ރައްޔިތުންގެ މަޖިލީހުގެ އިންތިހާބު 2024، އޮބްޒާވް ކުރުމުގައި ހަރަކާތްތެރިވި އިންޓަނޭޝަނަލް އޮބްޒާވަރުންގެ ޕްރެސް ކޮންފެރެންސްގައި އިލެކްޝަންސް ކޮމިޝަން (އީސީ) ގެ އިންތިޒާމުތަކަށް ތައުރީފުކޮށް ވާހަކަ ދައްކައިފި އެވެ.
އިއްޔެ ހެނދުނު 8:00 އިން ހަވީރު 5:30 އަށް ވޯޓު ލުން ކުރިއަށް ގެންގޮސް އޭގެ ފަހުން ރޭގަނޑު 9:00 އާ ހަމައަށް ހުރިހާ ފޮއްޓެއްގެ ވޯޓު ގުނާ ނިންމި އިރު މުޅި އިންތިހާބުގެ ކަންކަން ދިޔައީ ވަރަށް އޮމާންކޮށެވެ. އެއްވެސް ޒާތެއްގެ ހަމަނުޖެހުމެއް ހިނގައިފައެއް ވެސް ނެތެވެ.
މި އިންތިހާބު އޮބްޒާވް ކުރުމަށް ނުވަ ގައުމަކުން 19 އޮބްޒާވަރުން ބައިވެރިވި އެވެ.
މިއަދު އިންޓަނޭޝަނަލް އޮބްޒާވަރުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޗީފް އޮބްޒާވަރު ޑރ. ޝަހަބުއްދީން ޔައުގޫބު ގުރައިޝީ ވިދާޅުވީ ބޭއްވީ އިންޓަނޭޝަނަލް ލެވެލްގައި ގުނައިލެވޭ ފެންވަރުގެ އިންތިޒާމުތައް ހުރި އިންތިހާބެއް ކަމަށެވެ.
އޭނާ ވަނީ ގޮނޑިތައް އަތުރާފައިވާ ގޮތުން ފެށިގެން ވޯޓުލާ މަރުކަޒުގައި ހަރަކާތްތެރިވި އިލެކްޝަންސް ކޮމިޝަންގެ އޮފިޝަލުން މުހާތަބު ކުރުމާއި އާންމުންނާ މުއާމަލާތް ކުރި ގޮތަށް ވެސް ތައުރީފުކޮށްފަ އެވެ.
"އިންތިހާބުގެ މާހައުލުން ފެނުނީ ވަރަށް ތަހުޒީބު ބައެއް، ވޯޓުލާ މަރުކަޒުތަކުގައި ތިބި އޮފިޝަލުން މުހާތަބު ކުރަނީ ވަރަށް އިހުތިރާމާއި މަޑުމައިތިރި ކަމާ އެކު،" އޭނާ ވިދާޅުވި އެވެ.
ބޫޓާން އިލެކްޝަންސް ކޮމިޝަނުން ބައިވެރިވި އޮބްޒާވަރު ގޮވިންދަރު ސްވިދީ ވިދާޅުވީ ރާއްޖޭން ބޭރުގައި ދިރިއުޅޭ ދިވެހިންނަށް ވޯޓު ލުމުގެ އިންތިޒާމުތައް އީސީން ހަމަޖައްސާފައިވާ ގޮތަކީ މުޅި ދުނިޔެއަށް އޮތް ބޮޑު ނަމޫނާއެއް ކަމަށެވެ. އެ އިންތިޒާމުތައް ދެކިފައި އޭނާއަށް އެ ކަން ވަރަށް ކަމުދިޔަ ކަމަށް ވިދާޅުވި އެވެ.
"ގިނަ ގައުމުތަކުގައި އަދިވެސް ވަރަށް ދަތީގައި އޮތް ކަމެއް އެއީ، އެހެން ގައުމުތަކުގައި އުޅޭ އެ ގައުމުގެ މީހުން އިންތިހާބުތަކުގައި ބައިވެރިކުރުން، ރާއްޖެއަށް ގޮންޖެހުންތަކެއް ހުރި ކަން ވެސް އެނގުނު، އެކަމަކު އީސީއެމްއިން ކާމިޔާބުކޮށް އެ ހިންގާ ގޮތަކީ އަހަރުމެން ގައުމުގައި ހިއްސާ ކުރާނެ ކަމެއް،" އޭނާ ވިދާޅުވި އެވެ.
ރީރަޖިސްޓްރޭޝަންގެ މަސައްކަތާއި ޓާން އައުޓަށް ވެސް ބޭރުގެ އޮބްޒާވަރުން ތައުރީފު ކުރި އެވެ. މި ފަހަރު މަޖިލިސް އިންތިހާބުގައި ވޯޓުލާ މީހުންގެ 75 އިންސައްތަ ވޯޓުލީ ނަމަވެސް މިއީ މަޖިލިސް އިންތިހާބެއްގައި ޓާން އައުޓްގެ އެންމެ ދަށް ނިސްބަތެވެ. އެހެން ނަމަވެސް މި ނިސްބަތަކީ ރަނގަޅު އަދަދެއްގެ ނިސްބަތެއް ކަމުގައި އިންޓަނޭޝަނަލް އޮބްޒާވަރުން ފާހަގަ ކުރި އެވެ.
ވިހިވަނަ ރައްޔިތުންގެ މަޖިލީހުގެ އިންތިހާބުގައި 93 ދާއިރާއަށް މެންބަރުން އިންތިހާބު ކުރިއިރު އިންތިހާބު ކާމިޔާބު ކުރީ ވެރިކަންކުރާ ޕީއެންސީންނެވެ. ޕީއެންސީގެ ޓިކެޓުގައި ވާދަކުރި 66 ކެންޑިޑޭޓުން ގޮނޑި ކާމިޔާބުކުރި އެވެ. ސަރުކާރުން ތާއީދު ދިން، ގޮނޑި ކާމިޔާބު ކުރި އަމިއްލަ ކެންޑިޑޭޓުން ހިމެނުމުން އެ އަދަދު 70 އަށް ވުރެ މަތި އެވެ.
