ގޭބިސީތަކުގެ ބުޑުގައި ހުންނަ މިސްކިތްތަކުގައި ބަންގި އާއި ގަމަތުގެ އަޑު ބޭރަށް ހުރުން ރަނގަޅު ކަމަށާއި ނަމަވެސް، ނަމާދުކުރާ އަޑު ރަނގަޅީ މިސްކިތުގެ އެތެރެއަށް ހުންނަ ގޮތަށް ބެހެއްޓުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގެ ކުރީގެ މެމްބަރު އިބްރާހިމް އިސްމާއީލް އެކްސްގައި ކުރެއްވި ޕޯސްޓަކާ ގުޅިގެންނެވެ.
"މި ގޭދޮށު ގޭގޭގެ މީހުނަށް އިޝާ ނަމާދު ކޮށްލެވޭނީ މިސްކިތުން ތަރާވީޙު ނަމާދުކޮށް ނިމުނީމަ އެވެ. މިއީ ކޮންމެ ރޯދަ މަހެއްގެ ވެސް ހާލެވެ. ރީތިކޮށް ކިޔަވާ ނަމަވެސް ރަނގަޅެވެ،" ޝާހީމް ޓެގްކުރައްވައި އިބްރާހިމް އިސްމާއީލް ކުރެއްވި ޕޯސްޓުގައި ވިދާޅުވި އެވެ.
ރައްދުގައި ޝަހީމް ވިދާޅުވީ މިހެންނެވެ؛
"ގޭބިސީތަކުގެ ބުޑުގައި ހުންނަ މިސްކިތްތަކުގައި އަޑުހަރުކޮށް ކިޔަވާ ނަމާދު ތަކުގައްޔާއި ތަރާވީޙު ނަމާދާއި ދަމު ނަމާދުގައި، މިސްކިތުގެ އެތެރެއަށް އަޑު ހުންނަ ގޮތަށް ކުރުން ރަނގަޅީ. ކުޑަކުދިން ނިދާ ގަޑިތަކުގައްޔާއި އުޒުރުވެރިން ގޭގައި ކުރާ ނަމާދުތަކަށް ދަތި ނުވާނެހެން ގެންދިއުން ރަނގަޅީ."
ނަމަވެސް، "ބަންގި އާއި ގަމަތް ބޭރަށް ހުއްޓަސް އެންމެ ރަނގަޅު" ކަމަށް އޭނާ ވިދާޅުވި އެވެ.
އިބްރާހިމް އިސްމާއީލް އިތުރަށް ވިދާޅުވީ މިސްކިތުން ކުރިޔަސް، އާންމު އުނދަގުލަކަށް ވާގޮތަށް އަޑުގަދަ ކުރުމަކީ އާންމު އިޖްތިމާއީ މިންގަނޑުތަކުގެ ގާނޫނާ ހިލާފު ކަމެއް ކަމަށާއި އެއީ ކުށެއް ކަމަށެވެ. އަދި ތާޅަފިލިން ބޭރަށް އަޑު ދީގެން ނަމާދު ކުރުމަކީ ދީނާ ހިލާފު ކަމެއް ކަމަށާއި އެކަން އިސްލާމިކް މިނިސްޓްރީ އަށް ހުއްޓުވެންވާނެ ކަމަށް އޭނާ ވިދާޅުވި އެވެ.
އެ ވާހަކަ އަށް ސީދާ ޖަވާބެއް ދެއްވުމުގެ ބަދަލުގައި ޝަހީމް ވިދާޅުވީ ކަންކަން ރަނގަޅު ކުރުމަށް މަސައްކަތް ކުރައްވަމުން ގެންދަވާ ކަމަށާއި "ހެޔޮ ނަތީޖާ ފެންނާނެ" ކަމަށެވެ.
