ވައްކަންތަކާއި ކުށްކުރުން އިތުރުވީ އެމްޑީޕީ ސަރުކާރުގައި ދޫކޮށްލި ކުށްވެރިންގެ ސަބަބުން ކަމަށް ފުލުހުންގެ ތަރުޖަމާނު އަހުމަދު ޝިފާން ސިފަކުރެއްވުން އެ ޕާޓީން ކުށްވެރިކޮށްފި އެވެ.
ޝިފާން މިހެން ވިދާޅުވީ "މާލޭގައި ވަގުންގެ ބޮޑު ނެޓްވޯކެއް، ހުއްޓުވޭނެ ގޮތެއް ނެތް!" މި ސުރުހީގެ ދަށުން "އަދަދު" ގައިި ޖެހި ރިޕޯޓް ސޯޝަލް މީޑިއާ އެކްސްގައި ހިއްސާކުރައްވަމުންނެވެ.
ޝިފާންގެ ވާހަކަތައް ކުށްވެރިކުރަމުން އެމްޑީޕީން ނެރުނު ބަޔާނުގައި ބުނީ އޭނާ އެހެން ވިދާޅުވީ "އެކަމަށް ބާރު ދޭނެ އެއްވެސް ހެއްކެއް، ތަފާސްހިސާބެއް، ދިރާސާއެއް ނުވަތަ ލިޔެކިޔުމެއް ނެތި ސިޔާސީ މަންފާއެއް ހާސިލުކުރުމުގެ ބޭނުމުގައި ކަމަށް" އެ ޕާޓީން ދެކޭ ކަމަށެވެ.
އެމްޑީޕީގެ ބަޔާނުގައި، އެ ޕާޓިގެ ސަރުކާރުގައި ކުށްވެރިން ދޫކުރުން ދިފާއުކޮށްފައިވެ އެވެ. އަދި ބުނީ ކުރީ ސަރުކާރުގައި ހުކުމް ތަންފީޒު ކުރަމުންދިޔަ މީހަކު މިނިވަން ކުރުމުގައި އަމަލުކުރީ، މައާފުދިނުމާއި އަދަބު ލުއިކޮށްދިނުމުގެ ގާނޫނުގައި ކަނޑައަޅައިފައިވާ އުސޫލުތަކާއި އިޖުރާއަތުތަކުގެ މަތިން ކަމަށެވެެ.
"އެކިއެކި ކުށްކުށުގައި ޖަލުގައި ބަންދުކޮށްފައި ތިބޭ މީހުންގެ ތެރެއިން، ޖަލުގެ އަހުލާގު ރަނގަޅު މީހުނާއި، ރީހެބިލިޓޭޓްކުރުމާއި މަސައްކަތް ދަސްކޮށްދިނުމަށް ޖަލުގައި ހިންގޭ އެކިއެކި ޕްރޮގްރާމްތައް ފުރިހަމަކުރާ ފަރާތްތަކުގެ ތެރެއިން، މުޖުތަމައުއަށް އަނބުރާ ގެނެސް، އަލުން ދިރިއުޅުން ބިނާކުރުމަށް އިތުރު ފުރުސަތެއް ދެވިދާނެފަދަ މީހުން ފާހަގަކޮށް، ދެންނެވުނު ޤާނޫނުގައި ބަޔާންކުރާ ހަމަތަކުގެ މަތީން އެމީހުން މިނިވަންކޮށްފައިވާނެ،" އެމްޑީޕީން ބުންޏެވެ.
އޭގެ އިތުރުން އެ މީހުން މިނިވަންކޮށްފައިވަނީ މިނިވަންކުރާ ދުވަހުން ފެށިގެން އެއް އަހަރުގެ ތެރޭގައި އިތުރު ޖިނާއީ ކުށެއް ނުކުރުމަށް ޝަރުތުކޮށް، އެ މުއްދަތުގައި ޖިނާއީ ކުށެއް ކޮށްފިނަމަ، އިތުރު ހުކުމެއް ކުރުމަކާ ނުލައި އެ މީހަކު އަލުން އަނބުރާ ޖަލަށް ގެންގޮސް، މައާފުކުރެވުނު ހުކުމުގެ ބާކީ ބައި ތަންފީޒުކުރަން ފަށަންޖެހޭ ގޮތަށް ކަނޑައަޅައިފަވާނެ ކަމަށް ބުނެފައިވެ އެވެ.
އެހެންކަމުން މިހާރު އެ ބުނާ 10 މަސް ދުވަސް ކުރީގެ މުއްދަތުގެ ތެރޭގައި ދޫކޮށްފައި ތިބި ބަޔަކު ކުށެއް ކޮށްފިނަމަ، އެ މީހަކު އަނބުރާ ޖަލަށް ލުމުގެ ގާނޫނީ ފުރުސަތު އޮންނާނެ ކަމަށާއި، އެކަން ނުކުރުމުން އެނގެނީ އެއީ އެ ޕާޓީގެ ސަރުކާރުން މިނިވަންކޮށްފައިވާ މީހުން ނޫންކަން ކަމަށް ވެސް ބުންޏެވެ.
އޭގެ އިތުރުން އެމްޑީޕީން ވަނީ ނިމުނު ރައްޔިތުންގެ މަޖިލީހުގެ އިންތިހާބާ ދިމާކޮށް ކުށްވެރިންތަކެއް ދޫކުރުމުން ނުހަނު ކަންބޮޑުވާ ކަމަށާއި، އެ މީހުން ދޫކުރީ ފުރިހަމަ ކުރަން ޖެހޭ އިޖުރާއަތްތައް ފުރިހަމަ ނުކޮށް ކަމުގެ ތުހުމަތު އޮތްއިރު، ދޫކޮށްލި މީހުންގެ ލިސްޓު އާންމު ކުރުމަށް ގޮވާލާފަ އެވެ.
ބަޔާން ނިންމާލަމުން އެމްޑީޕީން ވަނީ ކުށް ކުރުން ހުއްޓުވޭނީ ފުރިހަމައަށް ގާނޫނު ތަންފީޒުކުރުމާއެކު، ސަރުކާރުން ގާނޫނީ ޒިންމާ އަދާކޮށްގެން ކަމަށް ވާއިރު، ކުށް ކުރުން ހުއްޓުވުމުގެ ގާނޫނީ ޒިންމާއިން ބަރީއަވުމުގެ ބަދަލުގައި އެ ޒިންމާ އަދާކޮށް، މުޖުތަމައުގެ އަމާންކަމާއި ރައްޔިތުންގެ ރައްކާތެރިކަން ކަށަވަރުކޮށްދިނުމަށް ވެސް ސަރުކާރަށް ގޮވާލާފަ އެވެ.
