ފަލަސްތީނުގެ ނުސެއިރަތު ރެފިއުޖީ ކޭމްޕަށް އިޒްރޭލުން ހަމަލާދީ 210 މީހުން މަރާލައި، 400 އަށް ވުރެ ގިނަ މީހުން ޒަހަމްކޮށްލައިފި އެވެ.
އިޒްރޭލުން ނުސެއިރަތު ކޭމްޕަށް ހަމަލާދިނީ ހަނގުރާމައިގެ އަސީރުން މިނިވަން ކުރުމުގެ ނަމުގަ އެވެ. އެ ހަމަލާތަކަށްފަހު މުޖާހިދުން އަތުން އިޒްރޭލުގެ ހަތަރު މީހަކު ސަލާމަތް ކުރި ކަމަށް އިޒްރޭލުން ބުނެ އެވެ.
ރެފިއުޖީ ކޭމްޕަށް ދިން ހަމަލާގައި ވަރަށް ގިނަ ކުޑަކުދިންނާއި އަންހެނުން ވެސް މަރާލާފައިވާ ކަމަށް ގާޒާގެ އޮފިޝަލުން ބުނެ އެވެ. އެކަމަކު އެ އަދަދުތައް އަދި ސާފެއް ނުވެ އެވެ.
އިޒްރޭލުން ހިންގި އޮޕަރޭޝަނުގެ ތެރެއިން ޔަހޫދީ އެއް ސިފައިންގެ މީހަކު ވެސް މަރުވި ކަމަށްވެ އެވެ.
އޮކްޓޯބަރު 7، 2023، ގައި އިޒްރޭލުން ފެށި ގަތުލުއާންމުގައި 36،801 މީހުން މިހާރު ވަނީ މަރާލައިފަ އެވެ. އޭގެ ތެރޭގައި 15،000 އަށް ވުރެ ގިނަ ކުޑަކުދިން ހިމެނެ އެވެ. އަދި އިޒްރޭލުގެ ހަމަލާތަކުގައި 83،680 މީހުން ވަނީ ޒަހަމްކޮށްލާފައިވާއިރު 10،000 އަށް ވުރެ ގިނަ މީހުން ވަނީ ގެއްލިފަ އެވެ.
