ވެރިކަން ކުރާ ޕީޕީއެމް/ޕީއެންސީ ކޯލިޝަނުގެ އައްޑޫ ސިޓީ ފޭދޫ ދެކުނު ދާއިރާގެ ޕާޓީގެ ރަސްމީ އިދާރާ އާއި ޖަގަހަ ބަދަލުކޮށް، އެތަނުގައި ހުރި ހުރިހާ މުދަލެއް އާ ޖަގަހައަށް ބަދަލުކުރަން ޕީއެންސީގެ ޗެއާޕާސަން، އަބްދުއްރަހީމްގެ ސިޓީއަކުން ފޭދޫ ސްޓިއަރިން ކޮމެޓީގެ މެންބަރުންނަށް އަންގަވައިފި އެވެ.
ފޭދޫ ޕީޕީއެމް/ޕީއެންސީ އިދާރާ އާއި ޖަގަހަ ބަދަލުކުރަން އެ ކޯލިޝަންގެ ލީޑާޝިޕުން އެންގީ ކުރިއަށް އޮތް މަޖިލިސް އިންތިހާބުގައި ޕީއެންސީގެ ޓިކެޓުގައި ވާދަކުރާ އިބްރާހިމް ދީދީ (އައިބީ) ގެ ކެމްޕެއިން ހަރަކާތްތައް ކުރިއަށް ގެންދަން އެ ދާއިރާގެ ޖަގަހަ އާއި ވަސީލަތްތައް ބޭނުންނުކުރެވޭ މައްސަލައިގަ އެވެ.
އެގޮތުން "އަދަދު" އަށް ކޮޕީއެއް ލިބިފައިވާ، ފޭދޫ ސްޓިއަރިން ކޮމިޓީއަށް ފޮނުވި ސިޓީގައިވާ ގޮތުގައި އައިބީގެ ކެމްޕޭނަށް ފޭދޫ ދާއިރާގެ ރައީސް އާއި ސްޓިއަރިން ކޮމެޓީގެ މެންބަރުންގެ އެއްބާރުލުމާއި ޖަގަހަ ހިންގުމަށް ބޭނުން ކުރާ ތަން ވެސް އައިބީއަށް ބޭނުން ނުކުރެވެ އެވެ. މިހެންކަމުން ހަތް ދުވަހުގެ ތެރޭގައި ކުރީގެ އިދާރާ އާއި ޖަގަހައިގައި ހުރި ހުރިހާ މުދަލެއް މިހާރު އެ ޕާޓީގެ ރަސްމީ އިދާރާކަމުގައި ކަނޑައަޅާފައިވާ އަސުރުމާގެއަށް ބަދަލުކުރަން ސިޓީގައި އަންގާފައިވެ އެވެ.
ޕާޓީ ލީޑާޝިޕުން ވަނީ ކުރިއަށް އޮތް ތަނުގައި އައިބީގެ ކެމްޕޭނުގައި ފޭދޫ ސްޓިއަރިން ކޮމެޓީގެ އެންމެހައި މެންބަރުން ވެސް ބައިވެރިވެދީ އެހީތެރިވެދިނުމަށް ވެސް އަންގާފަ އެވެ.
އަބްދުއްރަހީމްގެ ސިޓީއަކުން އެގޮތަށް އަންގާފައިވާއިރު، މައުލޫމާތު ލިބިފައިވާ ގޮތުގައި އައްޑޫ ސިޓީ ފޭދޫގައި ޕްރޮގްރެސިވް ކޯލިޝަންގެ ޖަގަހައެއް ހިންގަމުން އައީ އެ ދާއިރާގެ ސްޓިއަރިން ކޮމެޓީގެ ރައީސް، އަބްދުﷲ ރަފީއުގެ އަމިއްލަ ހަރަދުގަ އެވެ. އަބްދުﷲ ރަފީއުއަކީ ޕީއެންސީގެ މަޖިލިސް ޕްރައިމަރީގައި އައިބީއާ ވާދަކޮށް ނާކާމިޔާބުވި ކެންޑިޑޭޓެވެ.
