ދިގު ވާހަކަ: ނިމުތު

ދިގު ވާހަކަ: ނިމުތު

ތޫނު ހިމަ ތަދެއް ކަނދުރާމަތިން ކަނާއަތު ބޮނބިފަޅިއާ ދިމާއަށް ދުވެލަދުވެލާ ހުއްޓެވެ. ހަށިގަނޑު ތެދުކޮށްލީމެވެ. ލުޔެއް ނުވިއެވެ. ބަދަލެއް ނައެވެ. ދެފަރާތަށް ބޯ އަރިކޮށްލީމެވެ. ކަނދުރާއާއި މައިކަށްޓާ ގުޅޭ ހިސާބުގައި ހުރި ތަދު އަމާންދިނެވެ. ސްކުރީނަށް ގެއްލި ދުނިޔެމަތިން ހަނދުމަނެތިފައި އިނުމުން ހަށިގަނޑުން އެކަމުގެ އިންޒާރު ދެނީކަމަށް ހިތްބުންޏެވެ.

ގަޑިއަށް ބަލައިލެވުނެވެ. މެންދަމުން އަލިވެ ދޭއް ޖަހަނީއެވެ. ކުރަމުން ދިޔަ މަސައްކަތް ވެސް ކުޑައަޑިވީއެވެ. ދެން އޮތީ ފަހު މަންޒަރެވެ. އޭރުން، މުޅި މަސައްކަތުން އަތްދޫކޮށްލެވޭނެއެވެ. ހިތްވަރެއް ކޮށްލައިފިނަމަ ބައިގަޑިއެއްހާ އިރުން ނިންމައިލެވޭނެއެވެ. ވަރުބަލިކަން އިހުސާސްވިއެވެ. ބަނޑަށް އެނގުންވިއެވެ. ބަދިގެއަށް މިސްރާބު ޖެހީމެވެ.

ޖޯޑުނަގައި ސަމުސާ އަތަށް ހެޔޮކޮށްލީމެވެ. ގަހުވަދަޅު ހަލުވާލަމުން މަތި ނެގީމެވެ. މާޔޫސްވިއެވެ. ދަޅު އަރިކޮށްލީމެވެ. ސަމުސަލުން ދަޅުގެ ފޫކަހައިލީމެވެ. ފުން ނޭވާއެއް ބޭރުކޮށްލެވުނެވެ. މި ވަރުން ފުއްދައިލާނީއޭ ހިތަށް އެރިއެވެ. ނެގުނު އެތިކޮޅު ޖޯޑަށް އަޅައި ފޫފޮރުވޭވަރަށް ހޫނު ފެންފޮދެއް އަޅައި ގިރައިލީމެވެ. ހިތުގެ ޝަކުވާތަކާ އެއްވަރަށް ސަމުސާގެ މިޔުޒިކީ އަޑުއިވެމުން ދިޔައެވެ. އެއް ކޯވަރުން ފުއްދައިލީމެވެ.

Advertisement

ކޮޓަރިއަށް ވަދެ ބަލައިލެވުނެވެ. ނިދީގެ ކުންނުގައި މިޔުޒިކު ކުޅެމުންދިޔަ ސާރާގެ މޫނަށް ބަލައިލެވުނެވެ. އެނދުގައި އޮތް ދެ އަހަރަށްދާ ފާލިހާއި ތިން އަހަރުގެ ޝާޒް ފެނުމުން ހިނިތުން ވެވުނެވެ. އެއީ އަހަރެންގެ ދުނިޔެއެވެ. ނިދި ޤުރުބާން މި ކުރަނީ އެމީހުންނަށް ޓަކައެވެ. ދަރީންގެ މާދަމާއަށް ޓަކައެވެ.

އަހަރެން ކަހަލަ އަމިއްލަ ހިޔާވަހިކަމެއް ނެތް މީހަކަށް މާލެއަކީ ވޭނެކެވެ. އަހުވައެކެވެ. މަސް ފެށޭއިރު ޖަމާވާ ފައިސާކޮޅު، ލޮލަށް ނުފެނި ޖަމާކޮށްލަން މި ޖެހެނީ ހިލޭ މީހަކަށެވެ. ގޭތެރެ ހަމައަކަށް އެޅުވުމަށާއި ބިލްތަކަށް ކާންދޭން ޖެހެނީ ދެވަނަ ވަޒީފާއަކުންނެވެ. އާއިލާއާއެކު އުފާވެރި ވަގުތުކޮޅެއް ހޯދަން ބޭނުންނަމަ ދެން މި ޖެހެނީ ކުދިކުދި މަސައްކަތުން އިތުރުކުރާށެވެ. އަހަންނަކީ ބިނާރާއި ގެދޮރުކުރެހުމަށް ޝައުޤުވެރިކަން ހުންނަ، އެ ދާއިރާގައި ހޭކެމުން، ގޭނެމުން ދިރިއުޅުން ބިނާކުރާ މީހެކެވެ. ނިދުމުގެ ކުރިން ތިން ގަޑިއެއްހާއިރު ހުސްކުރާން މި ޖެހެނީ އެކި ގޮތްގޮތުން އަމިއްލައަށް ހޯދާ މަސައްކަތްތަކަށެވެ.

"ފަރޫހް!" ނިދިމޯޅީގައި އޮވެ ސާރާ ގޮވާލިއެވެ. "ފަތިހު ހޭލަން ޖެހޭނެއްނު."

ފުން ނޭވާއެއް ބޭރުކޮށްލެވުނެވެ. ސާރާގެ މޫނަށް ބަލައިލެވުނެވެ. އޭނާ އޮތީ ލޯ މަރައިގެންނެވެ. އިރުކޮޅެއް ނުވަނީސް ސާރާގެ ނިދީގެ އަޑުން ކޮޓަރި ގުގުމައިލިއެވެ. އެއީ އޭނާގެ އާދައެވެ. އިރުއިރު ކޮޅާ ހޭލާނެއެވެ. ގޮވާލާނެއެވެ. އަހަރެން ހަރަކާތްތައް ބަލާނެއެވެ. އަނތްބެއްގެ މަޤާމަށް ސާރާއަކީ ފަސްމީރުކުރިރުކެކެވެ. އޭނާގެ މައިވަންތަ އުނގަކީ އުފާވެރިކަމުގެ މަކާނެކެވެ. ނިޔަނެތިކަމުގެ ކުންނެވެ.

ދުވަހީ ތާވަލު ބޮލަށް ލައިގެން، އެއްތަނުގައި ދެފައި ނުޖެހި އަހަންނަށް މިހެން އުޅެވެނީ ސާރާ ހިތްވަރުދޭތީއެވެ. އިހުސާންތެރިކަމާއެކު އިހުސާސްތައް ދަންނާތީއެވެ. އެއް ޚިޔާލުން ދުނިޔެ ބިނާކުރުމުގައި މަދަދުވެރިވާތީއެވެ.

ދެވަނަ ފަހަރަށް ސާރާ ގޮވާލިއެވެ. އަހަންނަށް ބަލައިލެވުނީ މޭޒުމަތީގައި ހުރި ލެޕްޓޮޕްގެ ސްކުރީނަށެވެ. ދިރުންލިބެމުން ދިޔަ މަންޒަރުތަކަށެވެ. ޚިޔާލީ އެ ތަސައްވަރަށެވެ.

އާއެކެވެ. ލޮލަށް ފެންނަވަރު މި ކުރަނީ ވެރިއެއްގެ ތަސައްވަރީ މަންޒިލެކެވެ. ނަމަވެސް އަހަރެންގެ ޚިޔާލެވެ. ވިސްނުމެވެ. މިއީ ބިނާވެށީގެ ދާއިރާއިން ރާއްޖޭ ފަޚުރުވެރިވާނެ ފަދަ ސަހަރެކެވެ. އެފަދަ ބިނާތަކެވެ. މަތިންނާއި ތިރިންނާއި އަޑީން ގުޅިފައިވާ އަވަށްތަކެވެ. ދެވަނައެއް ނެތް އުއްމީދެކެވެ. މިރޭ ދިރުން މި ގެންނަނީ އެ ސަހަރުގެ އަމާންކަމުގެ ފަސްލަށެވެ. އެ ބާބަށެވެ. މިއީ މާދަމާގެ ރާއްޖެއެވެ. ހިތުގެ ޝިކާޔަތުގެ ހައްލެވެ.

މަޑުމަޑުން ދެ ލޯ މަރައިލީމެވެ. އޭރުއްސުރެ، ކަނދުރާމަތިން ދުވެދުވެ ހުރި ހިމުން ތަދާއި ނަގައިގަތް ދިލަގަނޑުގެ އައްސި އާލާވި ކަހަލައެވެ. އެ ތޫނު ހިމަ ތަދަށް ތަސައްލީއެއް ލިބޭތޯ އަނެއްކާ ވެސް ހަރަކާތްކޮށްލީމެވެ. ބުރަކަށި ތެދުކޮށްލާ މޯޅިއަކަށް ދެމިލީމެވެ. ލުޔެއް ނުލިބުނެވެ. ކޮޅަށް ތެދުވެވުނީ ބޭއިޚްތިޔާރުގައެވެ. ލޮލަށް ބަރުޖެހެމުން ދިޔުމުންނެވެ.

ލެޕްޓޮޕާއި ލެޕްޓޮޕެވެ. މަސައްކަތާއި މަސައްކަތެވެ. އެނދާ ދިމާއަށް ދަމާ ގެންދިޔައީ ނޭނގޭ ބާރަކުންނެވެ. އެނދު ފެނުނު އިރު ދެ ލޯ މެރިއްޖެއެވެ. އިސާހިތަކު ނިދީގެ ވާދީއަށް ގެނބި ގަނެވިއްޖެއެވެ.

މަތިން އިވުނު ބޫންއަޑާއެކު ސިހިފައި ބަލައިލެވުނެވެ. ހީވީ ރަނގަޅަށެވެ. އިވުނީ ސައިރަންގެ ބާރު އަޑުފަށްގަނޑެވެ. އަޑު އައީ ކަނާއަތު ކަންފަތާ ދިމާ މަތިންނެވެ. އޭރު ކުޑަކުޑަ ޑްރޯނެއް ބޯމަތިން މޫނާހަމައަށް ތިރިވަނީއެވެ. އަހަންނަށް ކިޔައިލެވުނީ ތާނައިން ލިޔެފައިވާ އެ އުޅަނދުގެ ނަމެވެ.

"އާނ! އަހަންނަކީ މި ވިލީގެ ފުލުހުންގެ ފާރަ ގެމައިގެ 'ސައްލޯ'. މި ވިލީގެ އުސޫލުތަކާއި ގަވާއިދުތަކާ މުޙައްމަދު ފަރޫހް ހިލާފުވެއްޖެ،" އުޅަނދުން އިވުނީ، ބަރުބަރު ފިރިހެން އަޑެކެވެ. "ތަޙްޤީޤު ނިމެންދެން އަޅުގަނޑުމެންގެ ބެލުމުގެ ދަށަށް ގެންދިޔުމުގެ ކޯޓު އަމުރު އޮންނާނެ ތިޔަބޭފުޅާގެ މެއިލްގައި."

އަހަންނަށް ދެ ލޯ ބޮޑުކޮށްލެވުނެވެ. ފާޑަކަށް ބަލަން ހުރެވުނީއެވެ. މަސްނޫޢީ އުޅަނދުތަކުން މީހުން ހިފާ ހައްޔަރު ކުރާން ފެށީ ހެއްޔެވެ؟ އަމާންކަން ބެލެއްހެއްޓުމަށް ފަންނިއްޔާތު ފައްކާކުރީ ހެއްޔެވެ؟ ހިތަށް ތިލަވި ސުވާލު ދުލުން ބޭރުވިއެވެ. ލަހެއް ނުވެ ޖަވާބު އިވުނެވެ. ހުރިހާ ސުވާލަކަށް ޖަވާބުދެނީ ސައްލޯއެވެ. ސައްލޯއަކީ އަމާންކަން ބެލެއްޓުމުގައި ޤާނޫނީ ބާރުދީގެން އުފަންކޮށްފައިވާ ދިވެހީންގެ އަމިއްލަ އީޖާދެއްކަމަށް ބުނެދިނެވެ. އެއީ ކުޑަކުޑަ އުޅަނދެކެވެ. އެ ގެމައިގައި އެކި އުޅަނދުތައް ހަރަކާތްކުރާނެ ކަމަށް ބުނެދިނެވެ.

ސައްލޯގެ ކުޅަދާނަކަން ފެނިފައި އަހަންނަށް ހުރެވުނީއެވެ. ހައިރާން ވެފައެވެ. ފާޑަކަށް ބަސް ހުއްޓިފައެވެ. ސައްލޯގެ ކެމެރާ އަހަރެންގެ މޫނާ ކައިރިކޮށްލިއެވެ. މޫނުގެ ފޮޓޯއެއް ނެގިއެވެ. މައުލޫމާތުތައް ކަމާބެހޭ މަރުކަޒަށް ފޮނުވިކަން އިޢުލާންކުރިއެވެ. އަހަންނަށް ކުރެވުނު ކުށަކީ ކޮބައިތޯ ސުވާލުކޮށްލެވުނެވެ. ސުވާލު ތަކުރާރުކޮށްލީމެވެ.

"ޤާނޫނު ނަންބަރު 34/2030ގެ ހާގައި ބަޔާންކޮށްފައިވާ ގޮތާ ޚިލާފަށް މަގުމައްޗަށް ކުނިއެޅުން. ސުޕާރީ ޕެކެޓު ދުވާރު މައްޗަށް ވައްޓައިލުން. ޤާނޫނު ނަންބަރު 9/2040ގެ ނޫނުގައިވާ ގޮތާ ޚިލާފަށް އާއްމު ސަރަހައްދުތަކުގައި ދުންފަތުގެ އިސްތިއުމާލުކުރުން. މަގުމަތީގައި ވޭޕްކުރުން."

"ކުދިކުދި ކަންކަން ވެސް މަނާވީތަ؟" އަހަންނަށް އަހައިލެވުނެވެ.

ވާހަކަ ނުނިމެނީސް ސައްލޯ ފެށިއެވެ. ތަހުޒީބު ވެށްޓެއްގައި އެއީ ކުދިކުދި ކަންކަން ނޫންކަމަށް ބުނެދިނެވެ. އަދި ޤާނޫނު ތަޞްދީޤުކޮށް ގެޒެޓުކުރުމާއެކު ދިވެހިރާއްޖޭގައި ދިރިއުޅޭ ކޮންމެ މީހެއްގެ މޮބައިލް އާލާތްތަކާއި އެމީހެއްގެ ސުމޭކީ އެކައުންޓަށް އެ ޤާނޫނެއްގެ އޯޑިއޯ، ވީޑިއޯގެ އިތުރުން، ލިޔުމުގެ ނަކަލެއް ފޮނުވާން ފެށިފަހުން ދަހަރެއް ފާއިތުވިކަން ހަނދުމަކޮށްދިނެވެ. ޤާނޫނަށް އަދާހަމަވުމަކީ ފަރުދީ ޒިންމާކަމުގައި ބުނެދިނެވެ.

"އަމުރަށް ކިޔަމަންނުވާނަމަ، ބާރުގެ ބޭނުންކޮށްގެން ފިޔަވަޅު އަޅާނެ ވާހަކަދަންނަވަން." އެންމެފަހުން ސައްލޯ އިންޒާރުދޭން ފެށިއެވެ.

"ފިޔަވަޅު؟" އަހަރެން ދެ ލޯ ބޮޑުކޮށްލީމެވެ.

"ގޭސް ޖެހުން. ގޭސް ޖަހާނީ އަމުރަށް ކިޔަމަން ނުވީމަ،" ސައްލޯގެ ރާގު ބަދަލުވިއެވެ. "އެހައި ހިސާބުން ފުރަތަމަ ކުށް އެ ސާބިތުވީ. އަމުރަށް ކިޔަމަން ނުވެއްޖެނަމަ ދިހަ ދުވަހުގެ ޖަލު ހުކުމެއް އަންނާނެ. ފުރަތަމަ ތަންފީޒުކުރާނީ އަމުރަށް ކިޔަމަން ނުވުމުގެ ކުށުގެ އަދަބު."

(ނުނިމޭ)

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox