ދައުލަތަށް ލިބުނު ޓެކްސް އާމްދަނީ ކުރީ އަހަރަށް ވުރެ އިތުރުވީއިރު، ޓެކްސް ނޫން އާމްދަނީ ދަށް ވެއްޖެ ކަމަށް ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ހަފުތާގެ މާލީ ތަފާސްހިސާބުތަކުން ހާމަވި ކަމަށް އިއްޔެ ރިޕޯޓުކުރި އެވެ. ފިނޭންސް މިނިސްޓްރީގެ އެންމެ ފަހުގެ ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކާ ގޮތުގައި، މި މަހުގެ 6 އާ ހަމައަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 15.4 ބިލިއަން ރުފިޔާ ލިބިފައިވެ އެވެ.
ދައުލަތަށް ލިބުނު އާމްދަނީގެ ބޮޑު ބަޔެއް ހިއްސާކުރަނީ ޓެކްސް އާމްދަނީ އެވެ. ޓެކްސްގެ ގޮތުގައި 12.4 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ އެ މުއްދަތަށް ވުރެ 1.1 ބިލިއަން ރުފިޔާ އިތުރު އަދަދެކެވެ. ޓެކްސް އާމްދަނީ ލިބުނު ދާއިރާތަކުގެ ތެރެއިން އެކްސްޕޯޓު އިމްޕޯޓު ދާއިރާގެ ޓެކްސްތައް، އެއީ އިމްޕޯޓު ޑިއުޓީ އާއި ރޯޔަލްޓީ، ފިޔަވައި އެހެން ހުރިހާ ދާއިރާއަކުން ލިބުނު އާމްދަނީ ވަނީ އިތުރުވެފަ އެވެ. ހާއްސަކޮށް ޓޫރިޒަމް ޖީއެސްޓީ އާއި ބިޒްނަސް އެންޑް ޕްރޮޕަޓީ ޓެކްސްތަކުން ލިބުނު އާމްދަނީ ކުރީ އަހަރަށް ވުރެ ވަރަށް ބޮޑަށް އިތުރެވެ. ޓެކްސް ނޫން އާމްދަނީގެ ގޮތުގައި އެންމެ ފަހުގެ ރިޕޯޓާ ހަމައަށް 2.7 ބިލިއަން ރުފިޔާ ލިބިފައިވާއިރު، މިއީ ކުރީ އަހަރުގެ އެ މުއްދަތަށް ވުރެ 966 މިލިއަން ރުފިޔާ މަދު އަދަދެކެވެ.
ޓެކްސް ނޫން އާމްދަނީ ލިބުނު ދާއިރާތަކުގެ ތެރެއިން ޖުމްލަކޮށް ހުރިހާ ދާއިރާއަކުން ވެސް ކުރީ އަހަރާ އެއް ވަރަށް ނޫނީ އެއަށް ވުރެ ގިނައިން އާމްދަނީ ލިބިފައިވާއިރު، އެންމެ ބޮޑު ވެއްޓުމެއް ދައްކަނީ އެހެނިހެން ޓެކްސް ނޫން އާމްދަނީތަކުންނެވެ. މިދިޔަ އަހަރު މި އާމްދަނީ 853.6 މިލިއަން ރުފިޔާގައި ހުރި ނަމަވެސް މި އަހަރު އަދި ލިބުނީ 149.5 މިލިއަން ރުފިޔާ އެވެ. މިއީ 82 ޕަސެންޓުގެ ވެއްޓުމެކެވެ. އެހެނިހެން ޓެކްްސް ނޫން އާމްދަނީގެ ތެރޭގައި ހިމެނޭ އާމްދަނީއަކީ ކޮބައިކަން ސާފު ނުވާތި މިހާ ބޮޑު ތަފާތެއް އައި ސަބަބެއް އަދި ނޭނގެ އެވެ. ޓެކްސް ނޫން އާމްދަނީ މަދު ނަމަވެސް، ޓެކްސް އާމްދަނީއަށް އައި ބޮޑު ކުރިއެރުމާއެކީ ޖުމްލަ އާމްދަނީ 300 މިލިއަނަށް ވުރެ ގިނަ ރުފިޔާއިން އިތުރުވެ.
