ކަސްޓަމްސްގެ ބޭނުމަށް އެމެރިކާ އަދި ޗައިނާއިން ޑްރޯންތަކެއް ގެންނަން ނިންމާފައިވާ ކަމަށް ކޮމިޝަނާ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު ވިދާޅުވެއްޖެ އެވެ.
މަޖިލީހުގެ 241 ކޮމިޓީގައި އެ މުއައްސަސާގެ މަސައްކަތާ ބެހޭގޮތުން ދެއްވި މައުލޫމާތުގައި މާނިއު ވިދާޅުވީ ރާއްޖޭގެ ބޯޑަރު ބެލެހެއްޓުމުގެ ފުރިހަމަ ގާބިލުކަން މިވަގުތު ކަސްޓަމްސްގައި ނެތް ކަމަށާއި ރާއްޖެ ވަންނަ އުޅަނދުތައް މޮނީޓާކޮށް އެ އުޅަނދުތަކާ ހަމައަށް ދަތުރުކުރުމުގެ ގާބިލުކަންވެސް ކަސްޓަމްސްގައި ނެތް ކަމަށެވެ.
"އޭގެއިތުރުން އެމެރިކާއިން އަޅުގަނޑުމެން އެބަގެންނަން ޑްރޯންސް ވެސް، ޗައިނާއިންވެސް އެބަގެންނަން ޑްރޯންސް، އަޅުގަނޑުމެން އެބަ ބޭނުންވާ ޑްރޯންސް، ވާގޮތަކީ ބޭރުން މި އަންނަ ވެސަލްތައް މޮނީޓާ ކުރެވޭނެ އެއްވެސް ގޮތެއް ނޯންނާނެ އަޅުގަނޑުމެންނަކަށް،" މާނިއު ވިދާޅުވި އެވެ.
މިހާތަނަށް އުޅަނދެއް ހުއްޓުވަން ނުވަތަ ބަލާފާސްކުރަން ބޭނުންވާނަމަ ކަސްޓަމްސް އިން ބޭނުންކުރަމުން ދިޔައީ އެމްއެންޑީއެފްގެ އެހީގައި ކޯސްޓުގާޑުގެ އުޅަނދުތައް ކަމަށްވެސް އޭނާ ފާހަގަކުރެއްވި އެވެ.
ޑްރޯންގެ އިތުރުން މި މައްސަލަ ހައްލުކުރުމަށް ޖަޕާނުން 85 ފޫޓުގެ އުޅަނދެއް ލިބޭނެ ކަމަށް ކޮމިޝަނާ ވިދާޅުވި އެވެ. އަދި، އަންނަ އަހަރު ޗައިނާއިން ދެ އުޅަނދާއި އެމެރިކާއިން އުޅަނދުތަކެއް ލިބޭނެ ކަމަށް މިހާތަނަށް ކުރި މަޝްވަރާތަކުން އެނގިފައިވާ ކަމަށްވެސް އޭނާ ވިދާޅުވި އެވެ.
މާނިއު މިހެން ވިދާޅުވުމުން، ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ މިހާރު އެމްއެންޑީއެފުގައި ބޭނުންކުރާ ޑްރޯންތައް ކަސްޓަމްސްއިން ބޭނުންނުކުރެވޭނެތޯ ސުވާލުކުރައްވާފަ އެވެ.
އެ ސުވާލުގެ ޖަވާބުގައި މާނިއު ވިދާޅުވީ، އަލަށް ގެންނަ ޑްރޯންތަކުގެ މަސައްކަތް އެމްއެންޑީއެފްގެ އެއާކޯއާ އެކު ކުރުމަށް މިހާރުވެސް އެމްއޯޔޫއެއްގައި ސޮއިކޮށްފައިވާނެ ކަމަށެވެ. އޭރުން ކަސްޓަމްސްއަށް ލިބޭ ޑްރޯންތައް އެމްއެންޑީއެފް އަށްވެސް ބޭނުންކުރެވޭނެ ގޮތްވެ، ސިފައިންގެ ޑްރޯންތަކުގެ އަދަދު އިތުރުވާނެ ކަމަށްވެސް އޭނާ ވިދާޅުވި އެވެ
މި ޑްރޯންތަކަކީ ހިލޭ އެހީކަމެއް ނުވަތަ ސަރުކާރުން ހަރަދުކޮށްގެން ގަންނަ ތަކެތި ކަމެއް ކަސްޓަމްސް އިން މިއަދު ބުނެފައެއް ނުވެ އެވެ. ނަމަވެސް މާނިއު ވިދާޅުވީ އެމްއެންޑީއެފް އާއެކު ޑްރޯންތަކުގެ މަސައްކަތް ކުރަން ނިންމީ ދައުލަތުގެ ހަރަދެއް ޑުބްލިކޭޓު ނުކުރަމަށް ކަމަށެވެ.
