އަންނަ މަސް ނިމުމުގެ ކުރިން ގެދޮރުވެރިކަމާ ބެހޭ ކޮމެޓީއެއް މަޖިލީހުގައި އުފައްދަވާނެ ކަމަށް މަޖިލީހުގެ ނައިބު ރައީސް، އަހުމަދު ނާޒިމް ވިދާޅުވެއްޖެ އެވެ.
ޕަބްލިކް ސާވިސް މީޑިއާ (ޕީއެސްއެމް) ގައި ވާހަކަ ދައްކަވަމުން ނާޒިމް ވިދާޅުވީ ގެދޮރުވެރިކަމާ ބެހޭ ކޮމެޓީއެއް ވުޖޫދު ކުރުމުގެ ބޭނުމަކީ ގެދޮރުވެރިކަމާ ގުޅޭ މައްސަލަތައް ދިރާސާކޮށް އެ މައްސަލައަށް ދާއިމީ ހައްލެއް ހޯދުން ކަމަށެވެ. އެގޮތުން ފާއިތުވި މުއްދަތުގައި ގެދޮރުވެރިކަމާ ގުޅޭ ކަންކަން ކުރިއަށް ގެންގޮސްފައި ހުރި ގޮތާ މެދު ރައްޔިތުންގެ އޮތް ހިތްހަމަ ނުޖެހުންތަކަށް ވެސް ހައްލު ލިބިގެންދާނެ ކަމަށެވެ.
"މިހާރު ވެރިކަން ކުރާ ޕާޓީން (ޕީއެންސީން) ބޭނުންވޭ ގެދޮރުވެރިކަމާ ބެހޭ ކޮމެޓީއެއް މުޅިން އަލަށް ތައާރަފު ކުރަން ،އެހެން ނަމަވެސް އެކަން މިއަދު [އިއްޔެ] ކުރެވޭ ގޮތް ނުވީ، ސަބަބަކީ އެއީ ގެދޮރުވެރިކަމާ ބެހޭ ބައެއް ކަންތައްތަކުގެ މެންޑޭޓު އޮތް ބައެއް ކޮމެޓީ މިހާރު ވެސް އެބަހުރި، އެހެންވީމާ އެ ކޮމެޓީތަކުގެ މެންޑޭޓާ ކުޅެ އެކަންތައްތައް ބަދަލު ކުރާހާ ވަގުތެއް މިއަދަކު ނެތް އެހެންވީމަ އަޅުގަނޑުމެން އާންމު ކޮމެޓީގެ ފަރާތުން މަޖިލީހުގެ ގަވާއިދަށް ގެންނަ ބަދަލުތަކުގެ ތެރޭގައި ޖޫން މަސް ނިމެންވާއިރަށް އެ ކޮމެޓީ ވެސް ވުޖޫދަށް ގެންވޭނެކަމަށް އަޅުގަނޑުމެން މި ބަލަނީ، މަޖިލީހުގެ އައު ގަވާއިދާ އެއްކޮށް،" ނާޒިމް ވިދާޅުވި އެވެ.
ނާޒިމް ވިދާޅުވީ އަލަށް އުފައްދަވާ ގެދޮރުވެރިކަމާ ބެހޭ ކޮމެޓީއަށް އެކަމާ ބެހޭ ހުރިހާ މައްސަލަތަކެއް ހުށަހެޅުމުން އެ މައްސަލަތައް ދިރާސާކޮށް ހައްލު ކުރުމަށް މަގު ކޮށިގެންދާނެ ކަމަށެވެ.
އެ ކޮމެޓީ ވުޖޫދު ކުރުމަށްޓަކައި މަޖިލީހުގެ ގަވާއިދަށް ގެންނަންޖެހޭ ބަދަލުތައް ގެނައުމަށާއި މަޖިލީހުގެ ގަވާއިދު އިސްލާހު ކުރުމުގެ މަސައްކަތް އިއްޔެ އާންމު ކޮމެޓީއާ ހަވާލުކޮށްފައިވާނެ ކަމަށާއި އަންނަ ހޯމަ ދުވަހު ބާއްވާ ޖަލްސާގައި މަޖިލީހުގެ ކޮމެޓީތައް އިއުލާނު ކުރެވޭނެ ކަމަށް ނާޒިމް ވިދާޅުވި އެވެ.
"އެގޮތަށް ކޮމެޓީއަކާ މިފަަދަ ހައްސާސް މައްސަލައެއް ހަވާލު ކުރީމާ އަޅުގަނޑު ގަބޫލު ކުރާ ގޮތުގައި ދާއިމީ ހައްލެއް މި މައްސަލައަށް ގެނައުމަށް ވެސް އެޅިގެންދާނެ ވަރަށް ބޮޑު ބާރެއް،" ނާޒިމް ވިދާޅުވި އެވެ.
"އެހެންވީމާ އެ ކޮމެޓީ ވާނެ އެ މައްސަލަ ހައްލުކޮށް މިހާރު ހުރި މައްސަލަތައް ދެނެގަނެ، އެކަންކަން ހައްލު ކޮށްދެން މަގުފަހިކޮށްދޭނެ ބަޔަކަށް އަލަށް އުފެދޭ ކޮމެޓީ ވާނެ."
ގެދޮރުވެރިކަމާ ބެހޭ ހާއްސަ ކޮމެޓީއެއް އެކުލަވައިލާ ވާހަކަ ނާޒިމް ދެއްކެވިއިރު، މިދިޔަ ސަރުކާރުން ދޫކުރި ފުލެޓާއި ގޯތިތައް ހަވާލު ކުރުން ލަސްވާތީ އެކަމުގެ ޝަކުވާ ވަނީ އިންތިހާއަށް ބޮޑުވެފަ އެވެ.
މިދިޔަ ސަރުކާރުން ވަނީ ގެދޮރުވެރިޔާ ސްކީމަށް އެދި ހުށަހެޅި މީހުން ގެ ތެރެއިން ޝަރުތު ހަމަވާ ހުރިހާ އެންމެންނަށް ފުލެޓު ދޭން ނިންމައިފަ އެވެ. ފުލެޓުތަކަށް އެދި ހުށަހެޅި 20،697 މީހުންގެ ތެރެއިން 15،046 މީހުންގެ ޝަރުތު ހަމަވި އެވެ.
ޝަރުތު ހަމަވި މީހުންގެ ތެރެއިން ފުރަތަމަ 4000 ފުލެޓު ލިބޭ މީހުންގެ ގޮތުގައި މިދިޔަ ސަރުކާރުން ކަނޑައެޅީ ތިން ކޮޓަރީގެ އެޕާޓުމަންޓަށް ޝަރުތު ހަމަވާ މީހުންގެ ތެރެއިން 76 އަކަށް ވުރެ މަތިން ޕޮއިންޓު ލިބުނު މީހުންނާއި ދެ ކޮޓަރީގެ އެޕާޓުމަންޓަށް ޝަރުތު ހަމަވާ މީހުންގެ ތެރެިން 73 އަކަށްށްވުރެ މަތިން ޕޮއިންޓު ލިބުނު މީހުންނަށެވެ.
ނަމަވެސް ގެދޮރުވެރިޔާގެ ދަށުން ފުލެޓުތައް ދޫކޮށްފައިވާ ގޮތް ތަހުގީގު ކުރުމަށްފަހު އޭސީސީން ބުނެފައި ވަނީ މިދިޔަ ސަރުކާރުން އިއުލާނު ކުރި ފުލެޓު ލިސްޓުގައި ޝަރުތު ފުރިހަމަވެ، އެއްވެސް މައްސަލައެއް ފާހަގަކުރެވިފައި ނުވާ ފޯމުތަކުގެ ނިސްބަތަކީ 20.7 ޕަސެންޓު ކަމަށާއި، އަދި ޝަރުތު ފުރިހަމަވީީ ނަމަވެސް މައްސަލަ ހުރި ފޯމުތަކުގެ ނިސްބަތަކީ 19.7 ޕަސެންޓު ކަމަށެވެ.
އެ ރިޕޯޓާ ގުޅިގެން ވަކި ގޮތެއް އަދި ސަރުކާރުން ނިންމާފައި ނުވާއިރު، ފުލެޓުތައް ދޫކުރާނެ ގޮތެއް ކަނޑައަޅަން ހައުސިން މިނިސްޓަރީން ވަނީ ކޮމެޓީއެއް އެކުލަވައިލައިފަ އެވެ. ނަމަވެސް އެ މައްސަލަ ބަލަމުންދާކަމަށް ބުނުން ފިޔަވައި އިތުރު އެއްވެސް ތަފުސީލެއް މިހައިތަނަށް ހާމަކޮށްފައެއް ނުވެ އެވެ.
