ކުޑަކުދިންނާމެދު ލާއިންސާނީ އަމަލުތައް ހިންގާ ގައުމުތަކުގެ "ބްލެކް ލިސްޓް" އަށް އިޒްރޭލު އިތުރުކުރަން އދ އިން ނިންމައިފި އެވެ.
އިޒްރޭލުން އދ އަށް ކަނޑައަޅުއްވާފައި ހުންނަވާ އެމްބެސެޑަރު ގިލާޑް އެރްދާން ވިދާޅުވީ ކުޑަކުދިންނާމެދު ލާއިންސާނީ އަމަލުތައް ހިންގާ ލިސްޓަށް އިޒްރޭލު ލާން ނިންމިކަން ޔޫއެންގެ ސެކެޓްރީ ޖެނެރަލް އެންޓޯނިއޯ ގުޓިއަރޭޒް ރަސްމީކޮށް އަންގަވާފައިވާ ކަމަށެވެ.
އިޒްރޭލުގެ އެމްބެސެޑަރު ވަނީ އދ ގެ މި ނިންމުމަށް ވަރަށް ބޮޑަށް ފާޑުވިދާޅުވެ، ބްލެކް ލިސްޓަށް ލާން ޖެހެނީ ގުޓިއަރޭޒް ކަމަށާއި، ގުޓިއަރޭޒް އިޒްރޭލާ ދެކޮޅަށް ހިންގާ ޓެރެރިޒަމްގެ އަމަލުތަކަށް ހިތްވަރު ދެމުން ކަމަށެވެ.
ނަމަވެސް ގުޓިއަރޭޒްގެ ތަރުޖަމާން ސްޓެފަން ދުޖަރިކް ވިދާޅުވީ އިޒްރޭލުގެ އަމަލުތައް ކުށްވެރިކުރާ ކަމަށާއި ލިސްޓަށް އިޒްރޭލު ލާން މަސައްކަތް ކުރަނީ ރަނގަޅަށް ކަމަށެވެ.
އދ ގެ ނިންމުމަށް ފަލަސްތީނުގެ ކަމާބެހޭ ފަރާތްތަކުން ވަނީ މަރުހަބާ ކިޔާފަ އެވެ. އަދި އިޒްރޭލުން ދަނީ ފަލަސްތީނުގެ ކުޑަކުދިންނަށް އަމާޒުކޮށް ލާއިންސާނީ ގިނަ އަމަލުތައް ހިންގަމުން ކަމަށް ވެސް ބުނި އެވެ.
އިޒްރޭލުން ފަލަސްތީނުގައި ހިންގަމުންދާ ގަތުލްއާންމުގައި މިހާތަނަށް 36،700 އަށްވުރެ ގިނަ މީހުން ވަނީ މަރާލާފަ އެވެ. އަދި އޭގެ ތެރޭގައި 15،500 އަށްވުރެ ގިނަ ކުޑަކުދިން ހިމެނެ އެވެ.
