ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު އެ ކޮމިޝަނުގެ ބޭނުމަށް ރާއްޖެއަށް ގެނެސްފައިވާ ކާރަކަށް އަމިއްލަ ފައިސާ ހޭދަކޮށްގެން ބަދަލުތަކެއް ގެނެސްފި އެވެ.
މާނިއު "އެކްސް" ގައި ކުރެއްވި ޕޯސްޓެއްގައި ވިދާޅުވީ ކާރަށް ބަދަލުތަކެއް ގެނައުމާއެކު އާންމުން އެކަމާ ހިތްހަމަ ނުޖެހޭތީ ކުރިން ހުރި ގޮތަށް ކާރު ބަދަލުކުރަން ނިންމާފައިވާ ކަމަށެވެ. އޭނާ ވަނީ އެ ކަމާ ގުޅިގެން އާންމުންގެ ކިބައިން މާފަށް އެދިފަ އެވެ.
"ކާރުގައި ރަން ކުލަައިގެ ބައިތަކެއް ހިމެނުމުން އާންމުން ހިތްހަމަ ނުޖެހޭތީ ކުރިން ހުރި ގޮތަށް ބަދަލުކުރާނަން. ބަދަލު ގެނައީ އަމިއްލަ ހަރަދުގައި" މާނިއު ވިދާޅުވި އެވެ.
މާނިއު ކުރިން "އެކްސް" ގައި ވިދާޅުވީ ކާރަށް ބަދަލުތަކެއް ގެނައީ ކަސްޓަމްސްގެ އާ ލޯގޯ ރަން ކުލައިގައި ހުންނާނެތީ އެއްގޮތް ކުރުމަށް ކަމަށާއި، އެ ބަދަލު ކަސްޓަމްސްގެ ހުރިހާ ވެހިކަލަކަށް ވެސް ގެންނަން ނިންމި ކަމަށެވެ.
މާނިއުގެ ކާރަކީ ޖަޕާނު ސަރުކާރުން ރާއްޖެ ހަދިޔާ ކޮށްފައިވާ ކާރަކަށްވާއިރު، އެ ކާރަށް ބަދަލުތައް ގެނައުމުން އާންމުންގެ ފާޑުކިޔުން މާނިއުއަށް ވަނީ އަމާޒުވެފަ އެވެ.
