ފެމިލީ ކޯޓަށް ހުށަހަޅާ މައްސަލަތަކަށް ބަލާއިރު، ޒަވާޖީ ހަޔާތަށް ޒުވާން ޖީލުގެ ހޭލުންތެރިކަން ކުޑަކަން އެނގޭ ކަމަށާއި އެކަން ހައްލުކުރުމަށް ތައުލީމީ މަރުހަލާގައި ޒަވާޖީ ހަޔާތަށް ހޭލުންތެރިކުރުވަން ޖެހޭ ކަމަށް ފެމިލީ ކޯޓުގެ އިސްގާޒީ އިބްރާހީމް މާހިރު އިއްޔެ ވިދާޅުވި އެވެ.
އިއްޔެ ފާހަގަ ކުރި ބައިނަލް އަގުވާމީ އާއިލާތަކުގެ ދުވަހުގެ މުނާސަބާގައި ނެރުއްވި ބަޔާނެއްގައި ގާޒީ މާހިރު ވިދާޅުވީ ގިނަ ކައިވެނިތައް ރޫޅެން ދިމާވާ ސަބަބުތަކަށް ބަލާއިރު، ޖެހޭ މައްސަލައިގެ ބޮޑުމިނަށް ވުރެ މައްސަލަ ހައްލު ނުވެ ހޭދަވާ މުއްދަތު ދިގުވުން ފާހަގަ ކުރެވޭ ކަމަށެވެ. އެފަދަ މައްސަލަތައް ހައްލުކުރަން އެކަށީގެންވާ މަސައްކަތްތަކެއް ނުކުރެވޭކަން ފާހަގަކުރެެވޭ ކަމަށް ވެސް އޭނާ ވިދާޅުވި އެވެ.
"ފެމިލީ ކޯޓަށް ހުށަހެޅޭ މައްސަލަތަކަށް ބަލާއިރު، ޒަވާޖީ ހަޔާތަށް މިއަދުގެ ޒުވާންޖީލުގެ ހޭލުންތެރިކަން ކުޑަކަން ފާހަގަކުރެވޭ. މިހާލަތު ރަނގަޅުކުރުމަށް ޓަކައި ތައުލީމީ މަރުހަލާގައި ޒަވާޖީ ހަޔާތަށް ހޭލުންތެރިކަން އިތުރުކުރަން ޖެހޭ ކަމަށް ދެކެން،" ބަޔާނުގައި ގާޒީ މާހިރު ވިދާޅުވި އެވެ.
ވަރިކުރަން އެދި ފެމިލީ ކޯޓަށް ހުށަހަަޅާ މައްސަލަތަކުގައި ވަރިކުރަން ހުށަހަޅަނީ "އަނބިމީހާ ކިޔަމަންނުވާތީ" ކަަމަށް، ގިނަ ފިރިހެނުން ބުނާ ކަަމަށާއި ގިނަ އަންހެނުން ހުށަހަޅާ ސަބަބަކީ "ފިރިމީހާ އަނބިދަރިންނަށް އަޅައިނުލުން" ކަަން ބަޔާނުގައި ގާޒީ މާހިރު ފާހަގަކުރެއްވި އެވެ.
"ރަށްޓެހިންނާ އެކު ކޮފީތަކުގައި އެތައް ވަގުތެއް ފިރިމީހާ ހޭދަކުރާ އިރު، އަނބިމީހާއަށް ވަގުތު ނުދޭ ކަމަށް ބުނޭ. އަނބިމީހާގެ އުދާސްތައް ބޭރުކޮށްލަން، އޭނާގެ ވާހަކަ އަހާނެ ކަންފަތެއް ގޭތެރޭގައި ނުލިބޭކަމީ ވަރަށް ގިނަ އަންހެނުންކުރާ ހައްގު ޝަކުވާއެއް،" ބަޔާނުގައި ގާޒީ ވިދާޅުވި އެެވެ.
ވަރި ގިނަވާ ސަބަބެއްގެ ގޮތުގައި ފެމިލީ ކޯޓަށް މި ފަހުން ފާހަގަކުރެވިފައިވާ އަނެއް ސަބަބަކީ އަންހެނުންގެ ހައްގުތައް ހޯދައިދިނުމުގެ ނަމުގައި، ކައިވެނިތައް ރޫޅައިލަން (ބަޔަކު) ހިތްވަރު ދިނުމެވެ. އެގޮތަށް ކަންތައް ކުރުުމުން އަންހެނުން އިތުރަށް ނިކަމެތިވެ، ކުޑަކުދިންގެ ހައްގުތަކުން ދަރިން މަހުރޫމުވާ ކަން ފާހަގަކުރެވޭ ކަމަށް ވެސް އެކޯޓުން ފާހަގަކުރެ އެވެ.
