ކުށްވެރިންގެ ފަރާތުން ހުށަހަޅާ ރިޝްވަތާއި ދައްކާ ބިރަށް ފުލުހުން ނުގުޑެން ހޯމް މިނިސްޓަރު އަލީ އިހުސާން ރޭ ގޮވާލައްވައިފި އެވެ.
ފުލުހުންގެ އަސާސީ ތަމްރީން ކޯހުގެ ދަސްވެނިވުމުގެ ހިނގާލުމުގައި އިހުސާން ވިދާޅުވީ ފުލުހުންގެ ވާޖިބު އަދާކުރަން ހުރަސްއަޅާ މީހުން ރިޝްވަތު ހުށަހަޅައި، އިންޒާރުދީ ބިރުދެއްކިޔަސް ފުލުހުންގެ އަޒުމުގެ މަތީގައި ތިބެ މަގްސަދު ހާސިލުކުރަން އެދިވަޑައިގަންނަވާ ކަމަށެވެ.
"... މިކަންކަން ވިޔަ ނުދިނުމަށް ދައުލަތުގެ އެތެރެއިންނާއި ބޭރުން އަދި އެކަންކަން ކުރުމުގައި ޝާމިލުވާ މީހުންގެ ފަރާތުން ރިޝްވަތު ހުށަހެޅުމާއި، އިންޒާރުދީ ބިރުދެއްކުމާއި، ފުރައްސާރަކޮށް ތިކުދިންގެ މަސައްކަތަށް ހުރަސްއެޅުމަށް މަސައްކަތްކުރާނެ. ތަމްރީނުގެ ބޭނުމަކީ އަދި ފުލުހުންގެ އަޒުމުގެ މަތީގައި ނުގުޑާ ތިބުމަކީ އަދި ކުރާ ހުވަޔާ އެއްގޮތަށް އަމަލުކުރުމަކީ މިފަދަ ހުރަސްތަކުގެ ތެރެއިން ވެސް އަޅުގަނޑުމެންގެ މަގްސަދު ހާސިލްކުރުން. ތި ކުދިންގެ ފަރާތުން މިކަން މިގޮތަށް ކުރާތަން ފެންނާނެ ކަމާމެދު އަޅުގަނޑު ޝައްކެއް ނުކުރަން،" އިހުސާން ވިދާޅުވި އެވެ.
ރާއްޖޭގެ ދާހިލީ ސަލާމަތާއި ރައްކާތެރިކަން ކަށަވަރުކޮށް، ރައްޔިތުންނަށް އަމާން މާހައުލެއް ގާއިމުކޮށްދިނުމަކީ މި ސަރުކާރުގެ އެއް އަމާޒު ކަމަށާއި ކުށްކުރުން މަދުކޮށް ކުށަށް އަރައިގަންނަ މީހުންގެ މައްސަލަ އަވަހަށް ތަންފީޒުކޮށް ރައްޔިތުންނަށް އިންސާފު ގާއިމުކޮށްދިނުމަކީ ދައުލަތުގެ ވާޖިބެއް ކަމަށެވެ.
"ރާއްޖެއަކީ މަސްތުވާތަކެތިން އެއްކޮށް ސަލާމަތްކޮށްފައިވާ މުޖުތަމައުއަކަށް ހެދުމާއި، ރާއްޖެއަކީ ގޭންގު ހަދައިގެން ކުށް ކުރަމުންދާ ވެއްޓެއްގެ ގޮތަށް އޮތް އޮތުން ބަދަލުކުރުމާއި، ރާއްޖޭގައި ގަވާއިދާ ހިލާފަށް އުޅެމުންދާ ބޭރު މީހުންގެ ކަންކަން ގާނޫނީ އިމަށް ގެނައުމަށް އެހީތެރިވުމަކީ މީގެ ތެރެއިން އެންމެ މުހިންމު ކަންކަން. ތަމްރީން ފުރިހަމަކޮށް ފުލުހުންގެ ސަފުތަކާ ގުޅޭ ކުދިންގެ ފަރާތުން އަޅުގަނޑު އެދެނީ މިދެންނެވި ކަންކަން ކާމިޔާބު ކުރުމަށް ތިކުދިންގެ ވެރިންގެ އިރުޝާދާ އެއްގޮތަށް ގަދައަޅާ މަސައްކަތް ކުރުމަށް،" އިހުސާން ވިދާޅުވި އެވެ.
މިގޮތުން އެކަން ކުރުމަށް އެންމެ މުހިންމު ދައުރެއް އަދާކުރަނީ ފުލުހުން ކަމަށް ފާހަގަކުރައްވާ އިހުސާން ވިދާޅުވީ ދިވެހި ސަރުކާރާއި ދިވެހި ރައްޔިތުން ފުލުހުން ކިބައިން އެދޭ ކަންތައްތަކާއި ކުރާ ފޮނި އުންމީދުތަކެއް އެބަހުރި ކަމަށެވެ.
އިހުސާން ވިދާޅުވީ ފުލުހުންގެ މަސައްކަތަށް ބޭނުންވާ ހުރިހާ އެހީތެރިކަމާއި އެއްބާރުލުން ފުރިހަމައަށް ދޭނެ ކަމަށެވެ.
