އިޒްރޭލުގެ ޕާސްޕޯޓުގައި ރާއްޖެއަށް އެތެރޭ ނުވެވޭނެ ގޮތަށް އެ ޕާސްޕޯޓު މަނާ ކުރުމަށް ގާނޫނަށް ގެންނަންޖެހޭ ބަދަލުތައް ގެންނަން ވަޒީރުންގެ މަޖިލީހުން ނިންމާފައިވާ ނިންމުމަށް، ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ފައިރޫޝް ދެކޮޅުހައްދަވައިފި އެވެ.
އިޒްރޭލުގެ ޕާސްޕޯޓު މަނާކުރަން ސަރުކާރުން ނިންމީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލުއާންމާއި ލާއިންސާނީ އަމަލުތަކާ ގުޅިގެންނެވެ. މިއީ ދިވެހި އާންމުން ވޭތުވެދިޔަ ހަ މަހެއްހާ ދުވަހު ގޮވާލަމުންދިޔަ ކަމެކެވެ.
މިކަމާ ގުޅިގެން ފައިރޫޝްގެ އެކްސް އެކައުންޓުން ކުރެއްވި ފުރަތަމަ ޕޯސްޓުގައި ވިދާޅުވީ، ރާއްޖޭގެ ހާރިޖީ ސިޔާސަތު ބިނާކުރަން ޖެހެނީ ސޯޝަލް މީޑިއާގައި އާންމުން ބުނާ ބަހަށް ބަލާ، އެ މީހުން ހިތްހަމަ ޖެއްސުމަށް ނޫން ކަމަށެވެ.
"ހާރިޖީ ސިޔާސަތު ބިނާކުރަން ޖެހެނީ ގައުމުގެ ވަސީލަތްތަކާއި މާލީ ހާލަތް އަދި އެކު ޖުމްލަ ގައުމަށް ކުރާނެ ފައިދާއަށް ބަލައިގެން،" ފައިރޫޝް ލިޔުއްވާފައިވެ އެވެ.
ދެވަނައަށް އޭނާ ވަނީ އިޒްރޭލް ޕާސްޕޯޓް ބޭން ކުރަން ނުފެންނަނީ ކޮން ސަބަބުތަކަކާ ހުރެ ތޯ ސުވާލު އުފައްދާ، ފާރިޝް މައުމޫން ކުރެއްވި ޕޯސްޓަކަށް ރައްދު ދެއްވާފަ އެވެ.
އެގޮތުން، އިޒްރޭލު ޕާސްޕޯޓު މަނާކުރުމުން އެ ތަނުގެ މުސްލިމުންނާއި ދެ ގައުމެއްގެ ރައްޔިތުކަން އޮންނަ މީހުންނަށް ވެސް ރާއްޖެ ނާދެވޭނެ ކަމަށެވެ. މީގެއިތުރުން މި ނިންމުމުގެ ސަބަބުން ރާއްޖޭގެ އިގުތިސާދަށް ގެއްލުން ލިބޭނެ ކަމަށާއި ގައުމީ ސަލާމަތަށް ވެސް ނުރައްކާވާނެ ކަމަށް ފައިރޫޝް ވަނީ ވިދާޅުވެފަ އެވެ.
މިކަމާ ގުޅިގެން ގިނަ ބަޔަކު ދަނީ ސޯޝަލް މީޑިއާގައި ފައިރޫޝްއަށް ފާޑުކިޔަމުންނެވެ.
ހަޔާ އެޑިއުކޭޝަންގެ ސްޓޭޓް މިނިސްޓަރުގެ މަގާމަށް ފައިރޫޝް އައްޔަން ކުރީ މި އަހަރުގެ ޖެނުއަރީ މަހުގެ ތެރޭގަ އެވެ. އޭނާއަށް މުސާރައިގެ ގޮތުގައި ދައުލަތުގެ ބަޖެޓުން މަހަކު 43,500 ރުފިޔާ ދެ އެވެ.
ފުލުހުންގެ ވަޒީފާއިން ރިޓަޔާކުރެއްވުމާއި އޮސްޓްރޭލިއާގައި ވަޒީފާ އަދާކުރެއްވުން
ފައިރޫޝް ފުލުހުންގެ ހިދުމަތުން ރިޓަޔާ ކުރެއްވީ ޖެނުއަރީ، 2021، ގަ އެވެ. ޝަރަފުވެރިކަމާއެކު އޭނާ ރިޓަޔާކުރެއްވީ ހިދުމަތަށް 20 އަހަރު ފުރުމުން އަމިއްލައަށް އެދިގެންނެވެ.
ނަމަވެސް އޭނާ ރިޓަޔާ ކުރުއިރު، އޭނާގެ މައްޗަށް ކުރެވުނު ސީރިއަސް މައްސަލަތަކަށް ހޯމް މިނިސްޓްރީން ރިއާޔަތް ނުކުރާ ކަމަށް ރައްޔިތުންގެ މަޖިލީހުން ވަނީ ނިންމާފަ އެވެ. މަޖިލީހުން އެގޮތަށް ނިންމީ ފައިރޫޝް ރިޓަޔާ ކުރުމާއެކު އޭރު މަޖިލީހުގެ ރައީސްގެ މަގާމުގައި ހުންނެވި ކުރީގެ ރައީސް މުހައްމަދު ނަޝީދު ހުށަހެޅުއްވި މައްސަލައެއްގަ އެވެ.
އެ މައްސަލަ ދިރާސާކޮށް 241 ކޮމިޓީން އެކުލަވައިލި ރިޕޯޓްގައި ފައިރޫޝްގެ މައްޗަށް މައްޗަށް އާންމު އިޖުތިމާއީ މިންގަނޑުން ބޮޑެތި ތުހުމަތުތަކެއް ކުރެވިފައިވާކަން ވެސް ކޮމިޓީ ރިޕޯޓްގައި ހުށަހެޅި ހުށަހެޅުންތަކުގެ ތެރެއިން ވަނީ ފާހަގަކޮށްފަ އެވެ.
މައްސަލަ ދިރާސާކުރުމުގެ ތެރެއިން ކޮމިޓީގެ މެމްބަރުން ހޯމް މިނިސްޓަރު އިމްރާން އަބްދުﷲ އާއެކު ބޭއްވި ބައްދަލުކުރެއްވުމުގައި، ފައިރޫޝްގެ މައްޗަށް ފެބްރުއަރީ، 2012، ގައި ރާއްޖޭގައި ހިނގައިދިޔަ ހަމަނުޖެހުންތަކާ ގުޅިގެން ކުރެވޭ ތުހުމަތުތައް ފާހަގަކޮށްފަ އެވެ.
އެފަދަ ތުހުމަތުތަކެއް ކުރެވިފައިވާ މީހަކު ޝަރަފުވެރިކަމާއެކު ރިޓަޔާކުރުމަށް ފުރުސަތު ދިނުމާ ގުޅޭގޮތުން މެމްބަރުން ވަނީ ކަންބޮޑުވުން ފާޅުކޮށް ވާހަކަދައްކައިފަ އެވެ.
ރިޓަޔާ ކުރެއްވުމަށްފަހު ފައިރޫޝް އޮސްޓްރޭލިއާއަށް ދިރިއުޅުން ބަދަލުކުރައްވާ އެ ގައުމުގެ ޔުނިވަސިޓީއެއްގައި ލެކްޗަރާއެއްގެ ގޮތުގައި ވަޒީފާ އަދާކުރައްވާފަ އެވެ.
