މާއްދާގައި ޑްރަގް ކޯޓުގެ އިހުތިސާސް ހިނގާނެ ތިން ގިންތީގެ މީހުން ބަޔާން ކޮށްފައިވެ އެވެ. އެއީ:
- މަސްތުވާތަކެތި ބޭނުންކުރުމުގެ ކުށުގެ ނުވަތަ މަސްތުވާތަކެތި ޕެޑްލްކުރުމުގެ ކުށުގެ ދައުވާ އުފުލިފައިވާ މީހުން
- މަސްތުވާތަކެތި ބޭނުންކޮށްގެން، އޭގެ ނުފޫޒުގައި ހުރެ ކޮށްފައިވާ ޖިނާއީ ކުށެއްގެ ދައުވާ އުފުލިފައިވާ މީހުން
- ޖިނާއީ ކުށެއްގެ ހުކުމް ތަންފީޒުކުރަމުންދާ މީހުން
މިއިން ކޮންމެ ގިންތިއެއްގެ ތެރޭގައި ހިމެނޭ މީހުންގެ ތެރެއިން ޑްރަގް ކޯޓުގެ އިހުތިސާސް ހިނގާނެ މީހުން ވަކިވަކީން އެ މާއްދާގެ ށ. އިން ރ. އަށް ބަޔާން ކޮށްފައިވެ އެވެ.
ޑްރަގް ކޯޓުގެ އިހުތިސާސް ނުހިނގާނެ މީހުންގެ ގޮތުގައި އެ ގާނޫނުގެ 36 ވަނަ މާއްދާގައި ބަޔާން ކުރަނީ ހަ ބާވަތެއްގެ ކުށްވެރިންނެވެ. އެއީ:
- މީހަކު މެރުމުގެ ކުށް
- ޓެރަރިޒަމްގެ ކުށް
- ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކަކަށް އަމަލު ކުރުމުގެ ގާނޫނުގައި ކަނޑައަޅާފައިވާ ކުށެއް
- މަސްތުވާތަކެތި ޓްރެފިކް ކުރުމުގެ ކުށް
- ގަދަކަމުން ބަދު އަހުލާގީ އަމަލު ހިންގުމުގެ ކުށް
- މީގެ އިތުރުން މި ކުށްތަކުގެ ތެރެއިން ކުށެއްގައި ބައިވެރިވުމުގެ ކުށް ނުވަތަ އެއިން ކުށެއް ކުރުމުގައި އެހީތެރިވުމުގެ ކުށް
މި ގާނޫނުގެ ދަށުން މީގެ ކުރިން ވެސް އެކި މައްސަލަތަކުގައި ހައްޔަރު ކުރެވޭ މީހުން ހާޒިރު ކުރަނީ އެ މައްސަލައަކާ ގުޅުންހުރި ކޯޓަކަށެވެ.
