ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގެ ދަރިކަނބަލުން މަރިޔަމް ސާޖިދާ، ސަރުކާރުގެ ކަރަންޓު ކުންފުނި (ސްޓެލްކޯ) ގެ ބޯޑު މެންބަރުކަމަށް އައްޔަންކޮށްފި އެވެ.
އެ ކުންފުނީގެ ވެބްސައިޓުގައިވާ ގޮތުން ސާޖިދާ އެ މަގާމަށް އައްޔަން ކުރީ މެއި 27، ގަ އެވެ. ސާޖިދާ އަކީ 20 ވަނަ ރައްޔިތުންގެ މަޖިލީހުގެ ފެލިދޫ ދާއިރާގެ މެންބަރު އާދަމް ޒާހިރުގެ އަނބިކަނބަލުންވެސް މެ އެވެ.
ސްޓެލްކޯގެ ވެބްސައިޓުގައި ބުނެފައިވާ ގޮތުން ސާޖިދާ، އެ ކުންފުނީގެ ބޯޑަށް އައްޔަންކޮށްފައިވަނީ ނޮން އެގްޒެކެޓިވް ޑިރެކްޓަރެއްގެ ގޮތުގަ އެވެ.
މީގެއިތުރުން، ވެބްސައިޓުގައި ހިއްސާކޮށްފައިވާ ކުރު ވަނަވަރުގައި ބުނެފައިވާ ގޮތުން ސާޖިދާ ވަނީ އިނގިރޭސިވިލާތުގެ ކޮވެންޓަރީ ޔުނިވާސިޓީ އިން ބިޒްނަސް އެޑްމިނިސްޓްރޭޓިވް ދާއިރާއިން މާސްޓާސް އަދި އެ ގައުމުގެ ހާޓްފަޑްޝާ ޔުނިވަސިޓީން އެކައުންޓިން ދާއިރާއިން ބީއޭ އެއްވެސް ހާސިލް ކުރައްވާފަ އެވެ.
އަދި ސާޖިދާ ވަނީ އެކައުންޓިން ދާއިރާއިން ގިނަ އަހަރުތަކެއްގެ ތަޖުރިބާ ހާސިލްކުރައްވާފައި ކަމަށްވެސް ބުނެފައިވެ އެވެ.
ކުންފުނީގެ ބޯޑު މެންބަރުކަން ސާޖިދާއަށް ލިބުމާ ގުޅިގެން ސްޓެލްކޯއިން ކުރި ސޯޝަލް މީޑިއާ ޕޯސްޓަށް ވަނީ ގިނަ ބައެއްގެ ފާޑުކިޔުން އަމާޒުވެފަ އެވެ. އެގޮތުން މަޖިލިސް ރައީސްގެ އާއިލީ ބޭފުޅަކަށް މަގާމެއް ދިނުމާއި ނިމިދިޔަ ދެ މަހުގެ ކަރަންޓު ބިލު ބޮޑުވުމާ ގުޅުވާ ގިނަ ބަޔަކު ވަނީ ކުންފުންޏަށް ފާޑުކިޔާފަ އެވެ.
