ޕީއެންއެފްގެ ޖަލްސާ ހުއްޓުވަން ގިޔާސުއްދީންއަށް އެސްއޯ ފުލުހުން ގޮސް އާންމުންނާ ދެކޮޅަށް ރޭ ބާރުގެ ބޭނުން ކުރި ގޮތް ރިވިއު ކުރުމަށްފަހު ފިޔަވަޅު އަޅަން ސަރުކާރުން އަންގައިފި އެވެ.
ގިޔާސުއްދީން ސްކޫލަށް ރޭ އެސްއޯ ފުލުހުން ނެރުނު މައްސަލައިގެ ތަހުގީގު ރިޕޯޓު ބެލުމަށްފަހު މައިގަނޑު ފަސް ކުރުމަށް ސަރުކާރުން ފުލުހުންނަށް އެންގި އެވެ. އޭގެ ތެރޭގައި އެސްއޯ ފުލުހުން ރޭ ބާރުގެ ބޭނުން ކުރި ގޮތް ރިވިއުކޮށް "އަޅަންޖެހޭ ފިޔަވަޅުތައް އެޅުން" ހިމެނެ އެވެ.
އޭގެ އިތުރުން އެސްއޯ ފުލުހުން ޑިޕްލޮއި ކުރާނެ ހާލަތްތައް އަލުން އެކުލަވާލައި، އެ ހާލަތްތަކުގައި ވެސް ސީޕީގެ ހުއްދަ ނަގަންޖެހޭ ގޮތަށް ބަދަލު ކުރަން ސަރުކާރުން އެންގި އެވެ.
ހޯމް މިނިސްްޓްރީ މެދުވެރިކޮށް ސަރުކާރުން ފުލުހުންނަށް އެންގި ކަންކަން:
- އެސްއޯ ފުލުހުން އެންގޭޖްވާންޖެހޭ ހާލަތްތައް އަލުން ކަނޑައަޅައި، އެ ހާލަތްތަކުގައި ވެސް ސީޕީގެ ހުއްދަަ ނަގަންޖެހޭ ގޮތަށް ހެދުން
- ފުލުހުންގެ އޮޕަރޭޝަނަލް ކޮމާންޑް އެންޑް ކޮންޓްރޯލް އަލުން ރީސްޓްރަކްޗާ ކުރުން
- ޕީއެންއެފްގެ ޖަލްސާއަށް އެސްއޯ ފުލުހުން ނެރުނު ގޮތް ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ތަހުގީގުކޮށް، އިހުމާލުވެފައިވާ މީހުންނަށް ފިޔަވަޅު އެޅުން
- އޮޕަރޭޝަނަލް ހާލަތްތުގައި މީޑިއާއަށް މައުލޫމާތު ދޭ ގޮތް މުރާޖައުކޮށް، މިހާރަށްވުރެ ދެ ފުށް ފެންނަ ގޮތަށް ހެދުން
- ޕީއެންއެފް ޖަލްސާގައި އެސްއޯ ފުލުހުން ބާރުގެ ބޭނުންކޮށްފައިވާ ގޮތް ޔޫސް އޮފް ފޯސް ރިވިއު ކޮމިޓީން ބަލައި، އަޅަންޖެހޭ ފިޔަވަޅުތައް އެޅުން
މިއަދު ބައެއް މީޑިއާތަކަށް މައުލޫމާތު ދެއްވަމުން ރައީސް މުއިއްޒު ވިދާޅުވީ ރޭ ހިނގި ކަންތައްތަކާ އެމަނިކުފާނު ހިތާމަ ކުރައްވާ ކަމަށެވެ. ރޭގައި ފުލުހުން ހަރަކާތްތެރިވީ ގޯސްކޮށް ކަމަށް ވެސް އެމަނިކުފާނު ވިދާޅުވި އެވެ.
"އެހެން އޮއްވައި ރޭގަ މި ފެނުނީ ވަރަށް ގޯސްކޮށް. އަޅުގަނޑު ވަރަށް ކްލިއާ އިންސްޓްރަކްޝަން ދީފަ އޮންނާނީ އެއްގޮތަކަށް ވެސް ނުވާނެއޭ އެސްއޯ ފުލުހުން ފޮނުވައިގެނެއް، އެއްގޮތަކަށް ވެސް ނުވާނެއޭ. ފޮނުވަންޖެހިއްޖެޔާ އަޅުގަނޑަށް އެނގޭނެއޭ މި ގައުމުގައި އެ ހިސާބަށް ދިޔައީމަ، އަޅުގަނޑު ދަންނަވާނަމޭ އެވަރުގެ ކަމެއް ކުރަންޖެހިއްޖެއްޔާ،" ރައީސް ވިދާޅުވި އެވެ.
ޕީއެންއެފްގެ ޖަލްސާއަށް ފުލުހުން ހުރަސް އެޅިއިރު ރައީސް ހުންނެވީ ކެމްޕެއިން އިވެންޓެއްގަ އެވެ. އެސްއޯ ފުލުހުން ނުފޮނުވަން އަންގަވާފައި އޮތް ނަމަވެސް ގިޔާސުއްދީނަށް ފުލުހުން ގޮސް ހިނގި ކަންތައްތަކުގެ މައުލޫމާތު ފުލުހުން އަދި ހޯމް މިނިސްޓަރު ވެސް އެމަނިކުފާނަށް ނާންގާ ކަމަށް ރައީސް ވިދާޅުވި އެވެ.
"އިވެންޓު ނިމިގެން އަޅުގަނޑަށް މައުލޫމާތު ލިބުނީ އަދި ނޫހުން އަޅުގަނޑަށް ފޮޓޯ މި ފެނުނީ އެސްއޯ ފުލުހުން ގޮސްފަ އެތަނުގަ ބެރިކޭޑް ޖަހާ ދެން އެކި ކަންތައްތައް ހިންގި ތަން. އެއީ ވަރަށް ހިތާމަ ކުރާކަމެއް އަޅުގަނޑުގެ ވަރަށް ސާފު އިންސްޓްރަކްޝަން އޮތް ކަމެއްގައި އެހެން ދިޔައީމަ،" ރައީސް ވިދާޅުވި އެވެ.
ރައީސް އެހެން ވިދާޅުވި ނަމަވެސް ރޭ ގިޔާސުއްދީން ސްކޫލަސް ފުލުހުން ފޮނުވީ ސީދާ ރައީސް އަންގަވައިގެން ކަމަށް ޕީއެންއެފްގެ އިސް ވެރިން ބުނެ އެވެ. އެކަން އެނގިވަޑައިނުގަންނަވާ ކަމަށް ރައީސް ވިދާޅުވަނީ "ޑެމޭޖް ކޮންޓްރޯލް" ކުރަން ކަމަށް ވެސް ޕީއެންއެފް އިން ބުނެ އެވެ.
